Mu 1949, tata afumine muGermany nakuya nakutwama kuAustralia. Ayile nakutonda milimo mumingochi nakutwama jino mumembo amungalila yaVictoria. Kuze ayile, akambachile mama, kaha ami ngwasemukile jino mu 1953.

Omu mwahichile myaka yayindende, mama aputukile kulinangula Mbimbiliya naVinjiho jaYehova, ngocho vyuma yanangula Mbimbiliya vize ngwalinangwile muunyike nguchili nakuvyanuka. Chipwe ngocho tata kazangile kala liuka lyakwitavako. Aputukile kupwa chilyanyi nakutwivwisa woma, kaha mama evwilenga woma chikuma. Mama atwalileho lika kulinangula Mbimbiliya mukusweka, kaha azangilenga chikuma vyuma alinangwilenga. Nge tata wauchiho hembo, kaha mama atulwezelenga nasongo yami vyuma alinangwilenga. Atulwezelenga vyapalachise yahamavu yize nayikapwako kulutwe kaha nawa nomu tunahase kupwa vakuwahilila kachi nge natukavangiza jishimbi jamuMbimbiliya.—Samu 37:10, 29; Isaya 48:17.

Omu ngwapwile namyaka yakusemuka 18 ngwafumine hembo mwomwo yavilinga vyaulyanyi apwilenga navyo tata. Numba tuhu ngwetavilile vyuma apwilenga nakungunangula mama, oloze kangwavimwene kupwa vyavilemuko. Ngocho kangwakavangijilenga vyuma kanako. Ngwaputukile kuzata mulimo wakuwahisa kakahya kakezi mumingochi yakufula makala. Omu ngwapwile namyaka yakusemuka 20, ngwambachile pwevo. Kahomu mwahichile myaka yitatu, twasemene mwana wapwevo, kaha ngwashinganyekele cheka havyuma vyavilemu mukuyoya chami. Ngwatachikijile ngwami Mbimbiliya yinahase kukafwa tanga yetu, ngocho ngwaputukile kulinangula Mbimbiliya naChinjiho chaYehova. Oloze puwami kazangile Vinjiho jaYehovako. Likumbi limwe omu ngwayile kukukunguluka chavo, angutenukilile nakungulweza ngwenyi ngusakuleho kulitwamina kulinangula Mbimbiliya chipwe ngufume hembo. Vyuma ahanjikile vyangwivwishile kupihya, ngocho ngwetavilile vyuma asakile, kaha ngwalitwaminyine kulikata naVinjiho jaYehova. Mukuhita chamyaka ngwaliveyele chikuma hakuhona kulinga vyuma vize ngwatachikijile ngwami vyakwoloka.

Likumbi limwe, vakwetu ngwazachilenga navo kumilimo vangutalishile mivwimbimbi yauselesele. Vyuma kana vyangwivwishilenga kuwaha kaha nawa vyangukoleselenga kumuchima nakwivwa nge nguli namulonga. Omu ngwanukilenga vyuma ngwalinangwile muMbimbiliya, ngwamwene ngwami Kalunga mwanguzangamisa. Oloze mwomwo yakutalanga chikuma mivwimbimbi yauselesele, ngwaputukile jino kuyimona kupwa yamwaza. Kutwala muze, tato yakutalanga mivwimbimbi yatohwele.

Hamyaka 20 yahichilemo, ngwatwalileho lika kuhumbula vyuma vyamuchano vize angunangwilenga mama. Vyuma vize ngwatalilenga vyaputukile  kusoloka namuvilinga vyami. Ngwaputukile kupwa nahanjikiso yayipi nakuseseka chakufwila kulinga ujila. Ngwamwenenga kulimona chalunga napwevo mujila yayipi. Numba tuhu ngwapwilenga napuwami, oloze ngwalingilenga ujila. Kaha ngwalihungile ami ivene havyuma ngwalingile.

Ulo wetu wafwile, kaha chiyoyelo chami chapihile chikuma. Ngwalombele kuli Yehova namuchima wami wosena. Ngwaputukile cheka kulinangula Mbimbiliya numba tuhu mwahichile myaka 20. Halwola ngwaputukile kulinangula Mbimbiliya, tata hanafu lyehi kaha nawa mama hivanamumbapachisa lyehi nakupwa Chinjiho chaYehova.

Vyuma ngwalingilenga kavyalitombwele najishimbi jamuMbimbiliyako. Kutwala muze ngwafwililile kupwa wakuunda muvishinganyeka ngana muze yahanjika Mbimbiliya. Ngwafwililile kupwa nahanjikiso yamwaza nakuunjisa muchima wami wamatoto. Kaha nawa ngwashinganyekele kulitwamina kulinga ujila, nakwecha kuhema chakulitapa, nakwecha kunwa chikuma wala, nakulitwamina nawa kwiva vyuma vyamukulwane wamilimo.

Vakwetu ngwazachilenga navo kavatachikijile ovyo vyangulingishile ngwalumune kuyoya chamiko. Vatwalileho lika kungushinjila hamyaka yitatu mangana ngulinge cheka vyuma vize ngwalingilenga. Shimbu jimwe nge ngunasulakana chipwe nge ngunahanjika mazu amapi, vakiko valikuwilenga ngwavo: “Eyo, ou ikiye Joe twatachikiza!” Mazu kana angwivwishilenga kukola kumuchima, nakulivwa nge ngunahono kwalumuka.

Vatu ngwazachilenga navo vatalilenga chikuma mivwimbimbi yauselesele hamakina nahamapapilo. Vakwetu vaka-milimo valituminyinenga mivwimbimbi yauselesele hajikopyuta ngana muze ngwalingilenga nayami hakavanga. Ngwafwililile kulitwamina tato kaneyi, oloze vakwetu vafwilile kunguhonesa. Ngwalwezele mutu uze angunangwilenga Mbimbiliya mangana angukolezeze nakungukafwa. Evwililenga kanawa kuvyuma ngwamulwezelenga. Azachishile visoneka vyamuMbimbiliya vize vyatalishile kuchihande kana, nakungukafwa mwakulipikila naukalu wami, nakungulweza ngutwaleho lika kulombanga kuli Kalunga mangana angukafwe.—Samu 119:37.

Likumbi limwe ngwakungulwile vakwetu vosena ngwazachilenga navo. Omu vakungulukile, ngwavalwezele vahane wala malunga vavali vaze vafwililile kulitwamina kunwa wala. Lizavu lyosena lyatambakanyine nakwamba ngwavo: “Kaweshi kuhasa kulinga ngochoko. Malunga kana ava vali nakulipika naukalu wakusaka kulitwamina kunwa wala.” Kaha ngwavakumbulwile ngwami: “Eyo. Ou ukiko ukalu nguli nawo nayami.” Kufuma vene haze, vaze malunga vatachikijile omu ngwapwile nakulipika naukalu wakusaka kuhonesa tato yakutalanga mivwimbimbi yauselesele, kaha kavangushinyinyikile cheka mangana ngukindulukile kutato kanako.

Mukuhita chalwola, Yehova angukafwile chikuma ngufungulule tato kana. Kuheta mu 1999, vangumbapachishile nakupwa jino nguChinjiho chaYehova, kaha ngwawahililile chikuma hakupwa jino nachiyoyelo chamwaza.

Ngwatachikiza jino kanawa ovyo Yehova ahungila vilinga vyavipi vize ngwazangilenga chikuma. Hakupwa chisemi wazangi, afwililile kungukinga kuponde yize yeji kwizanga mwomwo yakutala mivwimbimbi yauselesele. Chikupu vene, mazu atwama hali Vishimo 3:5, 6 apwa amuchano. Mazu kana amba ngwawo: “Mufwelelenga Yehova namuchima wove wosena, kanda naupendamina hakunangakana choveko. Mwanukenga muvyuma vyosena naulinganga, kaha mwasungamisanga jijila jove.” Jishimbi jamuMbimbiliya jeji kukinganga nakukafwa mutu afukile.—Samu 1:1-3.

Kunyima, ngwevwilenga nge nguwamokomoko, oloze oholyapwa ngwalimona kupwa nguwamulemu nakupwa wakuunda. Ngwatwama nachiyoyelo chitoma kaha nawa ngwafwelela ngwami Yehova angukonekela kaha ali nakungukundwiza. Mumwaka wa 2000, ngwambachile Karolin pwevo wamwaza uze azanga chikuma Yehova ngana mwayami. Hembo lyetu twatwama mukuunda chikuma. Twawahilila chikuma hakulinunga hamwe navandumbwetu mukaye kosena vaze vatwama nazangi vaze nawa vakwechi chiyoyelo chitoma.