Ou rapel ler ou ti tonbe letan ou ti ankor manrmay? Petet ou ti koup ou lanmen oubyen deplis ou zenou. Eski ou mazinen ki mannyer ou manman ti rekonfort ou? Petet i ti netway ou boubou e met en bandaz lo la. Ou ti plere akoz i ti fermal me ler ou manman ti zantiman koz avek ou e anmay ou, ou ti santi ou pli byen. Ler ou ti sa laz, i ti fasil pour ou ganny rekonforte.

Me anmezir ki nou grandi, lavi i vin pli konplike. I annan bokou plis problenm e i pli difisil pour ganny rekonforte. Malerezman, bann problenm ki bann adilt i gannyen pa kapab ganny rezourd parey ler en manman i met en bandaz lo boubou son zanfan e may li. Annou vwar detrwa legzanp.

• Eski ou’n deza eksperyans douler ek soufrans akoz ou’n perdi ou travay? Julian i dir ki ler i ti ganny pouse dan travay, i ti vreman soke e trakase. I ti demann son lekor, ‘Ki mannyer mon pou pran swen avek mon fanmir? Apre tou sa kantite lannen ki mon’n travay dir, akoz sa lakonpannyen i nepli bezwen mwan?’

• Petet ou boulverse akoz ou maryaz in kase. Raquel i dir: “Ler mon msye ti kite avek mwan 18 mwan pase, mon ti vreman sagren. I ti konmsi mon leker ti’n desir an de. Sa douler ti afekte mwan fizikman e emosyonnelman. Sa ti osi fer mwan per sa ki ti pou arive a lavenir.”

• Kekfwa ou pe fer fas avek en problenm lasante grav ki pa pe amelyore. I kapab i annan letan kot ou santi parey Zob, sa zonm dan Labib ki ti dir: “Mon’n degout mon lavi. Mon nepli anvi viv.” (Zob 7:16, NW) Petet ou annan menm santiman parey Luis, en zonm dan son 80 an ki dir: “Par ler i konmsi mon pe zis esper lanmor.”

• Petet en dimoun ki ou kontan in mor e ou ti a kontan ganny rekonforte. Robert i dir: “Ler mon garson ti mor dan en aksidan avyon, premye kou mon pa ti oule krwar. Apre mon ti ganny en douler, en douler ki Labib i dir i parey ler en gran lepe i pers leker en dimoun.”​—Lik 2:35.

Robert, Luis, Raquel ek Julian ti ganny rekonforte menm dan sa bann moman difisil. Se sa Bondye Tou Pwisan li menm ki ti rekonfort zot. Ki mannyer i ti rekonfort zot? Eski i pou donn ou osi sa rekonfor ki ou bezwen?