Tata wavilukīle mu Ostrali kutamba mu Alemanye mu 1949. Waendele kukakimba kaji ku matyapu matumbe, wakashikata kunja kwa Victoria. Kwine’kwa ye kwaasongele mama, ne kumbutula mu 1953.

Myaka ibala inga pa kupita’po, mama washilula kwifunda Bible na Batumoni ba Yehova, o mwanda nafundijibwe Bible nakidi mwanuke. Inoko, tata kadipo witabije mu kipwilo nansha kimo. Wakalabele, ne kufuna, mama nandi wazakala. Inoko mama waendelele na kwifunda Bible mu bufyafya, wasanswa byobya byaadi wifunda’mo. Shi Tata i patupu’ye, mama wadi witufundija na nkasami mwana-mukaji byaadi wifunda. Wadi witusapwila myanda ya paladisa ya pano pa ntanda ikāya’ko mu mafuku a kumeso ne mwa kwikadila na nsangaji shi twiendeja mungya misoñanya ya mu Bible.​—Ñimbo ya Mitōto 37:10, 29; Isaya 48:17.

Navilukile kwetu na myaka 18 pa mwanda wa bukalabale bwa Tata. Nansha byonadi nkulupile byaumfudije mama mu Bible, inoko nkyadipo nebimona na mvubu. O mwanda nakomenwe kwibilama. Nashilula kwingila bu sendwe wa nshinga ya mudilo mu mwingilo wa kukola makala. Nasongele na myaka 20. Myaka isatu pa kupita’po twabutula mwana umbajinji mwana-mukaji, pene’pa nashilula kulangulukila pa kintu kine kya mvubu mu bwami būmi. Najingulula’mba Bible ubwanya kukwasha kyetu kisaka, ponka’pa nashilula kwifunda Bible na Kamoni wa Yehova. Inoko wami mukaji wadi ushikilwe Batumoni. Ponakapwidile nabo, wami mukaji waunena kutonga’po kimo​—kuleka kwifunda Bible nansha kuviluka kwinjibo. Mutyima munda waumfwa, naitabija byaanenene, naleka’byo kwifunda na Batumoni. Nealakenye mwenda mafuku pa kutunya kulonda bintu byonadi ndyukile’mba byo byoloke.

Difuku dimo, mwingindi nami wauntadija porno. Byadi bikokañana abyo’ko bya munyanji, kadi netopekele bininge pa kupwa kutala’byo. Ponavulukile byobya byonefundile mu Bible, nalangile na bubine’mba Leza ubwanya kumpa mfuto. Ino byonaendelele kwibitala, mumweno wami pa porno washintyile. Mwenda mafuku, yaumuna.

Mu bula bwa myaka 20 ne musubu, nasonsolokele bityebitye ku misoñanya yaumfundije mama. Mwikadilo wami wasokwele  byobya byadi mu ñeni yami. Nadi ke nena’nka bya kiboja, kadi nadi nsenswe mizaulo ya bya busekese. Natādilwe na milangwe ya busekese. Nansha byonadi na mukaji, nadi kadi ne na baabala. Difuku dimo netala mu dikalashi ne kunena’mba, ‘ndi mwendalale.’ Bulēmantu bwami bwapingakanibwe na mwikadilo wa munyanji.

Twelubwile na wami mukaji, kadi būmi bwami bwavutakene. Ko kulomba Yehova na mutyima wami onso. Naanzulula monka kwifunda Bible, nansha byo papityile myaka makumi abidi na ponalekele’byo kwifunda. Mu kine kitatyi’kya tata wadi ke mufwe, mama nandi wadi ke mubatyijibwe bu Kamoni wa Yehova.

Būmi bwami kebwadipo bukwatañene na misoñanya ya kamweno idi mu Bible. Inoko, mu kino kitatyi nasumininwe kwikala na ndoe ya mutyima ilaile Bible. Naanza kulemununa muneneno wami ne kwifula shi nalobe. Kadi nakwete butyibi bwa kuleka busekese, makayo a kwidya lupeto, bunkolwankolwa, ne kwiba kapita wami wa kaji.

Bengidi nami kebaimvwanijepo mwanda waka nashintyile bininge. Mu bula bwa myaka isatu badi baningila njokele mu mwikadilo wami wa kala. Shi naalukila mu tubilubo twami twa kala, kimfwa kuloba nansha kunena binenwa bibi, badi batuta kyungwe amba: “Aha! Josef wa kala wajoka.” Fwatakanya’po mwadi munsanshila bino binenwa! Divule dine nadi nemona bu wa bule.

Ku kifuko kyami kya kaji kwadi kuyule porno, ku bya busendwe nansha ke bifwatulo bya pa mapapye. Bengidi nami badi betumina bifwatulo bya busekese mu maolodinatele abo, pamo na byonadi nabyo pa kala. Nadi nonga bukomo bwa kwinyongolola mu bupika, inoko badi basumininwe kunjokejeja’mo. Naenda kukamona muntu wadi umfundija Bible mwanda wa kunkwasha’ko ne kunkankamika. Wauntejeje na kitūkijetyima ponadi mulombola byonso byadi ku mutyima. Wauntangila bisonekwa bya mu Bible bitala’nka pa mwanda’wa, waunshintulwila muswelo wa kwinyongolola ku bibidiji byami bibi, ne kunkankamika nkimbe kyaba ne kyaba bukwashi bwa Yehova kupityila mu milombelo.​—Ñimbo ya Mitōto 119:37.

Difuku dimo naita bengidi nami bonso. Abo pa kwibunga, nebalombola’mba nsa kwimutelela’ko bantu babidi balekele malwa akolwañana. Kibumbo kyapatana na kawi mbila’mba: “Bubela! Babo bantu bakilwa na kibidiji kyabo kibi!” Nami nebalondolola’mba: “I amo, nami nakilwa nakyo.” Tamba dine difuku’dya, bantu’ba bayuka’mba noñanga bukomo bwa kuleka kibidiji kya kutala porno, kepaijijepo baanza kuningila njokele mu mwikadilo wami wa kala.

Mwenda mafuku, ne na bukwashi buvule bwa Yehova, nalekele kibidiji kya kutala porno. Mu 1999, nabatyijibwa bu Kamoni wa Yehova, mfwijanga’ko Yehova pa kumpa mukenga mukwabo wa kwikala na būmi bwa nsangaji.

Pano naivwanije kine kishikilwe Yehova bintu byonadi nsenswe mafuku mavule. Byadi Tata wa buswe, wadi usaka ku nkinga ku makambakano alupukanga ku kutala porno. Bine binenwa bidi mu Nkindi 3:5, 6 ibifikidile pondi! Bya amba: “Kulupila mudi Yehova ne mutyima obe onsololo, kadi kokalemēnenapo pa kwivwanija kwa abe mwine; Mu mashinda obe onso muyuke, kadi aye ukōlolanga tushinda tobe.” Misoñanya ya mu Bible keyadipo’tu inkinga bitupu, ino kadi yaunkweshe nekenye.​—Ñimbo ya Mitōto 1:1-3.

Pa kala nadi nekwatwa mukenye, ino pano ngidi na bulēmantu ne ndoe ya mutyima. Ngidi na mwikadilo utōka, Yehova i mundekele bubi bwami kadi unkwatakanyanga. Mu 2000, nasongele Karolin, kaka mwine Kidishitu mupopoke, usenswe Yehova bininge pamo bwa ami. Njibo yetu i kifuko kya ndoe. Na bubine tudi na dyese dya kubadilwa mu kisaka kya mwikadilo utōka kadi kya buswe kya bene Kidishitu kyenda kibaila’ko pano pa ntanda ponso.