¿TIONPOUI iniuan akin kitojtokaj Cristo? Komo ijkon, tionpoui iniuan panoua ome mil millones akin no ijkon kichiuaj. Itech nejin tonalmej moajsij miak taneltokalismej kampa kijtouaj ke kichiuaj kemej Cristo, sayoj ke tataman tein tamachtiaj uan tataman kemej tanemiliaj. Xa tein tejuatsin tikonneltoka semi taman ke tein kineltokaj oksekin akin no kijtouaj ke kichiuaj kemej Cristo. ¿Motelneki tikonitas tein kijtoua Biblia iuan tein tikonneltoka? Kemaj, komo tejuatsin tikonneki tikontojtokas Cristo ijkon kemej kijtoua Biblia.

Yekinika itatojtokakauan Jesús moixmatkej kemej cristianos (Hechos 11:26). Kemej sayoj moajsia se oloch akin takuaujtamatia iuan Cristo, amo monekia okse tokayit tein ika moixmatiskiaj. Itatojtokakauan Cristo kisentakamatiaj tamachtilismej uan tanauatilmej tein kinmakak Cristo Jesús. Uan itech tiopan kampa tionpoui, ¿tikonnemilia ke tamachtiaj tein Cristo tamachtij uan kineltokaj tein yekinika itatojtokakauan kineltokayaj? ¿Toni uelis mitsonpaleuis xikonmati ox ijkon kichiuaj? Uelis tikonmatis sayoj komo tikonita tein tamachtiaj itech tiopan kampa tionpoui iuan tein kijtoua Biblia.

Xikonnemili nejin: Jesucristo senkis kipoujkaitaya Biblia porin kineltokaya ke katka iTajtol Dios. Yejua amo kuali kiitaya maj tepitsin kipatakan tein  kijtoua uan ijkon kipaleuiskej tein tamachtiaj takamej (Marcos 7:9-13). Yejua ika, uelis senkis tikijtoskej ke akin yekmelauj katkaj itatojtokakauan Cristo tein kineltokayaj kikixtiayaj itech Biblia. Yejua ika, nochin akin kinekiskej kichiuaskej kemej Cristo monekiskia motajtaniskej: “Tein tamachtiaj itech notaneltokalis, ¿mouika iuan tein Biblia tamachtia?”. Uelis tikonnankilis nejin netajtanil, komo tikonita tein tamachtiaj itech tiopan kampa tionpoui iuan tein Biblia kijtoua.

Jesús kijtoj ke moneki tikueyichiuaskej Dios ika tamachtilis tein melauak uan nejon tikajsij itech Biblia (Juan 4:24; 17:17). Uan no, Pablo se imomachtijkauj Jesús kijtoj ke timomakixtiskej komo timomachtiaj “in melauak Tajtoltsin de Dios” (1 Timoteo 2:4). Yejua ika tein tikneltokaskej motelneki maj kisa itech tamachtilis tein melauak tein moajsi itech Biblia. Nejon techpaleuis maj timomakixtikan.

Timitsonyoleuaj xikonixtajtolti chikuasen netajtanilmej tein moajsij itech recuadro uan xikonita keniuj Biblia kinankilia sejse. Xikonixtajtolti textos tein ijkuiliujtokej uan xiontanemili itech tanankililmej tein motemakaj. Satepan xionmotajtani: “¿Mouika tein tamachtiaj itech notiopan iuan tein kijtoua Biblia?”.

Nejin tein tikitakej mitsonpaleuia xikonita tein Biblia tamachtia iuan tein tikonneltoka. ¿Tikonuelitaskia tikonitas okseki taman tein kijtoua Biblia iuan tein tamachtiaj itech motiopan? Itaixpantijkauan Jiova uelis mitsonpaleuiskej xikonita tein tamachtia Biblia. Xiontajtani se nemachtil ika Biblia iniuan itaixpantijkauan Jiova oso itech jw.org, Internet kampa timoteixmatiltiaj. Amo moneki tiontaxtauas.