Tate yange ankho ukala ko Australia ailukila ko Alemanha mo 1949. Ahimbika okuovola ovilinga kotyilongo tyimwe tyitiwa Victória. Oko ngako ovo tate na me velinepela iya ame natyitwa mo 1953.

Pakala vala katutu, me yange ahimbika okulilongesa Ombimbiliya no Nombangi mba Jeova, ngotyo etyi nalongeswa Ombimbiliya puetyi ndyimututu anehetyilimbwa. Mahi, tate yange ankho kahande ongeleya naike. Ahimbika okukala nonya nokuhonga ovanthu, amonesa unene ononkhumbi me. Me atualako okuholama tyina alongeswa Ombimbiliya iya akala nohole netyi ankho alongeswa. Etyi Tate atundapo, me ahimbika okundongesa kumwe nomphange yange etyi ankho ekahi nokulilongesa. Etupopila konthele youye omupe pano pohi iya etulekesa oñgeni onthwe tupondola okueendela movitumino vio Mbimbiliya opo tukale nehambu.—Salmo 37:10, 29; Isaías 48:17.

Etyi natuula omanima 18, andyitundu meumbo mokonda yonya ya tate. Namphila ankho ndyityii okuti etyi Me ekahi nokulongeswa tyitunda mo Mbimbiliya, mahi nongotyo ankho hesukile natyo. Moluotyo, ame anahaendela muetyi me andongesa. Ame andyihimbika okuundapa omu mutunda olusi. Etyi natuula omanima 20, andyinepe. Omona wetu omukainthu wotyiveli watyitwa etyi palamba omanima etatu iya ame andyihimbika okuovola okunoñgonoka otyipuka patyi tyesukisa vali momuenyo wange. Ame ankho ndyityii okuti Ombimbiliya ipondola okukuatesako ombunga yetu, moluotyo andyihimbika okulilongesa Ombimbiliya no Nombangi mba Jeova. Mahi omukai wange ankho uyele Onombangi mba Jeova. Etyi naya keliongiyo liavo, omukai wange anumana unene iya amphopila okuti ndyina okuyekepo okulilongesa Ombimbiliya ine okuyekapo ombunga. Mokonda ankho nasoya, andyitavela komukai wange iya anahahande vali okutaleluapo no Nombangi mba Jeova. Konyima, andyilivele onombei mokonda yovipuka ankho ndyilinga viapenga, ngwe ankho ndyii etyi tyaviuka netyi tyapenga.

Nthiki imwe, ava tuundapa navo avanthyongiliya okutala ovipuka vihongiliya okulinga ovinepo ovivi. Atyitukalesa nomahando omavi, atyinkhalesa omapita iya andyisala nomalusoke apenga, andyilivele onombei. Andyihinangela etyi ankho ndyilongeswa Ombimbiliya, ame ankho ndyityii umwe nawa okuti Huku upondola okumonesa ononkhumbi. Mahi mokonda ankho otyipuka tyokutala omalutalatu apenga tyikahi nokuliyawisa, moluotyo novituwa viange viokutala ovivi aviliyawisa. Mokueenda kuononthiki pahe atyikala otyinthyiliyo tyange.

Etyi palamba omanima 20 ankho omalusoke ange ekahi kokule novitumino Viombimbiliya me ankho andongesa. Ovituwa viange ankho vilekesa ovipuka ndyipaka momutima wange. Onkhalelo yange yokupopia  ankho yasila iya ankho ndyihole vala ovinyano viovinepo viasila. Omalusoke ange ankho pahe ayembela kokulinga ovinepo ovivi. Namphila ankho ndyina omukai wange, mahi ankho ndyeenda vali novakai ovakuavo. Nthiki imwe andyilitalela motyilivandyelo andyisoko iya andyilipopi okuti: “Ame hikuhande vali.” Ankho ndyilihole umwe, mahi pahe ankho hilihande vali.

Otyinepo tyange atyihanyuka-po, omuenyo wange aukala ngotyikutu tyatandauka. Andyilikuambela ku Jeova nomutima wange auho. Andyihimbika okulilongesa vali Ombimbiliya, namphila nakala omanima 20 tyehelilongesa. Pomuvo opo tate yange ankho wanyimale iya me ankho Ombangi ya Jeova.

Mokonda yovipuka ankho ndyilinga, ankho ovitumino Viombimbiliya kavikahi vali momuenyo wange. Mahi pomuvo opo ame ankho natokola okuovola okukala vali nombembwa momalusoke ange ngaa Ombimbiliya yalaa. Andyisoko okupilulula ovipuka ndyipopia nokulityilika okunumana liwa. Tupu andyitokola kuyekapo omuenyo wouheha ankho natyinda, andyiyekepo okuyumba omawela onombongo, andyiyekepo okunwa unene iya tupu andyiyekepo okuvaka omuhona wange.

Ava ndyiundapa navo ankho kavetyii omokonda yatyi ankho nahandela okulinga omapiluluko oo aeho. Mokueenda kuomanima etatu, ankho vahanda ndyilinge vali ovipuka ankho nalingile kohale. Inkha nakondokele vala katutu konyima, ñgeno nahimbika vali okukala notyituwa tyokunumana liwa, nokupopia ovipuka ovivi iya ngwe ñgeno vatwa ondolo, avati: “Halililiii! Joe wakondoka.” Onondaka ombo ñgeno mbandeva unene! Pamwe ankho nkhele ndyilinga oviponyo.

Kovilinga viange ankho kueyula vala ovipuka vihongiliya okulinga ovinepo ovivi, tyilinge mono kombutadole iya nomalutalatu. Ava ankho tuundapa navo apeho ankho vapaka omalutalatu apenga monokomputadole, ngaa ame ankho ndyikala nao potete. Ame ankho natokola okuyekapo onkhalelo ombi, mahi vakuetu ankho valinga atyiho opo vathyongiliya okulinga vali ovivi. Ame andyikondoka komunthu ankho undongesa Ombimbiliya opo amphameke. Noumphua-lundo anthehelela nawa atyiho ankho ndyikahi nokupopia. Nono testu mbo Mbombimbiliya, andekesa oñgeni mandyifindi ovituwa viange ovivi, iya amphameka opo ndyiimbuke ekuateso lia Jeova mokutualako nokulikuambela.​—Salmo 119:37.

Nthiki imwe, andyiihanwa keliongiyo limwe kovilinga vietu. Etyi ankho veliongiya, ame andyivepopila okuti avelei ovalume vevali ononkholwa ono selevesa onombali ou ike ou ike. Vakuetu avetyiyala avapopi okuti: “Ove kupondola okulinga ngotyo! Mukwe vetyiliya okunwa unene!” Ame andyivepopila okuti: “Ame ndyityivila okunwa oselevesa ike.” Okutuka opo okuenda nokomutwe, ovalume ovo avanoñgonoka ononkhono ankho ndyikahi nokulinga mbokuyekapo okutala ovipuka vihongiliya okulinga ovinepo ovivi iya avahimbika okutyindila opo ndyivilinge vali ovivi.

Momuvo omo, nekuateso lia Jeova, andyityivili okufinda otyituwa tyokutala ovipuka vihongiliya okulinga ovinepo ovivi. Mo 1999, andyimatisalwa, andyikala Ombangi ya Jeova, ame andyihambukwa unene iya ndyipandula omphitilo yavali nakala vali nayo opo ndyikale nehambu nokukala omusukuki.

Ame pahe netyinoñgonoka omokonda yatyi Jeova ankho eyelele ovipuka ankho ndyilinga kohale. Mokonda Jeova o Tate yetu woluembia, wakala ondyakulilo yange, andyamena kokutala ovipuka vihongiliya okulinga ovinepo ovivi. Onondaka mbukahi mu Provérbios 3:5, 6 ombotyotyili! Oversikulu oyo yapopia okuti: “Yumba onthumbi mu Jeova nomutima wove auho, uhapamene menoñgonoko liove muene. Landula ehongolelo liae monondyila mbove ambuho, opo aviukise onomphai mbove.” Ovitumino Viombimbiliya kavituamena vala, mahi tupu vituetela ouwa.—Salmo 1:1-3.

Kohale ankho hilihande, mahi pehepano ndyilihole iya ndyina ombembwa momutima. Pehepano ndyina omuenyo wasukuka iya ndyityii okuti Jeova wandyevela ononkhali mbange iya unkhuatesako. Menima lio 2000, andyinepe Karolin omuhikuena umwe omuwa Omukristau, uhole Jeova ngaame. Meumbo lietu pahe muna ombembwa. Tupu tuna elao liokulinga onthele yeongano liasukuka, kumwe novakuatate Ovakristau vekahi mouye auho.