E MATA, e taku ne koe a koe eiloa ki se Kelisiano? Kafai e penā loa, e aofia eiloa koe i tino e silia atu mo te lua piliona i te lalolagi nei—toeitiiti ko nofo ki te 1 mai te 3 o tino—kolā e fai mai i a latou ne soko o Keliso. I aso nei, e lau i afe o potukau fakalotu e fai mai i a latou ne Kelisiano, kae e mavae‵vae latou ona ko olotou akoakoga mo kilokiloga ‵kese. Tela la, e mafai o ‵kese ou talitonuga mai nisi tino kolā e fai mai i a latou ne Kelisiano. E mata, e tāua ki a koe a ou talitonuga? Ao, māfai e fakagalue ne koe a akoakoga faka-Kelisiano mai te Tusi Tapu.

Ne lauiloa a soko mua o Iesu Keliso e pelā me ne “Kelisiano.” (Galuega 11:26) Ne seki manakogina a nisi igoa ke fakaigoa ki ei a latou, me e tasi eiloa te Lotu Kelisiano telā ne fakatu aka. E ‵kau fakatasi eiloa a Kelisiano o tau‵tali ki akoakoga mo fakatonuga a te Tino telā ne māfua mai i a ia a te Lotu Kelisiano, ko Iesu Keliso. Kae e a tau lotu? E mata, e talitonu koe me e akoako i ei a mea kolā ne akoako ne Keliso mo mea kolā ne tali‵tonu ki ei a soko o Keliso i aso mua? E mafai pefea o fakamautinoa aka ne koe? E tasi eiloa te auala—ke fakaaoga te Tusi Tapu e pelā me se fua.

Mafaufau ki te mea tenei: Ne āva malosi a Iesu Keliso ki te Tusi Tapu e pelā me ko te Muna a te Atua. Ne seki talia ne ia a tino kolā ne fakaseaoga ne latou  a akoakoga i te Tusi Tapu ona ko te fakamuamua ne latou a olotou tuu. (Maleko 7:9-13) E mafai o fakaiku aka ne tatou me ne fakavae eiloa ne soko o Iesu a olotou talitonuga ki te Tusi Tapu. Tela la, e ‵tau o ‵sili ifo te Kelisiano ki a ia eiloa penei, ‘E mata, e fetaui a akoakoga a taku lotu mo te Tusi Tapu?’ Ke tali aka te fesili tenā, kaia e se fakatusatusa ei ne koe a akoakoga a tau lotu mo mea kolā e akoako ‵tonu mai i te Tusi Tapu?

Ne fai mai a Iesu me i te ‵tou tapuakiga ki te Atua e ‵tau o fakavae ki te munatonu—e maua te munatonu i te Tusi Tapu. (Ioane 4:24; 17:17) Kae ne fai mai te apositolo ko Paulo me i te ‵tou fakaolataga e faka‵na eiloa ki te “iloa tonu ne [tatou] a te munatonu.” (1 Timoteo 2:4) Tela la, se mea tāua ke fakavae ‵tou talitonuga ki te munatonu mai i te Tusi Tapu. Me i te ‵tou fakaolataga ko tu nei i se tulaga fakamataku!

E ‵kami ne matou a koe ke faitau ki fesili e ono kae ke iloa aka a tali mai te Tusi Tapu ki fesili konā. Onoono ki fuaiupu i te Tusi Tapu kolā e siki mai, kae mafaufau ‵loto ki tali konā. Ka oti, ko ‵sili ifo ki a koe eiloa penei, ‘E mafai pefea o fakatusatusa ne au a akoakoga a taku lotu mo mea kolā e fakaasi mai i te Tusi Tapu?’

E mafai o fesoasoani atu a fesili toe‵toe konei ke mafai o fai ne koe te ‵toe fakatusatusaga aoga. E mata, ka mafai ne koe o fakatusa‵tusa a nisi akoakoga a tau lotu mo mea kolā e fakaasi mai i te Tusi Tapu? Ka fia‵fia eiloa a Molimau a Ieova o fesoasoani atu ke sukesuke koe ki muna‵tonu mai i te Tusi Tapu. Kaia e se fakamolemole atu ei koe ki se tokotasi o Molimau a Ieova mō se akoga faka-te-Tusi tapu sē ‵togi? Io me fano ki te motou website, jw.org.