Ro taun 1949, kamam ibur sup Jerman ma ḇyarek ro Australia. Syewar fararur ro perusahan pertambangan ma perusahan listrik, inja ḇyarek ro mnu kasun Victoria. Ro diwa kamam fyarḇuk kuker awin ma ro taun 1953 yaḇeaben.

Taun ḇeḇeso mura, awin dakfarkor Refo kuker Saksi Yahwe. Inja rofyor yaḇaba kaker yamarisen faro farkarkor Refo ya. Ḇape kamam imarisen ḇa faro agama. Imasasor ma byuk wos makakak ḇe awin i, inja awin imgak kaku faro kamami. Ḇape awin fyarkor ker Refo ya fyor kamam ifawi ḇa, ma iswar syadi wer rosai fyarkor na. Fyor kamam isya ro rum ḇa, awin fyawar ḇe aya ma srar kasun yedi bekur firdaus ro ras ḇarpon iyama ma rariso kobeaski fyor kosouser faro Allah Wos Ḇyedi.​—Mazmur 37:10,29; Yesaya 48:17.

Fyor yaḇe umur 18, yasae ro rum snar kamam imasasor ker. Yakyar faro rosai awin fyarkor ḇe aya, ḇape yafandun na ḇa. Inja yaso anun ḇero Refo ya ḇa. Yafararur ḇe sukan listrik ro pertambangan. Yafarbuk fyor yaḇe umur 20. Taun ri kyor mura inai nubedi ḇyeḇeaḇen, ma yakara wer rosai ḇefandun ro kenem ine. Yafawi snar Refo bisa ifnoḇek kina nggoḇedi. Inja yafarkor wer kuker Saksi Yahwe oso. Ḇape swa yedi imarisen ḇa kaku faro Saksi Yahwe sya. Fyor yakso ro fananjur oso, swa yedi ikofen ḇe aya fa yakinfir farkarkor Refo ke kina nuḇedi. Snar yaḇeḇirḇar, yaso swa yedi ma wis yedi kuker Saksi namuk. Ḇarpur mura yafafko snar yaso ḇa kakaku ya.

Ras oso, bati ro moḇ yafararur ya fyasnai pornografi ḇe aya, roi anna nfasnai roi ḇeḇye ḇa ma ḇeyayin kaku, inja yaḇabir yasasar kwar. Snar yaswarepen kaḇer rosai yafarkor ro Refo ya, inja yakyar Yahwe na byuk samamyai ḇe aya. Ḇape, snar yamam ker sonin ma vidio ḇeḇye ḇa na, fyoro mura yamam na ḇe roi ḇesasar risyaḇa. Inja yawarai kwar ro mamam sonin ma vidio ḇeḇye ḇa anine.

Taun ri 20 kwar, yabinggwanḇur roi ḇepyum awin yeja fyarkor ḇe aya na. Rosai yasun ro kakara yedi, neḇeḇair ro rosai yafrurna. Wos ma rosai yafrurna naḇyeḇa kaku. Inja ḇarpur mura, yana mamam ḇesasar ḇekur seks. Yafarbuk kwar mboi yambran kuker bin ḇese wer. Ras oso, fyor yores ro ḇarpon kansina oso, yakofen ro sne yedi, ’Yayin kaku au.’ Yaḇesyowi manggundaya wer ḇa ma yamsor kaku manggundaya.

Farḇakḇuk yedi namuk, ma kenem yedi kako. Inja kuker kakaku, yaḇenadi ḇe Yahwe. Taun samfur ri suru yafarkor Refo wer ḇa, insape kirine yafarkor Refo ya wer. Fafisu ani kamam imar kwar ma awin dakḇebaptis ḇe Saksi Yahwe kwar.

Yabukikara kenem yedi ma farkarkor ḇemaeja ro Refo ya, rupa ra farsyos ma supswan. Ḇape kirine, yasewar kaku insama swaruser ma sne yeja naknon imnis Refo ikofen ya. Yafadwer moḇ yawos raya ma yamsor fasawsaw ḇa. Yakenem famfnom, yafnak judi, yafarandinem, ma yakarawraw ro bos yedi wer ḇa.

Bati ro moḇ yafararur ya sikmom rosai ḇefnai yasewar fa yafadwer kenem yena ri. Taun ri kyor, sisewar kaku fa sawninyan aya insama yakaḇer ḇe kenem ḇekwar ayena. Fyor sifrur fa yamsor ma yawos wos ḇeḇye ḇa na, simarisen kaku ma sikofen, ”Ine insape Joe iri!” Wos anna nafrur sne yedi iduf kaku! Yaḇaḇir yasasar kwar.

Ro moḇ yafararur pornografi ḇeḇe elektronik ma syap na naisya nabore. Sirwas ker sonin ḇebye ḇa ro komputer, imnis randak roi yafrur ker na. Yasewar fa yapampum na, ḇape sifrowes ker aya insama yakaḇer wer ḇe rari ḇekwar yena. Yor fafnoḇek ro ḇebuk farkarkor Refo ḇe aya. Ḇyekaḇaḇaḇ ryowerpyum aya. Byuk wos anun ro Refo ḇefasnai nyan fa kopampum kenem ḇeraryana, ma danunepen aya fa yor fafnoḇek ḇesya kwar ḇe Yahwe I ro nadi ya.​—Mazmur 119:37.

Ras oso, yaryur bati ro moḇ yafararur ya. Fyor siryur kam, yor fa sbuk swan ḇe bati ri suru randakya suwarai kwar ro aninem swan ya. Bati yesi sirmomen beri ḇo soḇe, ”Wafrur radirya awer! Suine susewar fa sumnai suyinem swan na!” Inja yakofen, ”Aya kako”. Ras anya ḇeri sifawi snar aya kako yasewar fa yapampun marasrisen faro pornografi. Inja sifrowes aya wer ḇa.

Snar Yahwe ifnoḇek aya, inja ḇarpur ya yamam sonin ma vidio ḇeḇye ḇa na wer ḇa. Ro taun 1999, yaḇebaptis ḇe Saksi Yahwe. Yamarisen kukro Yahwe byuk swaf kaker ḇe aya fa yana kenem ḇesren ro barpon I ma yakenem kuker aski.

Kirine insape yafawi rosai ḇefnai fa Yahwe dayin kaku roi yamarisen kaku ro randak ya. Ima Kma ḇesawarwar diri, ma imarisen kyadaunwarek ko ro roi ḇeḇye ḇa kaku ḇeramuma ro pornografi. Imnis ḇekofen ro Amsal 3:5, 6! Mnuk ani ikofen, ”Wakyar faro Yahwe I kuker snembri ḇesiper, ma wakyar awer faro fawawi manggun bena. Ro nyan bena kam, mam pyum faro I, ma nari ifrur nyan-nyan bena fa neaḇyoḇer.” Farkarkor ro Refo nbuk kadaunwarek monda ḇa, ḇape nbuk payamyum nabor syadi ḇe ko kako.​—Mazmur 1:​1-3.

Randakya, yayin mangundaya, ḇape kirine yaḇesyowi kaku manggundaya ma kakara ma swaruser yena naknon kaku. Kenem yedi isren ma yaḇaḇir Yahwe ifnoḇek ma byuk ampun ḇe aya. Ro taun 2000, yafarḇuk kuker Karolina, bin ḇedoser ma iswar kaku Yahwe imnis ra aya. Kenem nuḇena naser payamyum kaku. Numarisen snar nuisya ro fandu naek srar Kristen ḇena kenem besren ma ḇesawarwar ro supswan ine besiper.