Ọsẹ mẹ ọ kwa nẹ Australia riẹ Germany ẹgbukpe 1949. Ọ kware nọ sabu mẹrẹn iruo, jeghwai rhirhiẹ amwa re se Victoria. Avwaye yọ rọnmọ izu me, ne ji vwiẹ mẹ ẹgbukpe 1953.

Ẹgbukpe ezẹko a vrẹn hin, izu mẹ no yono Baibol na rhẹ Iseri Jehova, ọke ukaro mi ji vwo omamerhomẹ kpahen iyono ri ha uvuẹn Baibol na. Ọrẹn, ẹga owuorowu o vwo je ọsẹ mẹ-ẹ. No vwobọrhọ ozighi egbe, ji guọlọ taghene oborẹ ọ tare ye ne ruo, ofẹn ọsẹ me no mwu izu mẹ. Izu mẹ no se Baibol na uvuẹn odjahen ji vwo ẹguọlọ kpahen iyono ri ha uvuẹn Baibol na. Ọsẹ mẹ orho nẹ oghwa, izu mẹ no yono ame kpahen oborẹ ọ yono nẹ Baibol na rhe. Izu mẹ ọ ta rẹn ame kpahen paradais uvuẹn otọrakpọ na, ọrhẹ oborẹ ame ine ru vwo omamerhomẹ ame i rha nyalele irhi ri ha uvuẹn Baibol na.—Psalm 37:10, 29; Isaiah 48:17.

Ọke mie te ẹgbukpe 18, ni me vwo ẹhẹn mi ne nẹ oghwa na fọkiẹ orharhere uruemru ọsẹ mẹ. Dedevwo mi vwo imwẹro kpahen oborẹ izu mẹ o yonirin mẹ ni Baibol na rhe, ọrẹn mia ha ukẹro ọghoghanren nie-e. Omarana, mi vwa rha ha oborẹ mi yonorin na ruiruo-o. Ni mi yono owian ẹlẹtriki uvuẹn ekete ra torhẹ ikoru. Ni mi rọnmọren ọke mia ha ẹgbukpe 20. Ẹgbukpe esa a vrẹn hin, ame ni vwiẹ ọmọ ame ọgbọtọ ọrukaro, ni mi me rhe oborẹ ọ mai ghanren uvuẹn akpenyerẹn mẹ. Mi rheri taghene Baibol na ọvo yọ nọ sabu ha userhumu rẹn ekrun mẹ, omarana, ni mi tuẹn uyono Baibol rhọ rhẹ Iseri Jehova. Ọrẹn, ane mẹ o vwo omamerhomẹ kpahen Iseri Jehova-a. Ọke mie riẹ uyono Iseri Jehova owu, ane mẹ nọ ta mẹ ne mi djẹ sẹ mi na dobọ uyono Baibol ji, yanghene mi na nyajẹ ekrun mẹ vwo. Omarana, mi vwe rhe lele Iseri Jehova yono-o. Ọke oru, nọ dare mẹ taghene mie lele izede ọgbagba na-a.

Ẹdẹ owu, ohworho mẹmẹ rhẹ ọye a gba wian uvuẹn ekete owu, no dje ifoto ihworho ri banfirhọ mẹ. Oborẹ mi mẹrẹn uvuien o serhọ kakaka-a, ẹhẹn mẹ no kpokpi mẹ. Ọke mia karorhọ oborẹ mi yono ni Baibol na, mi rheri taghene Osolobrugwẹ ọnọ ha oja re mẹ. Ọrẹn ni mi vwo uruemru ri mie nẹ ifoto ihworho ri banfirhọ ọke ephian, mi vwa rha ha ukẹro rọ sọre nie-e. Ọke oru, nọ mo rhiẹ uruemru mẹ.

Uvwre ẹgbukpe 20 erọrọ, ni mi nyajẹ oborẹ izu mẹ o yonirin mẹ vwo. Uruemru mẹ no mo wene omamọ. Erharhere ẹmro ọvo ye nẹ unu mẹ sa, ẹmro ri ta kpahen uruemru ọfanrhiẹn ọvo yi mia ta. Oruru ehware mẹ nọ mọ gbanhon omamọ. Dedevwo mẹmẹ rhẹ ane i gba havwiẹ, ọrẹn mia ji kpare emẹse erọrọ. Ẹdẹ owu ni mi ni oma mẹ uvuẹn ujegbe, ji ta rẹn oma mẹ taghene, ‘Mie rhe fiemru-u.’ Ni mie vwo utuoma kpahen omamẹ ukperẹ ono je mẹ.

Orọnmo mẹ nọ fanren, akpọ mẹ nọ yanghanren. Omarana, ni mi nẹrhomo rhẹ ọsoso ọmudu mẹ vwe i Jehova. Ni mi rharhumu tuẹn uyono Baibol rhọ, dedevwo ọ vrẹn ẹgbukpe uze ne. Uvwrọke ọrana ọsẹ mẹ o hwu ne, izu mẹ o ji bromarhame rhiẹ Oseri Jehova ne.

Ewene ọduado no mo rhirhiẹ ye ọke mia nyalele irhi ri ha Baibol na. Ọrẹn ọke ọnana, ni mi brorhiẹn mi ne vwo ufuoma ri Baibol na o ve kpahen. Ni mi dobọ erharhere ẹmro ẹta ji, ji suẹn ekwẹre mẹ. Mi ji brorhiẹn mi na nyajẹ orharhere akpọ mie nyerẹn vwo, dobọ ibikoro efi, enyo ẹda vrẹn oma, ji dobọ uhieso ji.

Ihworho mẹmẹ rhẹ aye a gba wian e rhe oborẹ ọsoriẹ mie ruẹ aruẹ ewene enana-a. Uvwre ẹgbukpe esa, aye e kpokpi mẹ taghene mi rharhumu vwobọrhọ erharhere iruemru erana. Ẹhẹn mẹ orho seriotọre uvuẹn erhirhiẹ ezẹko, ji tuekwẹre ibiesuọn, yanghene tẹmro ezẹko ri vwe serhọ, aye ni na ta ji chẹẹ: “Epabo! Baghini Joe ọ ji ghwẹriẹ bi-i.” Ẹmro erana a hobọte mẹ omamọ! Ni mie roro taghene mi sabu fiẹkparobọ-ọ.

Ekete iruo mẹ ọ vuọnren rhẹ ifoto yanghene ughe ihworho ri banfirhọ, te eri ha uvuẹn ifonu ọrhẹ ere fomu phia. Ihworho mẹmẹ rhẹ aye a gba wian, e dje erharhere ifoto vwe mẹ nyoma ikọmputa. Mia damoma mi ne tiobọnu aye, ọrẹn nọ họhọre taghene aye a guọlọ izede rẹ aye ina lẹrhe mẹ vwobọrhọ uruemru na. Ni mi nekpẹn userhumu mie ohworho ro yoni mẹ i Baibol na. Nọ dabu kerhọ mẹ ọke mia ta oborẹ ọ ha ẹhẹn mẹ riẹn. Nọ dabu dje ekete sansan nẹ uvuẹn Baibol na mẹ, no djẹ oborẹ mi ne ru tiobọnu uruemru na, nọ ji ta mẹ ni mi nekpẹn userhumu i Jehova nyoma mi na nẹrhomo riẹn nẹ ẹhẹn rhe.—Psalm 119:37.

Ẹdẹ owu ni mi se ihworho mẹmẹ rhẹ aye a gba wian siyẹ. Ọke aye ephian a rhe, ni mi ta rẹn aye nẹ aye i ha enyo rẹn ehworhare awanva ra damoma aye ine tiobọnie inyo ẹda. Aye ni tare taghene: “Ame i sabu ruie-e! Nime ehworhare enana a damoma aye ine tiobọnẹ uruemru ọrana!” Ni mi tare: “Omaran ji te omẹmẹ.” Nẹ ọke ọrana nyarhẹn, ehworhare na ni ma mẹrẹnvwrurhe taghene mia damoma mi ne tioma mẹ nẹ uruemru ọrana, aye erhe kpokpi mẹ ghwomara-an.

Ọrẹn nyoma userhumu i Jehova, ni mi sabu fiẹ uruemru ọrana kparobọ. Ni mi bromarhame rhiẹ Oseri Jehova ẹgbukpe 1999, oma ọ merhenren mẹ taghene mi vwo uphẹn ọrọrọ mia rharhumu nyerakpọ ro vwo omamerhomẹ.

Vwana, mi vwẹruọ oborẹ ọsoriẹ i Jehova o vwo utuoma kpahen ekwakwa mi vwo ẹguọlọ kpahen ọke jijiri rhe na. Jerẹ Ọsẹ ro vwo ẹguọlọ, Jehova ọ guọlọre taghene mi tiomanẹ ekwakwa ri na ha ẹkuọn mẹ. Ọnana o serhọ rhẹ ẹmro rọ ha uvuẹn Proverbs 3:5, 6! Oghwẹmro na ọrhọ ta: “Hẹroso i Jehova rhẹ ọsoso ọmudu ọnọ, wu na hẹroso irherhe omobọ ọnọ-ọ. Uvuẹn izede ọnọ ephian karorhọ ye, ọye no no ruẹ izede ọnọ phiọn.” Irhi ri ha uvuẹn i Baibol na a sẹrorẹ ọwan, ji lẹrhẹ ohworho fiẹkparobọ.—Psalm 1:1-3.

Ẹgbukpe ri vrẹnren na, mie ni omamẹ taghene mie fiemru-u, ọrẹn vwana mi vwo obọdẹn ufuoma ne. Mie ji nyerẹn omamọ akpọ, mi ji mẹrẹn ẹharhomu i Jehova ne ọrhẹ obẹhatua ye. Ni mi rọnmọ i Karolin ẹgbukpe 2000, rọ dabu rhiẹ omamọ Olele Kristi ro vwo ẹguọlọ kpahen Jehova jerẹ oborẹ mi ji vwo ẹguọlọ kpahiẹn. Vwana ufuoma ọ ha uvuẹn oghwa ame ne. Oma ọ dabu merhen ame taghene ame e nyerẹn akpọ rọ fonron, ame i ji vwo obọdẹn ekrun ri vwo ẹguọlọ uvuẹn ekete ephian uvuẹn akpọ na.