Nga osungamene lumbu kina wabua va ntoto vava wakala kingiana-ngiana? Nanga walwala mu koko yovo muna makungunu. Nga olenda sungamena una o ngudi aku kasadisila? Nanga wasukula e mput’aku yo tula yo nlongo. Nanga wadila, kansi e mvovo miandi mia ngemba ye nsimba ina kasimba yasadisa mu kala wavuvama. Muna kileke kiaku, wakala yo muntu wasadisanga vana vau.

Kansi o mambu masoba vava wakituka se mbuta. O mambu ma mpasi masakidi, owau se diampasi mu sadiswa. Diankenda mu vova vo, e mpasi za mbuta ke zilendi fokokela vana nkat’a ngudi andi ko. Yambula twavovela mambu mabwila wantu akaka.

• Nga wamona kala e mpasi za katulwa mu salu? Juliana wavova vo vava kakatulwa mu salu wakendalala yo tokana kwayingi. Wakiyuvula vo, ‘Aweyi ilunga-lungila esi nzo ame?’ Se mvu miayingi nsadidi mu kompani diadi, ekuma bankatulwidi?’

• Dilenda kala vo otokananga kwayingi mu kuma kia mpasi muna longo lwaku. Raquele wavova vo, “Mvu miole ye ndambu miviokele kala tuka yakala diame kangiambulwila. E zingu kiame kia nkenda, imonanga nga mono yazengwa o ntima mu tini yole. Imonanga e mpasi mu nitu, e ngindu zame mpe ke zivuvamanga ko. Diampasi kikilu kwa mono.”

• Nanga kimbevo kiampasi oyelanga, kansi, ngeye kusasuki. Ezak’e ntangwa olenda kuyimwena nga una Yobi kamona, vava kanionga mu kuma kia mpasi zandi: ‘Mbembwele moyo ame; kizolele zinga diaka ko.’ (Yobi 7:16) I wau mpe kamona yakala dimosi dia mvu 80, una ye nkumbu a Luis, wavova vo, “Ezak’e ntangwa imonanga nga mono mfwa o mbazi.”

• Nanga lufiaulwisu ovuidi o mfunu mu kuma kia lufwa lwa nkaz’aku yovo yiku kiaku. Roberto wavova vo, “Vava mwan’ame ayakala kafwa muna sumbula kia ndeki, kia kwikila dio ko. Diantwasila mpasi za ntima, e mpasi zina Nkand’a Nzambi ketezanesanga yo nsosolo utompola ntima.”—Luka 2:35.

Roberto, Luis, Raquele yo Juliana bafiaulwiswa muna mpasi zau zawonso. Basolola o Nsadisi ambote, i Nzambi a Mpungu-ngolo. Aweyi o Nzambi kefiaulwisilanga wantu? Nga olenda kufiaulwisa muna mpasi zaku e?