Isenyowe akafuruka kuruga Bugirimaani yagenda Australia omu 1949. Akaba naserra omulimo omu kampuni z’ebirombe n’amasanyarazi kandi akaikara omu Victoria omu bicweka by’ebyaro. Obuyali oku, akaswera nyina nyowe kandi nkazaarwa omu 1953.

Hanyuma y’emyaka nke, nyina nyowe akatandika kwega Baibuli n’Abakaiso ba Yahwe, nahabweki omu myaka yange ey’obuto nkaba manyire amananu. Baitu, isenyowe tiyagonzaaga ediini yoona. Akafooka muntu ow’arukugonza kurwana, ow’arukutiinisa kandi nyina nyowe yamutiinaga muno. Nyina nyowe akagumizaamu nayega Baibuli omu nsiita, kandi akagonza eby’akaba nayega. Isenyowe obuyabaga ataroho, nyina itwe yagambiraga nyowe na munyaanya nyowe ha bintu ebyayegere. Akatugambiraho ensi empyaka, n’omulingo tusobora kuba n’okusemererwa kakuba tuhondera endengo za Baibuli ezirukukwata ha ngeso.​—Zabuli 37:10, 29; Isaya 48:17.

Obunahikize emyaka 18, nkahurra nahambirizibwa kuruga muka habwokuba isenyowe yagonzaaga kurwana. N’obukiraaba ngu nkaba ninyikiriza ebintu nyina nyowe yanyegeseze, ntarole mugaso gwabyo. Nahabweki ntabigendereho omu bwomeezi bwange. Nkatandiika kukora omu by’amasanyarazi omu birombe. Obunahikize emyaka 20, nkaswera. Hanyuma y’emyaka esatu tukazaara muhara waitu ow’okubanza, kandi nkatandika kutekerezaaho ebintu ebikuru omu bwomeezi bwange. Nkaba nkimanyire ngu Baibuli ekaba n’esobora kukonyera eka yange, nahabweki nkatandika kwega Baibuli n’omu h’Abakaiso ba Yahwe. Baitu mukazi wange akaba atarukugonza Abakaiso ba Yahwe. Obunagenzere omu rumu ha nsorrokano zaabo, akangambira ngu ncwemu kimu​—ndeke kwega Baibuli rundi eka ngirugemu. Nkahurra mpoirwemu amaani, kandi nakora eky’akaba n’agonza, nkecwaho Abakaiso ba Yahwe. Hanyuma, nkeijukya habwaki ntaragumiizeemu kukora ekintu nkaba mmanyire ngu kihikire.

Kiro kimu, abakozi bataahi bange bakanyoleka ebisisani by’orwanju. Byansemezaaga baitu ha murundi nugwo gumu nibindetera kwenuga, hamu n’omuntu wange ow’omunda kundumiiriza. Kusigikirra ka bintu nkaba nyegere omu Baibuli, nkaba nkimanyire ngu Ruhanga naija kunfubira. Baitu obunayeyongiire kurora ebisisani eby’orwanju, entekereza yange hali byo ekagenda n’ehinduka. Hanyuma y’akasumi, nkeyongerra kimu kubigonza.

Omu myaka 20 eyahondiireho, nkeyongera kwirra hara n’emisingi nyina nyowe yali nalengaho kunyegesa. Engeso zange zayolekaga ebyabaga biri omu bitekerezo byange. Nkaba nimbaza kubi, kandi ninsekesa abantu n’ebintu ebirukuseegura. Nkatunga entekereza etahikire ha kuterana. N’obukiraaba ngu nkaba ninyikara na mukazi wange, nasiihanaga n’abakazi abandi. Kiro kimu nkerora omu ndolerwamu kandi nayegambira nti: ‘Tindukukugonza na kati.’ Omu kiikaro ky’okweha ekitiinisa nkaba ninyenuga.

Obuswere bwange bukahwaho, kandi obwomeezi bwange bukaba busiisikaire. Nkasaba Yahwe n’omutima gwange gwona. Kandi nayongera natandika kwega Baibuli, n’obukiraaba nkaba mbirugireho kumara emyaka 20. Kasumi ako isenyowe akaba afiire, kandi nyina nyowe akaba abatiziibwe nk’omu h’Abakaiso ba Yahwe.

Hakaba haroho embaganiza y’amaani muno hagati y’ebintu ebinkaba ninkora n’ebi Baibuli eby’eyegesa. Baitu ha murundi gunu nkaba maliriire kutunga obusinge bw’omu bitekerezo Baibuli obw’eraganiza. Nkatandika kusemeza omulingo nabazaamuga n’okulinda ekiniga kyange. Ekindi nkalekeraho kusiihana, kuteera ejaara, kunywa amaarwa ekihinguraine, n’okwiba mukama wange.

Abanakoraga nabo batetegereze ensonga habwaki nkaba ningonza kukora empindahinduka ez’amaani nk’ezi. Kumara emyaka esatu, baalengahoga butoosa kungarrayo omu ngeso zange eza kara. Kandi obunagarukirraga, obundi nkabaza ekigambo ekibi rundi nkakwatwa ekiniga, baatokeraga haiguru nibagamba ngu: “Aha! Hati niiwe Joe owaira.” Mali ebigambo ebi byansaalizaaga muno! Nayehurraga nk’ow’alemerwe.

Ekiikaro nambere nakorraga ebisisani by’orwanju byabaga biri buli hamu, omu vidiyo rundi omu bitabu. Abakozi bataahi bange bayesindikiraga butoosa ebisisani by’orwanju kurabira ha kompyuta nk’oku nanyowe nakoraga. Nkaba nindengaho kubyecwaho, baitu baali bacweriiremu kimu kundemesa buli rutambu nateraga. Nkaserra obukonyezi n’obusagiki hali ow’akaba nanyegesa Baibuli. N’okugumiisiriza, akampuliiriza obunkaba nimugambira ekiri ha mutima gwange. Akakozesa ebyahandiikirwe, kunyoleka omulingo nkaba ninsobora kwecwaho engeso egi, kandi akanyekambisa kuserra obukonyezi bwa Yahwe kurabira omu kusaba.​—Zabuli 119:37.

Kiro kimu nketa abakozi bataahi bange omu rukurato. Obubayesoroize, nkabagambira ngu bahe ecupa za bbiya abasaija babiri abatwali tumanyire nk’abatamiizi. Boona bakatokera haiguru nibagamba ngu: “Eki titusobora kukikora! Abasaija banu nibarwanisa obutamiizi!” Nanyowe nkabagarukamu nti: “Ego, kandi nanyowe nikyo kimu.” Kuruga obu, bakyetegereza ngu nanyowe nkaba nindengaho kurwanisa omuze gw’okurora ebisisani eby’orwanju kandi batongere kunsindikiriza kugarukayo omu ngeso zange eza kara.

Hanyuma y’akasumi, n’obukonyezi bwingi muno kuruga hali Yahwe, nkasobora kusingura omuze gw’okurora ebisisani eby’orwanju. Omu1999, nkabatizibwa nk’omu h’Abakaiso ba Yahwe, nikinsemeza muno ngu nkahebwa omugisa ogundi kusobora kuba n’obwomeezi oburungi kandi obw’okusemererwa.

Hati ninyetegereza habwaki Yahwe anoba ebintu ebinkaba mazire akasumi kaingi ningonza. Nka Taata ow’engonzi, akaba nagonza kuntangira ebibi ebirukuruga omu kurora ebisisani eby’orwanju. Mali ebigambo ebiri omu Enfumo 3:5, 6 bihikire! Nihagamba ngu: “Yesiga [Yahwe] nomutima gwawe gwona, oleke okwigamira ha kwetegereza kwawe wenka; Omu mihanda yawe yona omwatulege, kandi nuwe aliterekereza emihanda yawe.” Endengo za Baibuli zinkonyire kutahikwaho kabi n’okuba musinguzi.​—Zabuli 1:1-3.

Omu bwomeezi bwange obwa kara nkaba ninyenuga, baitu hati ninyeha ekitiinisa kandi nyine obusinge omu mutima. Ekindi, nyine obwomeezi obwecumi, nimpurra ngu Yahwe akanganyira kandi nansagika. Omu mwaka 2000, nkaswera munyaanya itwe Karolin, ow’arukugonza Yahwe nk’oku nanyowe ndukumugonza. Eka yaitu erumu obusinge. Nitwehurra ngu tuli b’omugisa kuba omu ruganda orw’Abakristaayo abecumi kandi abaine okugonza omu nsi yoona.