Naggafu ta Germany, nagali i yamà ta Australia turi 1949. Nagaleg yaya tu trabahu ta pamminan anna ta planta na kuryente tapus naddian ngana ta Victoria. Tatunna inatawa i yenà, tapus neyana ngà turi 1953.

Nappasa laman i piga ragun, nakipaggigiammu i yenà ta Saksi ira ni Jehova, yatutta neyabbingakku i tuttuddu na Biblia. Ngem, awan vuluvuga tu interes na yamà ta maski anni nga relihion. Nabbalin yaya tu vayolente anna siga, yari tu sobra assing na yenà sa. Nitagu na yenà i tulu-tuloy nga pakipaggigiammuna anna nagustuanna i netuddu ira sa. Nu awan si Papa, ituttudduna ta wagì nga babay anna ta niakan i nagigiammuna. Kinagina nikami i meyannung ta mappange nga paraiso nga davvun anna nu kunnasi kami magayaya nu tuttulammi i estandarte ira na Biblia meyannung ta kondukta.​—Salmo 37:10, 29; Isaias 48:17.

Turi 18 anios ngà, napilitannà manaw ta balay megafu ta kinavayolente ni Papa. Maski mangurug ngà ta nituttuddu ni Mama meyannung ta Biblia, ariakku tinagibalor yatun. Ariakku neyaplika yatun ta pattolè. Nattrabahu ngà bilang electrician ta pamminan tu karbon. Turi kua, nangatawa ngà ta edad bente. Kabalin na tallu ragun, neyana i ollu nga anami nga babay, anna pinana-panono ku nu anni i importante ta pattolè. Ammù nga makoffun i Biblia ta familiami, yatutta nakipaggigiammu ngà tu Biblia ta tadday nga Saksi ni Jehova. Ngem kala-kalussaw na atawà i Saksi ira. Turi ta nagatende ngà ta study-da, pinappilinà​—iyemmakku i paggigiammù onu manaw ngà ta balemi. Awan tu makuà, yari tu ariakku ngana vuluvuga nakiyuvovug ta Saksi ira. Pinabbabawyakku nga ariakku nitulu-tuloy i ganna-gannug nga ammù tu fustu.

Tadday nga aggaw, nangipasingan i katrabahu ira tu bastus ira nga letratu onu i makagi nga pornograpia. Kuruga kagganas anna kakkadda-kaddag, ngem talaga nakokkonsensia ngà. Dakal i pangurugku nga kastiguannà na Dios megafu ta nagigiammù ira ta Biblia. Durante nga umara-aru i masingi-singakku nga pornograpia, nanguli i pagimammaku tatun. Turi kua, na-adik ngà ngana tatun.

Ta unag na 20 dagun, minara-arayyu ngà ta nituttuddu na yenà nga estandarte ira. Masingan ta ugalì nu anni i itattallukku  ta nonoku. Bastus i mallawa-lawan ta simuku anna kakayaku i mappagalo tu immoral ira. Nakkillu i pagimammaku ta sex. Maski sigga-atawannà, namabay ngà lagapa. Mittan inarubakku i ispeho tapus kinagi, ‘Manakî taka.’ Nawawan i respetò ta baggì.

Naggungay kami na atawà, anna interamente nga nadaral i pattolè. Tapus, nivuvvuku i ngamin nga naddian na futù kani Jehova. Nituloyku i paggigiammù tu Biblia, maski dua dekada ngana nga niyemmakkù yatun. Tatun nga tiempo natay ngana i yamà, anna nabawtisowan ngana si yenà nga tadday ta Saksi ni Jehova.

Ararayyu ngana i pattolè ta atannang ira nga estandarte na Biblia. Ngem, determinadu ngà nga malawà i promesa na Biblia nga memammo nga nono. Inulì ngana i marake nga paguvovugku anna kinontrolku i patu na ulù. Niyemmakku i immoral nga pattolay, passugal, pagillellaw, anna pakkoko ta amò.

Ari matindian na katrabahù ira nu ngatta kayàku ngana i manguli. Ta unag na tallu ragun, puru-puruebaddà nga manoli ta dati nga pattolè. Kada ariakku makontrol i patu na ulù onu makekagi ngà tu marake, magayaya ira nga kumukkulle: “Nanoli ngana i dati nga Josef!” Kuruga natakitannà tatun nga kakkagiadda! Kanayukku matageno nga naffù ngà.

Napappannu tu pornograpia i pattrabahuakku, ta computer anna ta pabbibbigan ira. Kanayun nga mangipasa tu bastus ira nga letratu i katrabahù, gittana kukukuakku dati. Kakayàku alsan i pakka-adiktò, ngem determinadu gapa ira nga magangngua tu kesiddukallakku. Nakkiddaw ngà tu suporta anna pamagaram ta manuddu niakan ta Biblia. Pinasensiannà nga ginnan ta pangivuvvuku ta futù. Nangusa yaya tu teksto ta Biblia tapenu ipasinganna niakan nu kunnasi malabanan i pakka-adiktò, anna pinagaramnà nga ari magimmang nga mappoffun kani Jehova gukaban na kanayun nga pappakimallo.​—Salmo 119:37.

Tadday nga aggaw, nappagal ngà tu miting ta katrabahù ira. Turi ta nakapaggarammammung ngana ira, kinagì nira nga iddadda tu binarayang i dua nga ammuda nga minaggillellaw. Kinontrada yatun tapus kudda: “Ariammu puede kuan yatun! Marigi-rigatan ira yatun nga mangiyemmang ta pagillellawda!” Kukku gapa: “Fustu kamu. Kunnatunnà gapa.” Namegafu tatun nga aggaw, nalippawada i zigaku nga labanan i pakka-adikto ta pornograpia yatutta ariaddà ngana pilitan manoli ta dati nga pattolè.

Zimittal i tiempo nga naffùku i pakka-adikto ta pornograpia megafu ta uffun ni Jehova. Nabawtisowan ngà nga tadday ta Saksi ni Jehova turi 1999, anna mappabalo ngà nga napeggannà tu tiansa tapenu mattolay tu disente anna makapagayaya.

Nalippawàku ngana nu ngatta manaki ni Jehova i ganna-gannug nga nabayagku ngana nga kukukuan. Bilang minaggiddu nga Yama, kayàna nga maprotektannà ta marake nga efekto na pornograpia. Talaga kurug i kagian na Proverbio 3:5, 6: “Mattalo ka kani Jehova ta interu nga futum, anna ariammu nga mattalo ta mismu nga pakalippawamu. Ta ngamin nga laka-lakagmu ikonsideram yaya, tapenu tununganna i dala-dalammu.” Ari laman tu proteksion i estandarte na Biblia, garantiya gapa yatun ta makasta nga pattuppalan.​—Salmo 1:1-3.

Dati, dismayadu ngà ta baggì, ngem egga ngana i respetò ta baggì anna memammo ngana i nonoku. Marenu ngana i pattolè anna matagenoku i pamakoma anna suporta ni Jehova. Turi dagun 2000, inatawà si Karolin, guapa nga Saksi, nga kagittà nga mangiddu kani Jehova. Egga imammo ta balemi. Pribilehiomi nga mabbalin tu parte na marenu anna minaggiddu nga Cristiano nga pawwaragi ta interu mundo.