Mu 1949, e tata wancintizile ku Australia ukufuma ku Germany. Wayile mukuvwamba incito mu mamaini na mu twampani tuno tukapanga amalaiti, swinya wisile mu ncende iyizima nkaninye yino witanga ukuti Victoria. Ku Australia akuno watwalizile e mayo swinya nizile inkwatwa mu 1953.

Pa nsizi vye ya myaka mitici, e mayo watalisile ukusambilila Baibolo ni Nte zya kwe Yehova, fwandi ncili nkakwizuka amasambililo ya mu Baibolo yano nasambilizile lyo ndi ne mutici. Naponye e tata atakunzile ivya mapepo. Acino watalisile ukuma e mayo nukumutinya, swinya coo calenzile e mayo awatina nkaninye. Nanti calinji woo e mayo atalesile ukusambilila Baibolo mu nkama swinay wakunzile nkaninye vino wasambililanga mwe Baibolo. E tata ndi wafumapo, e mayo watusambilizyanga ne nkazi yane vino wasambililanga. Watunenileko vino insi yiliwa paradaise ku nkolelo na vino tungawa ni nsansa nga tukucita vino ikalanda.​—Amalumbo 37:10, 29; Ayizeya 48:17.

Nalile nafisya imyaka 18, nafumile pa ng’anda amuno e tata walinji nkaninye nu lombwa. Nanti aca kuti nasuwizile vino mayo wansambilizizye ukufuma mwe Baibolo, ntaviwisileko amano, acino ntavikonkanga. Ninjizile incito yakulunjisya ivya malaiti pa maini yino wimbanga penepo amalasha. Pano nafisizye imyaka 20, natwazile. Pansizi ya myaka yitatu, twapafile umwana umukazyana, swinya natalisile ukwelenganya pa vintu ivicindame vino nazipizile ukucita. Namanyile ukuti vino vyawa mwe Baibolo vinganjavwa ponga nulupwa lwitu, acino natalisile ukusambilila Baibolo ni Nte zya kwe Yehova. Naponye e wakwane atakunzile wa Nte. Pano nayile kukulongana kwa Nte zya kwe Yehova, wanenile ukusolapo conga, pakufuma pa ng’anda nanti ukutwaliliila ukusambilila ni Nte zya kwe Yehova. Ntalondanga ukusya e wakwane, acino namwivwizile vino wanenile swinya nalesile ukusambilila Baibolo ni Nte zya kwe Yehova nukuya mukulongana. Mukupita kwa mpindi, nivwile nkaninye uwuwi pakukanacita vino namanyile uktui avili ivilungamane.

Wanda wumwi wano twawombanga nawo, wantambisizye ivya misiku. Nakunzile ukuvitamba nanti acakuti vyalenzile injivwe uwuwi nukutalika ukucula na melenganyo. Nalile nizuka vino nasambilizile mwe Baibolo, nasinincizizye ukuti e Leza walinjonona. Naponye natwalilizile vye ukuvitamba, ica kuti nasusile naleka ukwivwa uwuwi. Mukupita kwa mpindi nakunkumile.

Imyaka 20 yino yakonsilepo, nalesile ukukonka vino e mayo wasambilizizye mwe Baibolo. Imiwele yane yalanjizyanga vye vino natambanga. Natukananga, swinya nakunzile ni mipulwe imiwipe. Natalisile ukulola ukuti ukucita uwuzelele kutawipa. Nanti aca kuti natwite, napitanga na wanaci wanji. Nayipasile nkaninye swinya nayilolanga uwavye.

Twalekine ne wakwane swinya imikalile yawifile. Paponye napefile kwe Yehova nu mwezo wane wonsinye. Nanti acakuti papisile imyaka 20, natalisile ukusambilila Baibolo naswinya. Pe yoyo impindi lyo e tata wafwa, swinya e mayo wabatizwa nukuwa Inte ya kwe Yehova.

Imiwele yane yapusine nkaninye na vino Baibolo ikalanda. Nomba pe yoyo impindi nalondesyanga ukuwa ne kampingu umuzima yino Baibolo yalandapo. Natalisile ukwelezya na maka ukuleka ukutukana nu kuleka ukufulwa zuwa. Nalesile ukucita uwuzelele, ukwizya indwizyo zyakusitika, ukumwesya ipaala, nukwiwila wano wanjinjizizye incito.

Wano nawombanga nawo watamanyile cino calenzile mpiluke vino nalinji. Pa myaka yitatu, wantunkanga ukuti ntalike na swinya ukucita iviwipe. Nga cakuti nacita vino nalesile ukucita ndi vino ukutukana, nanti ukukalipa, apano wivwanga icete awapunda nukuti: “Eya! Awili e Joe wino twamanya wee.” Candumanga nga nivwa yaa amazwi! I Nalolanga ngati naposilwe ukupiluka.

Kuno nawombanga kwavuzile nkaninye ivya misiku pa kompyuta na pa mapepala. Wano nawombanga nawo watumizyanyanga ivya misiku pa makompyuta, ndi naninye nacitanga kaali. Nelezizye ukuleka ukutamba ivya misiku, nomba wawunji wantunkanga ukuti ndavitamba. Nanenile wino wansambilizyanga Baibolo ukuti anjavwe. Pano nalondololanga vyonsinye vyoo wateyelezyanga nkaninye. Wawomvizye e Baibolo pakundanjizya vino ningacita pakuleka ukutamba ivya misiku, swiya wanenile ukuti ndapepa kwe Yehova cila wanda pakuti awanjavwa.​—Amalumbo 119:37.

Wanda wumwi nisile wano nawombanga nawo, walile wawunganga ponga, nawanenile ukuti wape ipaala awonsi wawili wano walondanga ukuleka wucakolwa. Wonsinye wakanile ukuti: “Tutanga tucite wowo! Amuno waa wakulwisya ukuleka ukumwa ipaala! Nawanenile ukuti “Naninye nkulwisya ukuleka ukutamba ivya misiku!” Ukufuma pe wulyanye uwanda wano nawombanga nawo waweni ukuti nalwisyanga ukuleka ukutama ivya misiku, acino walesile ukumpaticizizya ukutalika ukucita iviwipe.

Mukupita kwa mpindi, e Yehova wanjavwizye ukuleka ukutamba ivya misiku. Mu 1999 nabatizizwe nukuwa Inte ya kwe Yehova. Nakunzile nkaninye nkaninye amuno e Yehova wampile impindi iyakuti impilule imiwele yane swinya walenga imbe ni nsansa.

Nomba namanya umulandu wuno e Yehova wapatila ivintu iviwipe vino nakunzile ukucita pa mpindi intali. Pa mulandu wa kuti e Leza Amukwasi wa lukundo, walondanga ukuncinjilila ku ntazi zino umuntu angawa nazyo nga akutamba ivya misiku. Amazwi yano yawa pa Imilumbe 3:5, 6, ayacisinka, pakati: “Suwilanga mu Mfumu e Leza numwezo wako wonsi. Utize uwakweyuamila kwevino ukuti wayimanyila. Yizukanga Imfumu e Leza mwevyonsi vino ukuchita alikulanjizya inzila nzima.” Amazwi yano yawa mwe Baibolo yakatucinjilila swinya nga tukuyakonka tungawa ni nsansa.​—Amalumbo 1:1-3.

Kaali nayivwanga ngati nsine muntu, nakombela, nomba pe yoo impindi nkakwivwa icete swinya nawa ninsansa. Nasanguluka swinya nkakwivwa ukuti e Yehova wantetela nukuti akanjavwa. Mu 2000, natwite e Karolin, umwanaci umwina Klistu umuyembe swinya wino wakunda e Yehova ndi vino naninye namukunda. Mulupwa lwitu mwawa insansa. Twakunda ukuwa mwi wungwe lya kwe Leza ilisanguluke muno mwawa awanawitu wano wakunda insi yonsinye.