TECHEʼ ¿cristianoech wa? Wa beyoʼ juntúulech tiʼ le maas tiʼ dos mil millones máakoʼob tiʼ tuláakal yóokʼol kaab ku yaʼalikubaʼob cristianoʼoboʼ. Teʼ kʼiinoʼobaʼ u milesil religionoʼob ku yaʼalikubaʼob cristianoʼob, chéen baʼaleʼ maʼ junpʼéeliliʼ baʼax ku kaʼanskoʼob wa ku creertikoʼobiʼ. Le oʼolal maʼ xaaneʼ le baʼax ka creertikoʼ jelaʼan tiʼ le baʼax ku creertik le uláakʼ «cristianoʼoboʼ». Maʼ xaaneʼ jeʼel a waʼalikeʼ: «¿Baʼax túun yaantiʼ? ¿Kʼaas wa ka in creert yaanal baʼal?». Wa a kʼáat kuxtal jeʼex juntúul jaajil cristianoeʼ maʼ unaj a creertik baʼax minaʼan teʼ Bibliaoʼ.

Le yáax máakoʼob tsaypacht Cristooʼ kʼaj óoltaʼaboʼob bey cristianoʼobeʼ (Baʼaxoʼob [Hechos] 11:26). Maʼ kʼaʼabéet uláakʼ kʼaabaʼ tiʼobiʼ tumen chéen junmúuchʼ cristianoʼob yaan kaʼachi. Le cristianoʼoboʼ junmúuchʼ úuchik u tsʼoʼokbeskoʼob tuláakal le baʼaxoʼob tu kaʼansaj Jesucristo, le máax káajs le cristianismooʼ. ¿Kux túun a religión? ¿Ku kaʼansik wa le baʼaxoʼob tu kaʼansaj Cristo yéetel creertaʼab tumen le yáax cristianoʼoboʼ? ¿Bix jeʼel a wojéeltik wa jach beyoʼ? Chéen jaʼaliʼ ka a comparart yéetel baʼax ku yaʼalik le Bibliaoʼ.

 Tukult lelaʼ: Jesucristoeʼ jach u yojel tiʼ Dios u taal le Kiliʼich Tsʼíiboʼoboʼ. Le beetik tu kʼeyaj le máaxoʼob tsʼáaik juntséelil u Tʼaan Dios chéen utiaʼal u beetkoʼob baʼax kaʼansaʼantiʼob tumen u úuchben láakʼtsiloʼoboʼ (Marcos 7:9-13). Jeʼex k-ilkoʼ tuláakal le baʼaxoʼob ku creertik le jaajil cristianoʼoboʼ tiaʼan teʼ Bibliaoʼ. Tuláakal máak túuneʼ unaj u tuklik: «¿Tiaʼan wa teʼ Biblia le baʼaxoʼob ku kaʼansik in religionoʼ?». Utiaʼal a wojéeltikeʼ maʼalob ka a ket baʼax ku kaʼansik a religión yéetel baʼax ku kaʼansik le Bibliaoʼ.

Jesuseʼ tu yaʼaleʼ utiaʼal k-adorartik Dioseʼ unaj k-creertik baʼax jaaj; le jaajoʼ tiaʼan teʼ Bibliaoʼ (Juan 4:24; 17:17). Apóstol Pabloeʼ tu yaʼaleʼ tuláakal le máaxoʼob u kʼáat u salvartubaʼoboʼ kʼaʼabéet u «chúukaʼan kʼaj óol[tikoʼob] le jaajoʼ» (1 Timoteo 2:4). Le oʼolal unaj k-creertik chéen baʼaxoʼob ku kaʼansik le Bibliaoʼ. ¿Baʼaxten? Tumen chéen bey jeʼel k-salvartikbaoʼ.

K-invitartikech a xok le seis kʼáatchiʼob yaan teʼ cuadrooʼ ka a wil baʼax ku núukik le Bibliaoʼ. Kaxt le tekstoʼoboʼ yéetel tuukulnen tiʼ baʼax ku tsolkoʼob. Ken tsʼoʼokkeʼ tukle: «¿Igual wa baʼax ku kaʼansik in religión yéetel baʼax ku yaʼalik le Bibliaoʼ?».

A beetik jeʼex tsʼoʼok k-aʼalikoʼ maʼ xaaneʼ yaan u yáantkech a comparart baʼaloʼob mix juntéen a tukle. ¿A kʼáat wa a ket uláakʼ baʼaloʼob ku kaʼansik a religión yéetel le baʼax ku kaʼansik le Bibliaoʼ? U j-jaajkunajoʼob Jéeobaeʼ yéetel kiʼimak óolal ken u yáantechoʼob a kan u jaajil teʼ Bibliaoʼ. Kʼáat tiʼ juntúul tiʼ letiʼob ka u xíimbaltechoʼob, wa ooken Internet teʼ jw.org.