Бьчʹуктайеда ԛә ӧса буйә, кӧ тӧ кʹәти у дәст-мьле тә ешийан? Те бира тә ча дийа тә бәр дьле тәда дьһат? Дьбә кӧ әԝе бьринед тә тʹәмьз дькьр у гьредьда. Тӧ дьгьрийайи, ле әԝе, тә да һәмеза хԝә у пач кьр. У тә ида хԝә баш тʹәхмин кьр. Бьчʹуктайеда тә тʹьме бәрдьли дитийә.

Ле чахе әм мәзьн дьбьн, жийин һе чәтьн дьбә. Проблемед мә жи һе мәзьн дьбьн, у ида чәтьн дьбә бәрдьлийе бьвинин. Йазьх ле проблемед мәзьна ӧса һеса найенә сафикьрьне чаԝа кӧ заротийеда. Ԝәрен әм дәрһәԛа һьнә мәсәла хәбәр дьн.

• Дьбәкә тә хәбата хԝә ӧнда кьрийә. Чахе мерәки бь наве Һулийан хәбата хԝә ӧнда кьр, әԝ гәләк бәрхԝәдькʹәт у дьфькьри: «Әзе ньһа чаԝа малбәта хԝә хԝәй кьм? Мьн һаԛас сал әв хәбат дькьр, чьма мәзьне хәбате сафи кьр кӧ әз ида нәлазьм ьм?»

• Дьԛәԝьмә жьн йан мере тә, жь тә ԛәтийайә у жь бо ԝе йәке тӧ гәләк дьлтәнг дьби. Кʹӧлфәтәкә бь наве Ракел гьли дькә: «18 мәһ пешда мере мьн, ньшкева әз һиштьм. Әв йәк бона мьн кʹәдәрәкә гьран бу. Дьле мьн ча бежи шькәст. У ешәкә мәзьн кʹәтә дьле мьн у бәдәна мьн. Әз дьтьрсийам, гәло ахьрийа мьн ԝе чаԝа бә».

• Йан дьбәкә тӧ гьран нәхԝаш и у һʹале тә баш набә. Щарна жь бо һʹале хԝә дьбәкә тӧ мина Ибо пʹехәмбәр ӧса дьфькьри: «Әз жь жийана хԝә . . . дькәрьһьм [нәфрʹәт дькьм]: Һʹәта һʹәтайийе жийане нахԝазьм» (Ибо 7:16). Дьбәкә щарна тӧ жи ӧса дьфькьри мина мерәки 80 сали бь наве Луйис йе кӧ дьбежә: «Щарна әз тʹәне мьрьне хԝәрʹа дьхԝазьм».

• Йан дьбә кӧ тә мәрьве хԝәйә незик ӧнда кьрийә у ньһа һьзрәта бәрдьлийе йи. Мерәки бь наве Роберт дьбежә: «Чахе кӧрʹе мьн кʹәтә ԛәзийе у мьр, мьн пешийе баԝәр нәдькьр. Ле паше, ешәкә мәзьн кʹәтә дьле мьн. Чаԝа кӧ Кʹьтеба Пироз дьбежә, әԝ еш мина «тʹирәке нав мьнрʹа дәрбаз бу» (Луԛа 2:35).

Роберт, Луйис, Ракел у Һулийан һәла һе дәрәщед чәтьнда жи бәрдьли дитьн. Әԝ йе кӧ бәрдьли дабу ԝан, Хԝәдайе Һьмзор ә. Гәло Хԝәде чь щурʹәйи бәрдьли дьда ԝан? У чь щурʹәйи әԝе бәрдьлийе бьдә тә?