អត្ថបទអំពីក្របទស្សនាវដ្ដី | តើលោកអ្នកអាចរកឃើញការសម្រាលទុក្ខនៅឯណា?
យើងទាំងអស់គ្នាត្រូវការការសម្រាលទុក្ខ
តើលោកអ្នកចាំអំពីពេលដែលលោកអ្នកដួលកាលនៅក្មេងឬទេ? លោកអ្នកប្រហែលជាមុតដៃឬក៏រលាត់ជង្គង់។ រួចមក តើលោកអ្នកចាំថាម្ដាយបានសម្រាលទុក្ខលោកអ្នកយ៉ាងណាទេ? គាត់ប្រហែលជាលាងរបួសហើយដាក់បង់បិទដំបៅ។ លោកអ្នកយំ តែកាលដែលម្ដាយឱបហើយលួងលោមលោកអ្នក នេះធ្វើឲ្យលោកអ្នកមានអារម្មណ៍ល្អជាង។ ពេលនៅក្មេង លោកអ្នកងាយស្រួលទទួលការសម្រាលទុក្ខ។
ប៉ុន្ដែ កាលដែលយើងធំឡើង ជីវិតយើងទៅជាស្មុគស្មាញជាង។ យើងមានបញ្ហាច្រើន ហើយយើងពិបាករកឃើញការសម្រាលទុក្ខ។ គួរឲ្យស្តាយណាស់! បង់បិទដំបៅនិងការឱបលួងលោមពីម្ដាយទំនងជាមិនអាចដោះស្រាយបញ្ហារបស់មនុស្សពេញវ័យឡើយ។ សូមពិចារណាបទពិសោធន៍ខ្លះ។
-
តើលោកអ្នកធ្លាប់រងទុក្ខដោយសារបាត់បង់ការងារឬទេ? បុរសម្នាក់ឈ្មោះហ៊ូលយ៉ាន់និយាយថាពេលគាត់បាត់បង់ការងារ គាត់ពិបាកចិត្ដយ៉ាងខ្លាំង។ គាត់ឆ្ងល់ថា ‹តើខ្ញុំនឹងផ្គត់ផ្គង់ក្រុមគ្រួសារខ្ញុំយ៉ាងដូចម្ដេច? ខ្ញុំបានខំធ្វើការអស់ជាច្រើនឆ្នាំហើយ ហេតុអ្វីក្រុមហ៊ុននោះគិតថាខ្ញុំគ្មានតម្លៃ?›។
-
ប្រហែលជាលោកអ្នកឈឺចិត្ដដោយសារចំណងអាពាហ៍ពិពាហ៍បានបាក់បែក។ ស្ដ្រីម្នាក់ឈ្មោះរ៉ាឃែលពន្យល់អំពីអារម្មណ៍គាត់ថា៖ «អស់មួយឆ្នាំកន្លះហើយដែលប្ដីខ្ញុំបានទៅចោលខ្ញុំ ពេលនោះខ្ញុំកើតទុក្ខយ៉ាងខ្លាំង។ បេះដូងខ្ញុំប្រៀបដូចជាត្រូវគេហែកជាពីរអ៊ីចឹង។ ខ្ញុំឈឺចាប់រហូតដល់ធ្លាក់ខ្លួនឈឺ។ ខ្ញុំភ័យខ្លាចខ្លាំងណាស់»។
-
លោកអ្នកប្រហែលជាមានជំងឺធ្ងន់ធ្ងររ៉ាំរ៉ៃ។ ពេលខ្លះលោកអ្នកប្រហែលជាមានអារម្មណ៍ដូចយ៉ូបនៅសម័យបុរាណ។ យ៉ូបបានថ្ងូរថា៖ «ទូលបង្គំខ្ពើមជីវិតណាស់ ទូលបង្គំនឹងមិនរស់ជាដរាបទេ»។ (យ៉ូប ៧:១៦) លោកអ្នកប្រហែលជាមានអារម្មណ៍ដូចបុរសអាយុ៨០ឆ្នាំម្នាក់ឈ្មោះលូអ៊ីស។ គាត់បាននិយាយថា៖ «ពេលខ្លះខ្ញុំមានអារម្មណ៍ថាខ្ញុំគ្រាន់តែចាំថ្ងៃស្លាប់ប៉ុណ្ណោះ»។
-
ឬមួយក៏មនុស្សជាទីស្រឡាញ់របស់លោកអ្នកបានស្លាប់ ហេតុនេះលោកអ្នកពិតជាត្រូវការការសម្រាលទុក្ខយ៉ាងខ្លាំង។ រ៉ូបឺតបានពន្យល់ថា៖ «ពេលកូនប្រុសរបស់ខ្ញុំបានស្លាប់ដោយសារយន្ដហោះធ្លាក់ មុនដំបូងខ្ញុំមិនចង់ជឿសោះ។ រួចមក ខ្ញុំមានការឈឺចាប់ខ្លាំងណាស់។ គម្ពីរប្រដូចការឈឺចាប់នេះទៅនឹងដាវវែងមួយដែលចាក់ទម្លុះចិត្ដរបស់អ្នក»។—លូកា ២:៣៥
រ៉ូបឺត លូអ៊ីស រ៉ាឃែល និងហ៊ូលយ៉ាន់បានរកឃើញការសម្រាលទុក្ខមែន ទោះបីជាស្ថិតក្នុងស្ថានភាពពិបាកទាំងនោះក្ដី។ ពួកគេបានរកឃើញបុគ្គលដ៏ល្អបំផុតដែលផ្ដល់ការសម្រាលទុក្ខ ពោលគឺព្រះដែលមានឫទ្ធានុភាពខ្លាំងក្លាបំផុត។ តើព្រះផ្ដល់ការសម្រាលទុក្ខយ៉ាងដូចម្ដេច? តើលោកនឹងផ្ដល់ការសម្រាលទុក្ខដល់លោកអ្នកដែរឬ?