Ke kwaar dik, kwõj ke keememej am̦ kar tũbbo̦k im ekar jar peim̦ ak bukwien neem̦? Kwõj ke keememej an kar jinõm̦ jipañ im kaenõm̦m̦an eok? Bõlen ear karreoik kinej eo am̦, innem teepe kõn juon teep in kinej. Bõlen kwaar jañ, ak ke ear kaenõm̦m̦an im atbo̦kwõje eok, ear bar em̦m̦an am̦ mour. Ealikkar bwe ke kwaar dik, ear pidodo am̦ bõk kaenõm̦m̦an.

Bõtab jel̦ak rũttol̦o̦k, epenl̦o̦k mour. Apañ ko jej iiooni rel̦l̦apl̦o̦k, im ekkã ad jaje ia eo jemaroñ bõk kaenõm̦m̦an jãne. Apañ ko jej iiooni kiiõ ke jerũtto relukkuun oktak kõnke epenl̦o̦k kõm̦adm̦õdi jãn apañ ko jaar iiooni ke jaar dik. L̦õmn̦ak m̦õk kõn jet iaan waanjoñak kein.

• Kwõnañin ke kar lukkuun inepata kõn am̦ kar luuji jerbal eo am̦? Juon em̦m̦aan etan Julian ej ba bwe ke ear baer jãn jerbal eo an, ear lukkuun inepata. Ear l̦õmn̦ak ippãn make im ba, ‘Enaaj ewi wãween aõ kiiõ kabwe aikuj ko an baam̦le e aõ? Rejaam̦ jol̦o̦k eõ jãn jerbal en̦ aõ ke elõñ iiõ in aõ kar kate eõ ilo jerbal?’

• Bõlen el̦ap am̦ bũrom̦õj im inepata kõnke erup pãd eo amiro eo pãleem̦. Juon kõrã etan Raquel ej ba, “Ke l̦eo ippa ear kajju etal jãn ña 18 allõñ ko remootl̦o̦k, iar lukkuun bũrom̦õj im rup bũruõ. Ej ãinwõt ñe ejako jimattanin menono e aõ. Men in ear lukkuun jelõt ãjmour e aõ im eñjake ko aõ. Ilukkuun kar inepata.”

• Bõlen ewõr am̦ nañinmej im kwõjjab lo an em̦m̦anl̦o̦k ãjmour n̦e am̦. Bõlen jet iien kwõj bõk ejja eñjake eo an Job, eo ear ba: “Ibbeer; im̦õk in mour.” (Job 7:16, UBS) Eñjake eo am̦ emaroñ ãinwõt bar eñjake eo an juon l̦al̦l̦ap etan Luis me 80 jim̦a an iiõ. Ej ba: “Jet iien ij l̦õmn̦ak bwe ejjel̦o̦k tokjãn aõ mour im ij kõttar wõt iien eo imej.”

• Ak bõlen kwõj aikuj kaenõm̦m̦an kõnke ejako juon eo ejitõnbõro ippam̦. Juon em̦m̦aan etan Robert ej ba, “Ke ear mej l̦adik eo nejũ ilo juon bal̦uun me ear kũrããj, ilo jinoin iar jab tõmak. Ak tokãlik, iar lukkuun bũrom̦õj. Joñan aõ kar bũrom̦õj im metak, ear ãinwõt men eo Baibõl̦ ej kwal̦o̦k kake kõn an juon metak ñe juon jãje ear wãkare.”​—Luk 2:35.

Robert, Luis, Raquel, im Julian rar aolep bõk kaenõm̦m̦an meñe rar iioon wãween ko reppen. Rar bõk kaenõm̦m̦an jãn Eo im ej make wõt jel̦ã kaenõm̦m̦an. Wõn in? Ejjel̦o̦k bar juon em̦m̦antata an naaj kaenõm̦m̦an kõj ijello̦kun wõt Anij, eo Ekajoor Bõtata. Ewi wãween an kaenõm̦m̦an kõj? Enaaj ke bar kaenõm̦m̦an eok ñe kwõj iioon apañ ko?