UTUKU udiangata bu muena Kristo anyi? Biobi nanku, udi munkatshi mua bantu bapite pa miliyare 2 badi pa buloba badi badiamba mudibu bayidi ba Kristo. Lelu eu, kudi bitendelelu binunu ne binunu bidibu babikila ne: mbia bena Kristo, kadi badi batapuluke bua dibenga kupetangana dia malongesha abu a nshindamenu ne bua dishilangana dia mmuenenu yabu. Malu audi witabuja adi mua kuikala mashilangane ne a bakuabu badi badiamba mudibu bena Kristo. Malu au adiku ne mushinga anyi? Eyowa, adi ne mushinga biwikala musue kuenza buena Kristo budi Bible ulongesha.

Bayidi ba Yezu Kristo ba kumpala bavua bamanyike bu “bena Kristo.” (Bienzedi 11:26) Kabavua dijinga ne mêna makuabu bua kubamanyabu to, bualu kuvua anu ntendelelu umuepele wa bena Kristo. Bena Kristo bonso bavua balonda malongesha ne mibelu ya Yezu Kristo udi Muenji wa buena Kristo. Kadi netuambe bishi bua tshitendelelu tshienu? Udiku witaba ne: tshitendelelu tshienu tshidi tshilongesha malu avua Kristo mulongeshe ne avua bayidi bende ba kumpala bitabe anyi? Ntshinyi tshidi mua kukujadikila bualu ebu? Kudi anu mushindu umuepele, tuambe ne: kuenza mudimu ne Bible bu tshipiminu.

 Mona bualu ebu: Yezu Kristo uvua unemeka bikole Mifundu Minsantu bualu n’Dîyi dia Nzambi. Kavua wanyisha bantu bavua batekesha bukole budi nabu malongesha a mu Bible pa kutamba kuimanyina pa bilele bia bantu. (Mâko 7:9-13) Tudi mua kuambilamu ne: bayidi balelela ba Yezu badi bangatshila malongesha abu mu Bible. Nunku mbimpe bua muena Kristo yonso adiebeje ne: ‘Malongesha a mu tshitendelelu tshietu adiku umvuangana ne Bible anyi?’ Bua kuandamuna lukonko alu, kuenaku mua kufuanyikija malu adi tshitendelelu tshienu tshilongesha ne tshidi Bible wamba menemene anyi?

Yezu wakamba ne: ntendelelu wetu udi ne bua kuimanyina pa bulelela budi mu Bible. (Yone 4:24; 17:17) Ne mupostolo Paulo wakamba pende ne: bua kupeta lupandu tudi ne bua kufika “ku dimanya dijalame dia bulelela.” (1 Timote 2:4) Nanku mbia mushinga bua malongesha etu ikale mimanyine pa bulelela bujalame bua mu Bible. Ke bua tshinyi lupandu luetu ludi mu njiwu.

Tudi tukulomba bua ubale nkonko isambombo idibu bele mu tshiena-bualu etshi ne utangile mandamuna adi Bible ufila ku nkonko ayi. Bala mêyi a mvese idibu bafile, ne elangana meji bua mandamuna au. Pashishe diebeja ne: ‘Malu adi Bible ulongesha adiku apetangana ne a mu tshitendelelu tshietu anyi?’

Nkonko mikese eyi idi mua kukuambuluisha bua kuenza difuanyikija dia mushinga mukole diutu katshia kuyi muanji kuenza. Udiku musue kufuanyikija malongesha makuabu a mu tshitendelelu tshienu ne tshidi Bible wamba anyi? Bantemu ba Yehowa nebikale ne disanka dia kukuambuluisha bua ukonkonone bimpe bulelela budi mu Bible. Kuenaku mua kulomba Ntemu kampanda bua akulongeshe Bible kuyi ufuta kantu anyi? Anyi udi mua kubuela mu site wetu wa Enternete wa jw.org.