Pua yem a bi nyodi Jaman inyu yén i Ôstrélia i nwii 1949. A bi lo yéñ bôlô i homa ba yéñ tik ngok tole i homa ba mboñ mapubi ma maléktrik, ha yen a bi yééne i man mbai wada le Victoria. Nyoo nyen a bi biiba ni mma yem, me me gwéé i nwii 1953.

Ndék nwii i mbus, mma yem a bôdôl nigil Bibel ni Mbôgi Yéhôva, jon me mañge ntitigi me bi nigil maliga. Ndi pua yem a bé oo base. A yila mut bisañ, a bé tét mma yem. Mma a bi waa bé nigil Bibel, a bé nigil bisôsôli, a gwéhék i mam a bé nigil ikété Bibel. I ngéda pua a bé a pam, a bé añle me ni mankéé nu muda nu mbus i mam a bé nigil. A kal bés le, paradis i ga loo hana isi i dilo di nlo, ni le di ga ba maséé ibale di nôgôl matiñ ma Bibel.—Tjémbi 37:10, 29; Yésaya 48:17.

I ngéda me bi pamna 18 nwii, kiki pua yem a bi nai ni bisañ me bi nyodi i ndap, me ke. To hala kiki me bé hémle i mam mma yem a bi niiga me ikété Bibel, me bi yi bé nseñ u matiñ ma Bibel. Jon me bi la bé noñ mo. Me bi bôdôl sal bôlô i mapubi, i iñgin makalak. I ngéda me bi bana 20 nwii, me biiba. Nwii maa i mbus, ngond yés bisu i gwéé, me tiimba wanba inyu yi kii i nlôôha ba nseñ i niñ yem. Me bé yi le Bibel i nla hôla lihaa jés. Jon me bi bôdôl nigil Bibel ni Mbôgi Yéhôva yada, ndi nwaa wem a bé gwés bé Mbôgi Yéhôva to ndék. I ngéda me bi ke i likoda jap jada, a béhe me, a kal me le: Ibale me ntéé bé yigil yem i Bibel, a mpémés me i ndap. Me bi tomb, me neebe i jam a bi kal me, me kit maada momasôna me bééna ni Mbôgi Yéhôva. Me bi sôk tam, inyule me bi boñ bé jam me bé yi le li yé loñge.

Kel yada, mawanda mem ma bôlô ma bi unda me bititii bi malal. Bi bé lémél me, bi tééñgaga ki me, kiññem i bé kéés me. Me bi hoñol i yom me bi nigil i Bibel, me yi le Nyambe a bé lama kogse me. Ndi kiki me bi ke ni bisu i béñge mam ma, litehge jem li bititii bi malal li bi héñha. Sôk i nsôk me nyila nkol u bititii bi malal.

Mu 20 ma nwii ma bi noñ ha, me bi ke haa ni mam mma yem a bé yéñ niiga me. Bihiumul gwem bi bé unda i yom me bé ha mahoñol. Me bééna bibuk bibe, me podok mpuñgu inyu jôha. Me bééna ha bé litehge lilam li malal. Me bé me nginda niñik ni nwaa wem, ndi me bééna bôda bape. Kel yada me bi béñgba i léman, me kal le: “Me ngwés bé me we.” Me bé diihe ha bé memede, maboñok mem ma bé wéha me nyuu.

Me bi bos ni nwaa wem, niñ yem i ôbi yaga ôbi yosôna. Ha nyen me bi soohe Yéhôva ni ñem wem wosôna. Me témb me bôdôl yigil yem Bibel i mbus 20 nwii. Mu nwii mi, pua yem a bi wo, mma yem a bi sôblana, a yila Mbôgi Yéhôva.

Maselna makeñi ma bé ipôla niñ yem ni matiñ ma Bibel. Ndi lini lisañ, me bi kit le me nlama bana nsañ u mahoñol Bibel i mbôn. Me bi boñ biliya i bana bipôdôl bilam, me boñ yak biliya i jôs libak jem libe. Me bi yoñ makidik le me nhéñha niñ yem i nyega, me nwas mintuk mi moni, me waa nyo ngandak mook, me waa ki nibil nwet wem bôlô.

Solôñ yem i bôlô i bé bé le nok inyuki me bé yéñ héñha hala. Nwii maa, ba bi boñ kii yosôna ba bé la inyu boñ le me tiimba bana bilem gwem bibe. Hiki ngéda me bé me tiimba boñ jam libe, ba bé ba kal ni makénd momasôna le: “Hala! Nlômbi Joe unu u ntiimba lo! Bibuk bi, bi bé tééñga me ngandak. Me bé nôgda le me gwééba bé.”

I homa wem bôlô Bititii bi malal bi bé homa nyensôna, bi bé i bividéô yak i mapep. I bôt me ni bo di bé sal ba bééna lem ômle bôt bititii bi bi unda mam ma nyega, ni njel ordinater yap kiki yak me, me bé boñ behee. Me bé yéñ pam mu i mok mi, ndi ba bé tômbôs bé me mam. Me bi kal i mankéé a bé tégbaha yigil yem i Bibel mam momasôna, le a hôla me, a ti ki me makénd. Me bi yible nye ñem, a emble me loñge. A bi gwélél minlôñ mi Bibel, mi a bi tibil pohol inyu hôla me i pam i yémbél i lem yem ibe i, a ti ki me makénd le me bat Yéhôva mahôla ibabé waa ikété masoohe.—Tjémbi 119:37.

Kel yada, me bi naña solôñ yem i bôlô i man boma. I ngéda bobasôna ba bi kodba, me kal bo le ba ti bôt iba ba ba bé ni bés mook, bomede ba nyik le i bôt ba, ba bé bôt ba lihua. Bobasôna ba timbhe makeñi le: “U nla bé boñ i nya jam i! Ngo bôt bana ba njo inyu pamba mu mok mi mook!” Ha nyen me bi timbhe bo le: “Maliga ma, ngo yak me me njo i nlélém sañ.” Ibôdôl i kel i, solôñ yem i bôlô i bi yi i sañ me bé jo inyu tjôô bititii bi malal. Ba bi tinde ha bé me i boñ mam me bé boñ behee.

Kiki ngéda i bé tagbe, ni mahôla ma Yéhôva, me bi pam i mok ma lem i béñge bititii bi malal. I nwii 1999, me nsôblana, me yila Mbôgi Yéhôva. Me bi ti Yéhôva mayéga le a nti me pôla i bana niñ ilam ni i maséé.

I len ini me nok inyuki Yéhôva a ñoo i mam me bi gwés ntandaa ngéda. Kiki a yé isañ nu a ngwés bon bé, a bé yéñ le me nok bañ njôghe mut a nok i ngéda a béñge bititii bi malal. I yom di añ i kaat Bingéngén 3:5, 6 i nkal le: “Bôdôl Yéhôva ñem ni ñem woñ wonsôna, u nigbene bañ yi yoñ wemede. Yéñ mahoñol mé ikété mam momasôna u mboñ, a ga boñ le mam ma kee loñge i niñ yoñ.” Matiñ ma Bibel ma ta ndik bé inyu sôñ bés, ibabé nkaa ma ga hôla ki bés i yémbél.—Tjémbi 1:1-3.

Behee, niñ yem i bé wéha me nyuu, ndi len ini me ndiihe memede, me banga ñem nwee. Me gwé niñ i mpôp i mis ma Nyambe, me nôgda le Yéhôva a nwéhél me, le a nit me. I nwii 2000, me bi biiba ni Karolin, nlam sita nu a ngwés Yéhôva nlélém kiki me. Ndap yés i yé nsañ. Di gwé nsima nkeñi i ba mu lihaa li bikristen li li gwéhna li bak mapubi i nkoñ’isi wonsôna.