Íz 1949, bixiosa bireʼbu de Alemania né seebu Australia, tzayoybu dxiin ro rabeʼ buñ or né ro rony buñ dxiin de guii. Golésbu lainy toib gudxyen ni noʼ lainy estado de Victoria, ro bunybu galtzeʼel né xinaʼya. Naʼ goola íz 1953.

Chop tzón íz después, xinaʼya gosaló bisuidy la Biblia né testigos xtuny Jehová, por ngú rasetnaladxi ni rasuidy la Biblia. Per bixiosa diti bioladx ni toib religión. Nigolú nadox gócbu. Por ngú xinaʼya nigolú bidzuiby láabu, ná scú, nagachca bisuidybu né guirá ni bisuidybu nigolú gosacni par láabu. Órni bixiosa diti goyoʼ rioʼ, xinaʼya bisuidybu bisana néca naʼ ni casuidybu. Gochbu lóodo que Gudxlio sácni toib lagary móz né que nabanydo nakit pal nasobdo ni ná Biblia (Salmo 37:10, 29; Isaías 48:17).

Xtol ni nadox bixiosa, bireʼya lidxi dzú gopa 18 íz. Ná biluladxi ni bisuidy xinaʼya naʼ, diti gosac xcalrrasuidy la Biblia par naʼ, por ngú diti bisoba láani. Gosaló buni dxiin de electricista lainy toib mina de carbón né buni galtzeʼel dzú gopa 20 íz. Tzón íz después gool primer xiindzapdo, né ngú buny que buni pensary xi láani ni más rasac ló xcalnabani. Goona que la Biblia labúu ñacné xfamildo, por ngú gosaló bisudi láani né testigo xtuny Jehová. Per tzeʼela diti bioladx ni rasuidy Testigos. Órni goyaʼya toibtica reunión, gochbu naʼ: pal diti guisianlo guisuidylo la Biblia la, gon pu nís tzeelo. Diti gopa balory nasiana xfamila, por ngú ma diti bidzaga Testigos. Gosac malaya ni bisiana ni naana que nac xinésni.

Toibtica dzú, xcompañera ni ronynéya dxiin bikíilyibu naʼ nabiʼya cós yox. Bioladxi láani per láaca biduidyoʼobni naʼ, né por láani bisac mala. Bisetnaladxi ni bisudi ló la Biblia né goona que Dios sony castigar naʼ. Per casi guirá ór bibiʼya cós yox, ma diti biduidyoʼobni naʼ, por ngú godudy midid bibiʼya láani.

De goló dzúcu godudy gaal íz, né bialadxi guirá ni bisuidy xinaʼya naʼ. Mod góca bislooyni ni goloʼya guica. Goniya por diitz yox de guirá galrraxiich ni goleʼya gocni por diitznaa. Diti bibiʼya sexo mod rabiʼ Jehová láani, ná rabesnéya tzeʼela, gotnéya stipnés buñgonaʼ. Toibtica dzú bibiʼya naʼ ló toib spej né goniya: «Raduidyoʼoba naʼca». Xalagary ñonladxi naʼca biduidyoʼoba naʼca.

Xcaltzeela bibílni né ma xilaʼsi bibani. Órcu goninéya Jehová né guidopynac xcalnabani. Ná ma godudy gaal íz gosaló bisudi la Biblia stoib. Par ló dzúcu, ma goity bixiosa né xinaʼya ma nac testigo xtuny Jehová.

Mod bibani né mod goniʼ la Biblia diti bidzakni mod buni. Per goloʼya guica guicaʼya paz ni Dios radudy xtiitz guicaʼno. Goloʼya guica nasiana guiniya diitz yox né ma diti nadzuitzgolúya. Láaca bisiana galyoxh, ma diti godxita por bidxiich, ma diti gosodxi, né láaca ma diti golana lainy empresa xtuni.

Buñ ni bunynéya dxiin diti bienyibu xigony goniiny naʼ natzaʼya mod nabani. Ló tzón íz bikíilyibu naʼ ñoni ni buni nírcu. Órni riaba ló cós mal stoib o radzutzi o raniya toib diitznaa, órcu nakit racaʼyibu rudx: «¡Ga lainy, ga Joe ni rimbuno!». ¡Nigolú bisioʼob guirá diitzcu naʼ! Gosaca que diti noʼ pu raquiinna.

Ro buni dxiin nigolú bidzani de pornografía. Guirága ór xcompañera bitudybu saʼyibu retrat yox ló guiich o por computadora, xomodca buni nírcu. Buni rutigoygaʼlni naʼ par nasiana láani, per layibu ralooyni goloʼyibu guicyibu gonyibu que guiaba loni stoib. Biyobi Testigo ni casuidy naʼ de la Biblia par ñacnébu né ñony animarbu naʼ, né láabu bicadiagbu naʼ né paseins laʼga naʼ caniya guirá ni noʼ lainy xcalnabani. Biquiimbu textos ni sieed ló la Biblia né bislooybu naʼ ximod labúu nasiana pornografía. Láaca buny animarbu naʼ guirága ór nanaba xcalrracné Jehová (Salmo 119:37).

Toibtica dzú bidopa né guirá buñ ni bunynéya dxiin, né órni ma guiráyibu noʼ, goodxi layibu que nadudyibu cerves chop xcompañerdo ni nando que rasoch. Guiráyibu bidzuitzyibu né gonidiéyibu naʼ: «¡¿Ximod guidudyno láani layibu?! ¡Chop buñguieeu reʼ cayony rutirigaʼlni layibu par guisianyibu láani!». «Pues naʼ láaca», cuabi layibu. Ma órcu bidudyibu cuent que naʼ láaca cayoni rutirigaʼlni naʼ par guisiana guibiʼya pornografía, né ma diti bikíilyibu naʼ.

Bidxin midid por ni gocnégoluʼ Jehová naʼ, labúu bisiana vis ni gopa. Goyonisa xomod testigo xtuny Jehová íz 1999. Radudi guixquix por ni cuaʼya stoib oportunida par nabani sacró né ñoʼya nakit.

Nigoreʼ rienna xigony rianladx Jehová cós ni bioladxgoluʼya por xidal íz. Xomod ran toib buñ xiin, goniiny naʼ diti ñoʼ xi ñony pornografía naʼ. Nigolú ni ná Proverbios 3:5, 6: «Gop confianz lóo Jehová né guidopy xcalnabanylo, né diti gaplo confianz ló entendimiento. Goloʼ cuent láabu ló guirá ni gonylo, né láabu sony nadopbu xinéslo». Ni rony mandary Jehová ló la Biblia rapni lóono; ndeʼ raslooy lóono que guirá ni gonyno sieeni lóono galán (Salmo 1:1-3).

Ló dzú ni see, biduidyoʼoba naʼca, per nigoreʼ nadxiʼya naʼ né ma rasaca sacró. Napa toib galnabany nayaa né rasaca que Jehová ma bitudybu scásiʼ guirá ni buni né racnébu naʼ. Íz 2000 bitzñaya né toib Testigo ni laa Karolin. Láabu nadxiʼbu Jehová xomodca naʼ goxtiguie rabesnédo saʼdo. Rasacdo que nigolú toib privilegio láani noʼdo lad herman ni noʼ ló guidopynac Gudxlio ni nac buñ nayaa né nap galnadxiʼ.