Allemagne tany faviany babako, fa taminy 1949 izy nifindra tan Australie. Nitady asa tamy tany fangadian̈a volamena ndreky lozìny pan̈amboatra herinaratra izy. Tamy tany ambanivolo, ta Victoria, izy nipetraka. Koa fa nandeha fotoan̈a, izy nampakatra mamanay. Taminy 1953 zaho teraka.

Taon̈o vitsivitsy tafara tatỳ, Mama nianatra Baiboly tamy Vavolombelon̈o Jehovah. Mbala hely zaho tamy zen̈y, kanefa efa haiko raha ampianariny Baiboly. Papa ndraiky tsy tia fivavahan̈a foeky. Nanjary nanjikiziky avio kafiry mare izy, ke navozo izy mare Mama. Ndray zen̈y, Mama mbala nianatra Baiboly fo, fa izy nisitriky. Nanjary tiany raha nianarany, ke nikoran̈iny taminay roeny anabaviko raha zen̈y, papanay koa fa tsy tantran̈o. Nikoran̈iny Mama taminay fa tany ty mbala hanjary paradisa, avio ho sambatra zahay izikoa man̈araka fitsipikiny Baiboly.​—Salamo 37:10, 29; Isaia 48:17.

Zaho koa fa feno 18 taon̈o, zaho voatery niala tantran̈o, fotony nahay nan̈ajima fo Papa sady kafiry. Resy lahatra zaho fa marin̈y raha nampianariny Mama zahay baka tamy Baiboly tao. Kanefa tsy narehako foeky raha zen̈y fotony tsy ten̈a raha maventy taminaka toro lalan̈any Zan̈ahary tamy Baiboly tao. Ndray zen̈y, haiko tsarabe fa mahatsara fianakavian̈anaka raha koran̈iny Baiboly io, ke zen̈y nahavy zaho nianatra Baiboly tamy Vavolombelon̈o Jehovah fo. Tsy tiany vadiko zaho nianatra Baiboly. Indraiky andra, zaho tamy zen̈y baka nivory, nampitahoriny zaho. Zaho zen̈y koa tsy voly mianatra Baiboly io, hialany tokantran̈onay. Tsy haiko raha hataoko, ke zaho voly foeky nifandray tamy Vavolombelon̈o Jehovah. Izikoa fa nandeha fotoan̈a, zaho nanen̈iny, fotony haiko tsarabe fa tsara mianatra izio, ary zen̈y ny tokony hataoko.

Tandraraiky zay, zaho nampizahavanolo fiasan̈a araiky taminaka sary vetaveta. Ten̈a nampangaroharo zaho raha zen̈y, kanefa zaho karaha mbala tihizaha izio fo, ke ninjehiny eritreritrinaka zaho. Azoko onon̈o raha nianarako tamy Baiboly tao, ke haiko tsarabe fa hisazìny Zan̈ahary. Haiko fa ratsy mizaha sary vetaveta, kanefa zaho mbala nan̈ano izio fo. Farany, nanjary tsy nampan̈ino zaho foeky izio, ke nanjary nandivôzinizio foeky zaho.

Tan̈atiny 20 taon̈o, zaho tsy nan̈araka raha nampianariny Mama zaho, ke nahairatsy fo fiain̈ananaka. Hita tamy raha nataoko fa tsy raha manjary tan̈atiny jerinaka. Zaho in̈y nanjary nan̈asaha sady tia nan̈ano songetaka vetaveta. Nanjary niova foeky fomba fahitako firaisan̈a. Zaho ndray mbala tran̈o araiky tamy vadiko, zaho niaraka tamy man̈angy isankarazany. Nanjary nahatsapa ten̈a tsisy dikany foeky zaho.

Nisaraka zahay fivadiany, ke nanjary tsisy raha nanjary fiain̈ananaka. Ke nivavaka tamy Jehovah zaho, avio nikoran̈iko taminany raha jiaby tan̈atiny fonaka. Nimpody nianatra Baiboly ndraiky zaho, ndray efa 20 taon̈o zay nivolezako nianatra izio. Papanay tamy zen̈y efa naty, avio mamanay in̈y nanjary Vavolombelon̈o Jehovah vita batisa.

Nifanohitry tamy fitsipikiny Baiboly foeky fomba fiain̈ananaka, karaha ataony atsimo ndreky avaratra. Kanefa, tiako hilamin̈y sain̈inaka, ke nifen̈y zaho hifehy ten̈a ndreky tsy han̈ano volandraty eky. Nanapakevitry koa zaho tsy hijangajanga, tsy hiloka, tsy han̈ano mamo, avio tsy hangalatra eky.

Tsy nazava taminolo fiasan̈a araiky taminaka foeky nan̈ino zaho tihiova karaha zen̈y. Ke tan̈atiny telo taon̈o, iro namango nitady hevitry hitahaoman̈a zaho himpody tamy fiain̈ananaka taloha. Misy fotoan̈a zaho lavo ke nan̈ajima mare taminolo na nan̈asaha. Ravoravo mare iro salakady nivolan̈a taminaka karaha ty: “Zay! Karaha io Joe taloha!” Nampalahelo zaho mare raha nivolan̈indro zen̈y, ke matetiky zaho kivy mare.

Feno sary vetaveta tamy tany fiasan̈anay, taminy ordinatera zen̈y na tamy boky. Iro piasa tao koa mifandefa sary tsy manjary karaha zen̈y. Ndray zaho mba nan̈ano karaha zen̈y taloha. Nifen̈y zaho niala tamy raha ratsy nahazatra zaho aby zen̈y, fa nitady fomba fo iro hamandrihan̈a zaho. Ke zaho nangataka fan̈ampian̈a ndreky fankahirezan̈a taminolo nampianatra Baiboly zaho. Nitandrin̈esany tsarabe raha nivolan̈iko, baka io izy nan̈aboaka andininteny mety man̈ampy zaho. Nirahiny nivavaka fo koa zaho.​—Salamo 119:37.

Tandraraiky, navoriko iro olo fiasan̈a araiky taminaka aby io. Nisy piasa aroe zay baka tao nivolan̈a fa iro ten̈a andivoziny toaka. Nirahiko namezandro labiera iro roe lahy. Direkty iro namaly: “Aia koa ma? Ndray iro efa miezaka mare hiala izio!” Zaho amy zay nivolan̈a tamindro: “Ia, ndray zaho koa ane mba karaha zen̈y e!” Tiô vo tsapandro fa niady mare zaho baka tsy ho handivôziny boky ndreky sary vetaveta aby io. Ke tafaranizen̈y, zaho efa tsy niforsendro eky hizaha raha aby io.

Vitako fo tamy farany tsy nizaha sary vetaveta, fotony Jehovah ten̈a nan̈ampy zaho. Taminy 1999, zaho natao batisa sady nanjary Vavolombelon̈o Jehovah. Man̈ano mersy Jehovah zaho fotony zaho mbala afaka manan̈a fomba fiain̈ana madio ndreky sambatra ndraiky.

Iziô vo mazava aminaka nan̈ino raha tiako taloha aby io halany Jehovah. Izy baka Baba be fitiavan̈a, ke tsy tiany hinjinja vokadratsiny fizahavan̈a sary vetaveta zaho. Ten̈a marin̈y raha koran̈iny Ohabolana 3:5, 6. Ho izy ao: “Matokisa Jehovah amy fonao jiaby, fa aza mitoron̈o fahaizan̈anao. Iritrireta izy amy raha jiaby ataonao, ke hataony mandeha mahitsy fiain̈ananao.” Fitsipikinany amy Baiboly ao miaro atsika sady mahavy fiain̈anantsika ho tsara mare.​—Salamo 1:1-3.

Halako foeky ain̈inaka taloha. Kanefa iziô sain̈inaka milamin̈y avio zaho mahatsapa ten̈a misy dikany. Zaho iziô efa niova, ke haiko fa Jehovah man̈ambela hadisovan̈anaka, avio izy man̈ampy zaho. Nanjary fivadiany zahay ndreky Karolin tamy taon̈o 2000. Ten̈a tiako ranabavy io sady tia Jehovah karaha zaho koa. Milamin̈y tokantran̈onay. Ravoravo zahay fotony an̈isany fianakaviambeny pirahalahy erantany, madio sady be fitiavan̈a.