Ua faarue to ˈu metua tane i te fenua Heremani i 1949 no te haere i Auteralia. Ua imi oia i te ohipa i roto i te mau taiete heruraa e hamaniraa ito. I te mataeinaa Victoria to ˈu papa i te nohoraa e te faaipoiporaa i to ˈu mama e fanauhia ˈtura vau i 1953.

Tau matahiti i muri aˈe, ua haamata to ˈu mama i te haapii i te Bibilia e te mau Ite no Iehova. E nehenehe e parau, ua paari au e te mau haapiiraa a te Bibilia. Mea au ore roa râ na to ˈu papa i te mau haapaoraa atoa. Ua riro mai oia ei taata ino, haavî e ua riaria roa to ˈu mama ia ˈna. Ua tamau râ o ˈna i te haapii i te Bibilia ma te huna e au atura o ˈna i ta ˈna i haapii. Aita anaˈe papa i te fare, e faaite mai mama i ta ˈna i haapii, ia ˈu e to ˈu tuahine. Ua faataa mai o ˈna e riro te fenua ei paradaiso a muri aˈe e e ite mâua i te oaoa ma te haapao i te mau ture aveia a te Bibilia.—Salamo 37:10, 29; Isaia 48:17.

I te 18raa o to ˈu matahiti, ua faarue au i te fare no to papa huru ino. Noa ˈtu ua tiaturi au no roto mai te Bibilia ta Mama i haapii mai, aita vau i haafaufaa i te reira. Aita atoa ïa i haapao i roto i to ˈu oraraa. Ua haamata vau i te ohipa i te tahi vahi heruraa arahu ei rave ohipa i roto i te uira. I te 20raa o to ˈu matahiti, ua faaipoipo e toru matahiti i muri aˈe fanau maira ta mâua hoê tamahine. I tera taime, ua feruri au i to ˈu oraraa. Ua ite e oaoa to ˈu utuafare maoti te mau aratairaa Bibilia, haamata ˈtura vau i te haapii e te hoê Ite no Iehova. Mea riri roa râ na ta ˈu vahine i te mau Ite. I to ˈu haereraa i te taime matamua i ta ratou putuputuraa, ua titau mai oia ia maiti, te haapiiraa Bibilia aore ra to ˈu utuafare. No to ˈu paruparu, farii atura i te faaea i te amuimui e te mau Ite no Iehova. I muri aˈe râ, ua tatarahapa roa vau i te ore e haapao i ta ˈu i ite mea tia.

I te tahi mahana, ua turai mai to ˈu mau hoa ohipa ia mataitai i te hohoˈa faufau. Noa ˈtu mea hairiiri, ua hinaaro noa to ˈu mata e hiˈo i te reira! I te hopearaa, ua faahapa noa vau ia ˈu. Ma te haamanaˈo i ta te Bibilia e haapii ra, ua papu ia ˈu e faautua mai te Atua. Ua tamau râ vau i te mataitai i te mau hohoˈa hairiiri e taui atura to ˈu manaˈo no nia i te mau hohoˈa faufau. Eita ˈtura ta ˈu e nehenehe faahou e faaea i tera peu.

 I te roaraa o na 20 matahiti i muri aˈe, ua atea ê roa ˈtu â vau i te mau ture aveia ta mama i haapii mai. Ua faaite to ˈu haerea eaha ta ˈu i tuu i roto i to ˈu feruriraa. Mea faufau ta ˈu huru paraparau e mea arearea roa na ˈu te mau faatiaraa faufau. Ua hape roa to ˈu manaˈo no nia i te mau peu taotoraa. Mea faaipoipohia vau, aita râ i taiâ i te taoto i tahi atu mau vahine. I te hoê mahana, tei mua vau i te hiˈo e aita roa vau i au i te taata ta ˈu e ite ra. Aita vau i faatura faahou ia ˈu iho, ua riro mai râ ei taata hairiiri mau!

Ua taa vau i ta ˈu vahine e ua ino roa to ˈu oraraa. I muri aˈe, ua pure au ia Iehova ma to ˈu aau atoa. Ua rave faahou atura vau i ta ˈu haapiiraa Bibilia noa ˈtu 20 matahiti tei mairi. I muri aˈe, ua pohe to ˈu papa e tia ˈtura i to ˈu mama ia bapetizohia ei Ite no Iehova.

Mea taa ê roa to ˈu oraraa i te mau ture aveia teitei a te Bibilia. I tera râ taime, ua faaoti papu vau i te imi i te hau o te feruriraa ta te Bibilia e fafau ra. Ua haapae au i te mau parau faufau e ua haavî i to ˈu huru. Ua faaea atoa vau i te mau peu taotoraa faufau, te pere moni, te inu hua i te ava e te eiâ i to ˈu paoti ohipa.

Aita to ˈu mau hoa ohipa i taa no te aha vau i hinaaro ai e taui roa. E toru matahiti te maoro, ua tamau ratou i te turai mai ia hoˈi i tera mau peu iino. Ia hema vau maa taime ma te riri aore ra ma te parau ino, oaoa roa ratou i te na ô mai: “Era, ua hoˈi mai te huru tahito o Josef!” Auê te mauiui tera mau parau! E pinepine au i te faahapa ia ˈu.

I te vahi raveraa ohipa, ua rahi roa te hohoˈa faufau, mea ê to roto i te matini roro uira, mea ê te mea neneihia. E hapono tamau te mau hoa ohipa i te reira maoti te matini roro uira mai ta ratou i rave i nia ia ˈu na mua ˈˈe. Te tutava ra vau i te faaea i tera peu, area ratou ua tamata noa ïa i te turai mai ia hara. Ua imi au i te tauturu e te faaitoitoraa i te taata o tei faatere i ta ˈu haapiiraa Bibilia. Ia haamahora vau i to ˈu aau, e faaroo mai oia ma te faaoromai. Ma te faaohipa i te mau irava Bibilia taa maitai, ua faaite mai oia e nafea ia mau papu e ua faaitoito atoa mai ia imi tamau i te tauturu a Iehova na roto i te pure.—Salamo 119:37.

I te hoê mahana, ua ani au i te mau hoa ohipa ia putuputu. I te taeraa mai te taatoaraa, ua ani atu vau ia horoa i te hoê pia i na taata e piti o tei faaite e taero ava raua. Tuô paatoa ihora ratou: “Eiaha! E hoa aˈera, te tamata ra hoi raua i te faaea!” Pahono ihora vau: “O vau atoa!” Mai tera mahana mai â, ua ite ratou te tutava ra vau i te faaea i te mataitai i te hohoˈa faufau e aita ˈtura i turai faahou mai ia hoˈi i to ˈu huru tahito.

I muri aˈe e maoti te tauturu rahi a Iehova, ua tia ia ˈu ia faaea roa i te mataitai i te hohoˈa faufau. I 1999, ua bapetizohia vau ei Ite no Iehova. Auê au i te mauruuru i te faaoromai rahi o te Atua, tia ˈtura ia ˈu ia taui e ia fanaˈo i te hoê oraraa tura e te oaoa!

I teie nei, ua taa ia ˈu no te aha mea au ore na Iehova te mau mea ta ˈu i rave ehia matahiti. Ei Metua î i te here, ua hinaaro o ˈna e paruru ia ˈu i te peapea rahi ta te hohoˈa faufau e faatupu. Mea tano roa te mau manaˈo o te Maseli 3:5, 6! Te na ô ra hoi: “E tiaturi ia Iehova ma to aau atoa ra; eiaha râ e tiaturi i to oe ihora haapao. Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea.” E ere noa te mau ture aveia Bibilia i te parururaa, e ravea atoa râ no te ite i te oaoa mau.—Salamo 1:1-3.

Na mua ˈˈe, ua au ore roa vau ia ˈu. I teie nei râ, te faatura ra vau ia ˈu e ua faaea i te faahapa noa. E oraraa tura to ˈu e te ite nei au ua faaore o Iehova i ta ˈu mau hara e te turu atoa mai ra oia. I 2000, ua faaipoipo vau ia Karolin, te tahi vahine Kerisetiano nehenehe mau o te here ra ia Iehova mai ia ˈu. E oraraa hau to mâua i te fare. Auê mâua i te mauruuru i te riro ei mero o te hoê utuafare Kerisetiano tura e te î i te here na te ao atoa nei.