Yãmb tẽra y yãadmẽ y sẽn lʋɩ n pogl bɩ? Tõe tɩ yɩɩ y nug wall y rũmd n pogle. Yãmb tẽra y ma sẽn bels-y to-to wã bɩ? Tõe t’a peka nodrã, n kẽeg fuug n sẽbe. Y ra kaasdame, la a sẽn mobg yãmbã, ne a gom-noodã kɩtame tɩ zabdmã booge. Vẽenega, y yãadmẽ, belsg paoong ra pa toog ye.

La d sã n wa bɩtẽ, vɩɩmã lebgda toogo. Zu-loeesã paamda pãnga, tɩ belsg paoong me lebgd toogo. Sɩd me, pa wakat fãa la kãsembã zu-loees tɩɩm paoong yaa nana wa pag sẽn na n vil a biig nodre, n mobg-a tɩ kolg weoogã ye. Ad makr a wãna.

• Yãmb tʋʋm zoe n sãamame hal tɩ y pa mi y sẽn maandg bɩ? Rao yʋʋr sẽn boond t’a Ziliyẽ yeelame tɩ b sẽn wa n yiis yẽ tʋʋmã, linga yẽ hal t’a ra pa mi a sẽn maandg ye. A ra sokda a meng woto: ‘M na n maana wãn n ges m zakã rãmb yelle? Yʋʋm wʋsg la mam sẽn tʋm ãnterepiriizã pʋgẽ wã. Bõe yĩng tɩ b wa tagsdẽ tɩ m pa le tar yõodo?’

• Tõe tɩ yaa y kãadem n kao tɩ sãamd y sũur wʋsgo. Pag yʋʋr sẽn boond t’a Rasɛll yeela woto: “Yʋʋmd la kiis a yoob la woto mam sɩdã sẽn tiig n loog n bas maam. Yellã namsa maam hal wʋsgo. Mam bẽeme, tɩ m sũurã reeg n sãame. Yellã kẽesa maam dabeem.”

• Tõe tɩ y bẽeda bã-kɛgenga, tɩ pa wõnd sãoogdame ye. Wakat ninga, tõe tɩ y tagsda wa wẽn-sakd a Zoobe. A ra yeelame: “M yam yii ne m vɩɩma. Mam ka rat n vɩɩnd wakat fãa ye.” (Zoob 7:16, Wẽnnaam Sebre, 1983) A Lʋɩ yaa rao sẽn tar yʋʋm 80 la zaka. A yeelame: “Wakat ninga, yaa wa mam zĩ n gũuda kũumã.” Tõe tɩ yãmb me mi n tagsa woto.

• Tõe tɩ y ned n maan kaalem, tɩ y rat belsgo. Rao yʋʋr sẽn boond t’a Robɛɛr yeelame: “Mam bi-riblã kii sɩlg lʋɩɩs pʋgẽ. M sẽn wʋmã, m pa tẽ ye. La sũ-sãangã wa n sɩngame, hal n zabd wa ‘sʋʋg sẽn kõs neda,’ wa b sẽn yeel Biiblã pʋgẽ wã.”—Luk 2:35.

Baa a Robɛɛr, a Lʋɩ, a Rasɛll la a Ziliyẽ zu-loeesã sẽn yɩ kɛgemsã, b paama belsgo. B paamame tɩ Wẽnnaam mengã sẽn yaa pãng sẽn ka to soabã bels-ba. Bõe la a maan n bels-ba? Yãmb me sã n wa rat belsgo, a na n bels-y lame bɩ?