Long 1949, dadi bilong mi lusim Germany and kam long Australia. Hem kam for waka long olketa mine and paoa station and hem stap long bush long Victoria. Gogo hem marit, and mi born long 1953.

Tu-thri year bihaen, mami bilong mi start studyim Bible witim Olketa Jehovah’s Witness, so mi herem olketa teaching long Bible taem mi barava smol. Bat dadi bilong mi hem heitim religion. Gogo hem savve raf, and mami barava fraetem hem. Mami gohed studyim Bible haed and hem laekem tumas wanem hem lanem. Taem Dadi no stap, hem storyim wanem hem lanem long mi and smol sista bilong mi. Hem storyim paradaes wea bae kamap long earth long future and sei mifala savve hapi sapos mifala followim wanem Bible talem.—Psalm 37:10, 29; Isaiah 48:17.

Taem mi 18 year, from dadi bilong mi raf tumas, mi go stap long difren ples. Nomata mi bilivim olketa samting from Bible wea mami storyim long mi, mi no tinghae long datwan. So mi nating followim wanem mi lanem. Mi electrician and mi waka long coal mine, and taem mi 20 year mi marit. Thrifala year bihaen, first gele bilong mitufala hem born, and mi start for ting raonem wanem nao important long laef bilong mi. Mi luksavve Bible savve helpem famili bilong mifala, so mi start for studyim Bible witim Olketa Jehovah’s Witness. Bat waef bilong mi heitim olketa Witness. Taem mi go long wanfala meeting bilong olketa, hem sei mi mas disaed, bae mi stop for study or bae mi go from famili. From mi feel olsem mi no wei nao, mi stop for study witim olketa Witness. Gogo samfala year bihaen, taem laef bilong mi hem no isi, mi luksavve wanem mi disaedem hem no stret.

Wanday, olketa wakfren bilong mi showim olketa rabis piksa long mi. Nomata datwan mekem mi feel nogud olsem mi laek for toroaot, hem switim mi tu. Hem barava pokem konsens bilong mi and mi feel guilty tumas. From mi savve finis long wanem Bible talem abaotem samting wea stret and no stret, mi tingse God bae panisim mi. Bat taem mi gohed for lukluk, mi start for getius. Gogo, mi evritaem lukluk long olketa rabis piksa.

For 20-fala year, mi duim olketa nogud samting wea no followim wanem mami teachim long mi. From mi evritaem lukluk long olketa rabis piksa, datwan affectim wei bilong mi. Mi savve  tok swear, mi laekem tumas for mekfani long olketa dirty samting, and mi no garem stretfala tingting abaotem sex. Nomata mi stap witim waef bilong mi, mi go witim olketa nara woman tu. Gogo, mi les long miseleva.

Gogo, marit bilong mi brekdaon and laef bilong mi nogud tumas. Then mi barava prea strong long Jehovah. Mi start for studyim moa Bible nomata mi no duim datwan for 20-fala year. Long datfala taem, dadi bilong mi dae finis, and mami bilong mi baptaes finis and kamap wanfala Jehovah’s Witness.

Wanem mi duim long laef bilong mi hem barava difren tumas from wanem Bible talem. Bat mi barava disaed strong for kasem gudfala konsens wea Bible storyim. Mi garem goal for lusim wei for tok swear and for kontrolem kros bilong mi. Mi disaed tu for lusim wei for durong, gambol, drink tumas, and steal from boss bilong mi.

Olketa wakfren bilong mi no minim why nao mi laek for changem wei bilong mi. For thrifala year olketa gohed pokem mi for duim moa olketa nogud samting. Sapos mi duim eni smol mistek olsem mi kros or tok swear, olketa singaot big and sei: “Hem nao ia! Really wei bilong hem nao ia!” Toktok bilong olketa mekem mi feel nogud tumas. Plande taem mi feel olsem hem hard tumas for mi winim diswan.

Long ples wea mi waka, olketa keepim staka rabis piksa long olketa computer, and olketa buk stap tu. Olketa wakfren bilong mi evritaem sharem olketa rabis piksa long computer, olsem mi tu duim bifor. Nomata mi traem best for change, olketa laekem tumas for switim mi for go bak long olketa wei bilong mi bifor. Mi askem man wea studyim Bible witim mi for helpem mi long diswan. Hem patient and lisin gud taem mi story long hem. Hem iusim samfala scripture long Bible for helpem mi deal witim problem bilong mi, and hem encouragem mi for prea evritaem for askem Jehovah for helpem mi.—Psalm 119:37.

Wanday, mi talem olketa wakfren mi laek story witim olketa. Taem evriwan hipap finis, mi talem olketa for givim beer for tufala man wea trae for lusim wei for depend long alcohol. Evriwan kros and sei: “Sei, iu laek hao long tufala? Tufala hia stragol for lusim alcohol!” Mi sei long olketa: “Iufala tok tru, and mi tu olsem tufala.” Start long datfala day, olketa luksavve mi stragol for lusim wei for lukluk long olketa rabis piksa and olketa no switim mi moa for duim datwan.

Gogo, from Jehovah barava helpem mi, mi lusim wei for lukluk long olketa rabis piksa. Long 1999, mi baptaes and kamap wanfala Jehovah’s Witness. Mi hapi tumas Jehovah givim mi nara chance moa for garem laef wea klin and hapi.

Distaem mi barava minim why Jehovah heitim olketa samting wea mi laekem tumas for longfala taem. From hem Dadi wea lovem mi, hem laek for protectim mi from olketa nogud samting wea kamaot from wei for lukluk long olketa rabis piksa. Toktok long Proverbs 3:5, 6 hem barava tru! Hem sei: “Trustim Jehovah long full heart bilong iu and no depend long savve bilong iuseleva. Tingim hem long evri samting wea iu duim, and hem nao bae showim iu stretfala wei for iu followim.” Olketa standard long Bible savve protectim iumi and hem savve mekem iumi hapi and garem gudfala laef.—Psalm 1:1-3.

Long bifor, mi barava heitim and ting daonem miseleva, bat distaem mi garem gudfala konsens. Mi lusim olketa nogud samting wea mi duim bifor and mi savve Jehovah forgivim mi and mi luksavve hem sapotim mi. Long year 2000, mi maritim Karolin, wanfala naes Christian sista wea barava lovem Jehovah olsem mi. Mitufala stap gud tugeta and hapi. Olketa Jehovah’s Witness stap evriwea long world and olketa klin and showimaot love. Mifala barava hapi for stap witim olketa.