Ngemnyaka wanga-1949 babe watfutsa e-Germany walibangisa e-Australia. Abeyofuna umsebenti emayini nasenkampaneni lephehla gesi wase uhlala endzaweni yasemakhaya e-Victoria. Ngulapho ashada khona namake futsi ngase ngiyatalwa nga-1953.

Eminyakeni lembalwa leyalandzela, make wacala kufundza liBhayibheli naBoFakazi BaJehova, kungako timfundziso teliBhayibheli ngatati kusukela ngisemncane. Nome kunjalo, babe abengafuni lutfo nje ngentfo lokutsiwa yinkholo. Wacala kuba nebudlova futsi abesiphatsa ngesibhuku lokwenta make wamesaba kakhulu. Wachubeka make nekufundza liBhayibheli emasitseleni futsi wase ucala kutitsandza timfundziso talo. Bekutsi nakangekho Babe, asifundzise loko lakufundzile sinadzadzewetfu. Wasitjela ngekuphila emhlabeni lomusha lowentiwe lipharadisi nekutsi singajabula nasingaphila ngetimfundziso teliBhayibheli.​—Tihlabelelo 37:10, 29; Isaya 48:17.

Ngatsi nangineminyaka lengu-18 budzala, ngaphoceleleka kutsi ngihambe ekhaya ngenca yebudlova bababe. Nanobe ngangikukholelwa loko make bekangifundzise kona eBhayibhelini, angizange ngibubone bumcoka bako futsi loko kwangenta ngehluleka kuphila ngako. Ngacala kusebenta ngaba ngumagesana etimayini temalahle. Ngashada nangineminyaka lengu-20. Indvodzakati yetfu yekucala yatalwa nasekuphele iminyaka lemitsatfu sishadile futsi ngase ngicala kucabangisisa ngetintfo letimcoka emphilweni yami. Bengati kutsi liBhayibheli lingawusita umndeni wetfu, ngako ngase ngicala kufundza liBhayibheli nalomunye Fakazi WaJehova. Kodvwa umkami abengabafuni nje sanhlobo BoFakazi. Lapho ngiya kulomunye wemihlangano yabo, watsi angiyekele kufundza liBhayibheli noma ngiphume ngiphele emtini wetfu. Ngavele ngabona kutsi kute lijika nelikona, ngancuma kuyekela kutihlanganisa naBoFakazi. Ngekuhamba kwesikhatsi ngatisola ngekwehluleka kwami kwenta loko bengikwati kutsi kukahle.

Ngalelinye lilanga lengisebenta nabo bangikhombisa titfombe letingcolile. Bekungijabulisa kutibuka kodvwa betenyanyeka tiphindze tingishiye ngidliwa ngunembeza. Nangikhumbula loko bengikufundze eBhayibhelini, bengiciniseka kutsi Nkulunkulu utangijezisa ngalebengikwenta. Njengobe ngichubeka ngibuka letitfombe, ngabese ngiyatitsandza futsi ngekuhamba kwesikhatsi tangingena engatini.

Eminyakeni lengu-20 leyalandzela, kutiphatsa kwami besekwehluke  kakhulu kuloko bekangifundzise kona make. Kutiphatsa kwami kwakukhombisa loko lebengihlale ngikubuka. Bengetfukana futsi ngitsandza kwenta emahlaya langcolile. Kuya ecansini ngase ngikutsatsa njengentfo lengingayenta nanoma ngubani. Bengihlala nemkami kodvwa nganginabomakhwapheni. Ngalelinye lilanga ngacabanga ngalemikhuba lemibi lebengiyenta ngeva ngitenyanya futsi kwasekungiphelele nekutihlonipha.

Umshado wami waphela futsi imphilo yami beyingasajabulisi. Ngathandaza kuJehova ngatfulula yonkhe inhlitiyo yami. Ngaphindze ngafundza liBhayibheli naBoFakazi nanobe kwase kuphele iminyaka lengu-20 ngayekela. Ngaleso sikhatsi babe abesashonile, make asanguFakazi WaJehova lobhajatisiwe.

Kwakunemehluko lomkhulu emkhatsini wemphilo bengiyiphila naloko lokufundziswa liBhayibheli. Kodvwa besengitimisele kutfola kuthula kwengcondvo loko liBhayibheli lelikutsembisako. Ngatimisela kulwisana nentfukutselo yami kanye nekuyekela inhlamba. Ngancuma nekushiya indlela lembi ngekutsi ngiyekele kutiphatsa kabi ngetelicansi, kugembula, kunatsa kakhulu kanye nekweba emsebentini.

Lebengisebenta nabo bebangacondzi kutsi ngilwentelani lolushintjo lolungaka. Kwaphela iminyaka lemitsatfu solo bangicindzetela kutsi ngibuyele etindleleni letimbi lebesengitishiyile. Nakwentekile ngashiyeka kancane nje ngekutsi ngitfukutsele kakhulu noma ngisho emagama lanenhlamba, bebavele bajabule bese batsi: “Ya, nango-ke Joe lesimatiko!” Abengivisa buhlungu kakhulu lawo mavi futsi abengenta ngitive ngisehluleki.

Emsebentini kwakugcwele titfombe letikhombisa kungcola. Bantfu lebengisebenta nabo bebavame kutfumelelana letitfombe letingcolile ngema-computer abo njengobe nami bengenta. Bengetama kuwuncoba lomkhuba wekutsandza titfombe letikhombisa kungcola kodvwa bebenta konkhe labangakwenta kute bangehlulekise. Ngacela lusito nesikhutsato kulona lebengifundza naye liBhayibheli. Wangilalela ngesineke nangimtfulela sifuba sami. Asebentisa liBhayibheli, wangibonisa indlela yekulwisana nalemikhuba waphindze wangikhutsata kutsi ngichubeke ngicela lusito kuJehova ngemthandazo.​—Tihlabelelo 119:37.

Ngalelinye lilanga ngabita umhlangano nalabo lebengisebenta nabo. Batsi nasebahleti ngabatjela kutsi abatsatse tjwala babunike lamadvodza lamabili labesafuna kuyekela kuba tidzakwa. Bamemeta batsi: “Ngeke sesicale sikwente loko. Lamadvodza alwa kamatima kuze ayekele kuba tidzakwa!” Ngabaphendvula ngatsi: “Nicinisile, nami-ke nguloko lengikwentako.” Kusukela ngalelolanga, bacala kusihlonipha sincumo sami sekulwa kamatima nalomkhuba wekutsandza titfombe letikhombisa kungcola futsi bayekela kungicindzetela kutsi ngibuyele etindleleni tami lebesengitishiyile.

Ngekuhamba kwesikhatsi, Jehova wangisita ngaphumelela ekulwisaneni nalomkhuba wekutsandza titfombe letikhombisa kungcola. Ngemnyaka wanga-1999, ngabhajatiswa ngaba nguFakazi WaJehova futsi ngakujabulela kutfola litfuba lekuphindze ngiphile imphilo lehlobile nalejabulisako.

Nyalo sengiyacondza kutsi kungani Jehova atitondza letintfo lebengisolo ngititsandza. Njengobe anguBabe lositsandzako bekafuna kungivikela ekulinyatweni nguletitfombe letikhombisa kungcola. Ngibubonile buciniso balamavi lakuTaga 3:5, 6 latsi: “Tsemba Simakadze ngayo yonkhe inhlitiyo yakho, ungeyami ekwatini kwakho. Matise kuko konkhe lokwentako, yena uyakucondzisa tindlela takho.” Kuphila ngekuvumelana netimiso teliBhayibheli, akusivikeli nje kuphela kodvwa kuphindze kusente siphumelele.​—Tihlabelelo 1:1-3.

Esikhatsini lesendlulile bengitenyanya kodvwa nyalo sengiyatihlonipha futsi senginekuthula kwangekhatsi. Ngiphila imphilo lehlantekile futsi ngiyativela kutsi Jehova ungicolele nekutsi uyangisita. Ngemnyaka wa-2000, ngashada naKarolin intfombi lenhle letsandza Jehova njengoba nje nami ngimtsandza. Likhaya letfu liyindzawo yekuthula. Sikujabulela kakhulu kuba yincenye yebazalwane labangemaKhristu emhlabeni wonkhe, labahlantekile futsi labatsandzanako.