Kunyima kwa bipwa bipela, nyinami babangile kulonga Bible na Batemwe ba Yehowa, kubapu malongyesha a Bible abaadi ashale bu kitentekyesho kwandi. Anka, nshami tabaadi akumina kipwilo su nkimune nya. Baadi na kikiso kikile, binobino nyinami nkubanga kutshina. Aye kubanga kulonga Bible mu bufyembufye na kukumina kulonga Bible ngofu. Nsaa ayituku papa, maman baadi etulongyesha nami na nkashanami. Baadi mwitulongyeshe pabitale mulayilo wa Mpaladiso pa nsenga na miloo yatupete nsaa yatutumikila miiya ya mu Bible.​—Misambo 37:10, 29; Yeeshaya 48:17.

Panalombeeshe bipwa 18, nadi mukatukye ku nshibo mwanda wa bukyelo bwa papa. Sunga mbinaadi mukumine myanda ya mu Bible ibabadi bandongyeshe kwi mama, ntshi mwiyate na muulo nya. Naadi mukutwe kwiyitumikila. Nambangile kufuba ku myanda ya kaalo ka sembwe mu mbalo ya babundulaa sharbon. Panankubeeshe bipwa 20, nadi mwibakile. Kunyima kwa bipwa bisatu atwe nkutanda mwana a kumpala mukashi, ami nkubanga kutaluula myanda i na muulo mu muwa wande. Naadi nauku’shi Bible e kukwasha kifuko kyande, ngi bwakinyi nabangile kulonga Bible na Temwe a Yehowa. Kadi mukashi’ande baadi mushikwe Batemwe ba Yehowa ngofu. Panatwelele mususa wa kumpala mu bisangilo byabo, mukashi’ande baadi munsopeshe​—andungula’shi nsangule kimune,su nakumiina ngimikye kulonga Bible su napele nkatukye ku nshibo. Mbidi ibambofwile, ami nkukookyela ku mayi aaye na kutshiba kipwano na Batemwe ba Yehowa. Kunyima naadi mwinyongole ngofu p’ami kuleka ino myanda inaadi mupwe kumona’shi ibuwa.

Dingi efuku, ungi mwina mudimo nami bandesheshe kifwatulo kya pornografi. Bibaadi abimpa muloo, ingi nsaa namu abinkwatshisha moo, na bibandekyele na kinyongwa kibungi. Nsaa yantentekyesha myanda inalongyele mu Bible, naadi nauku’shi Efile Mukulu anyooko binyibinyi. Kadi bu bibaabadi abandesha bifwatulo bya myanda ibubi nsaa na nsaa, binangu byande bibashintulukile pabitale pornografi. Kunyima kwa mafuku naadi mwipaane ngofu mu kwiyibandila.

Munda mwa bipwa makumi abidi, naadi mwiyine mu kukita myanda  ibaabadi abandongyesha’shi ibubi kwi mama. Mwikeelo wande ubaadi auleesha myanda inaadi natwesha mu binangu. Nabangile kwikala na ngakwilo ebubi, na kufula miseku ibubi. Nabangile kwikala na mweneno ebubi pabitale kutamabuka kwa lusandji. Sunga mbinaadi pamune na mukashi ande, nabangile kutambuka masandji na bangi bakashi. Dingi efuku nelobele mu lumweno ami nkwamba’shi: ‘Ntshi mukufule’mi.’ Pamutwe pa kwinemeka ami nabeene, naadi nemono bu muntu abisumanga.

Dibaka dyetu dibafwile, na nshalelo ande baadi mulwile. Kunyima nabangile kuteka Yehowa n’eshimba dimune. Nabangile kulonga dingi Bible sunga mbinaadi mwimikye takudi bipwa makumi abidi. Pabafwile papa mu aa mafuku, mama baadi mupwe kubatshishibwa bu Temwe a Yehowa.

Beena mudimo nami tababaadi abapusha bwakinyi naadi nashintuula mwikeelo wande bino nya. Kunyima kwa bipwa bisatu, bababangile kunsukuma dingi bwa’shi ngalushe wawa mwikeelo wande wa kala. Su nalukiile mu wanka su nkapindji kapeela, bu kwikala na nsungu ikilekile sunga kwakula myanda ya butesha, babadya kwamba’shi: “Ah! mulopwe baluka.” Ano mayi abadya kuntapa kwishimba ngofu! Naadi namono nka bu’mi akabilwa.

Mbalo inaadi nafubila ibaadi yule na bintu bya pornografi, mu bintu bikobolwe mu bisashi na mu mikanda. Beena mudimo nami babaadi na kyubishi kya kwitumisheena bifwanyi mu ma ordinatere, bu binaadi nakitshi kumpala. Naadi natompo kwibasuuka bwa kupela kukwatshika maalwa, anka babaadi nka na kitshibilo kya kumbeleka bwa’shi mpone. Nalungwile muntu anaadi nalongo naye Bible bwa’shi ankwashe na kunkankamika. Bantemeeshe na lwishinko looso nsaa inaadi namulondela myanda. Ku bukwashi bwa maverse a mu Bible, bandesheshe bya kukambila bu nkolwenkolwe, na kunkankamika bwandya kukimba bukwashi bwa Yehowa nsaa yooso mu luteko.​—Misambo 119:37.

Dingi efuku natwesheshe kisangilo na beena mudimo nami. Nsaa ibatwibungile, nebalungwile’shi bape bantu babidi ba munkatshi mwabo babaadi na maladi a bunkolwenkolwe mulangi wa maalwa. Bantu booso babelele kiila bapela’shi: “Tokumanga wawa mwanda! Bano bantu bakwete kwitatshisha bwa kupela bunkolwenkolwe!” Ami namu nebalulwile’shi: “Eyendo, n’ami namu.” Kubanga nka dyadya efuku, baaba bantu babashingulwile’shi nkwete kwitatshisha bwa kuleka kubandila pornografi na kukolwa kwa maalwa na dingi tambantakule bwa kwalukiila ku mwikeelo wande wa kala nya.

Kubanga nka paapa, na bukwashi bwa Yehowa, nemukambile kyubishi kya kubandila pornografi. Naadi mubatshishibwe na kwikala Temwe a Yehowa mu kipwa kya 1999, nekeele na lutumbu lwibungi mwanda napetele mwabi wa kwikala dingi na nshaleelo ebuwa e na muloo.

Binobino nashinguula bwakinyi Yehowa mmushikwe bintu binaadi mufule munda mwa mafuku ebungi. Bu byadi Nshe bana e na kifulo, baadi akumiina kunkumbila masaku aatuukila ku pornografi. Mayi e mu mukanda wa Nkindji 3:5, 6 nga binyibinyi! Uno verse amba’shi: “Kulupila kwi Yehowa n’eshimba dyoobe dyooso, olekye kulonda binangu byoobe’be nabeene. Mu mwikeelo oobe ooso omutentekyeshe, aye alumbuula mashinda oobe ooso.” Miiya ya mu Bible ta ngikale nka penda bu bulami kwandi nya, kadi ngintuule na mu bulungantu.​—Misambo 1:1-3.