Noijuka obu waagwa ahansi obu waabaire ori muto? Obundi okagira enkojo aha ngaro nari waahonoka okuju. Noijuka oku nyoko yaakuhuumuriize? Naabaasa kuba yaanaabiise ekironda kyawe reero akakishemba. Okarira, kwonka ebigambo bye by’embabazi n’okukubumbatira bikakureetera kwehurira gye. Obu waabaire okiri muto, okaba noorahuka kutunga okuhuumurizibwa.

Kwonka ku turikweyongyera kukura, embeera nizeeyongyera kuguma. Oburemeezi nibuba bwingi, kyongyera n’okuguma kutunga okuhuumurizibwa. Eky’obusaasi, oburemeezi bw’omuntu mukuru nibubaasa kutahwaho n’obu waakumushemba nari okamubumbatira. Yetegyereze eby’okureeberaho ebimwe.

• Oraatungireho obusaasi bw’okufeerwa omurimo gwawe? Omushaija orikwetwa Julian naagira ngu ku baamubingire aha murimo, akagwe ako kakamureka ashobangiriirwe. Akaba naayebuuza ati: ‘Ninyija kureeberera nta eka yangye?’ Kandi ‘bwanyima y’okumara emyaka mingi ndikukora n’obweziriki, ahabw’enki ekitongore nikiteekateeka ngu tinyine mugasho?’

• Obundi oine obujune ahabw’okushenyuka kw’obushwere bwawe. Raquel naashoboorora ati: “Ibanyi ku yaantsigireho ameezi 18 agahingwire, nkahurira obusaasi bwanshweka. Okaba nooshusha ngu omutima gwangye gucwekiremu ebicweka bibiri. Nkaba nyine obusaasi aha mubiri n’omu nyehurira. Kikantiinisa.”

• Shana oine endwara obundi nooreeba ngu tihariho ekirikworeka ngu noija kuba gye. Obumwe noobaasa kwehurira nk’oku omushaija wa ira Yobu yaayehuriire, owaatongize ati: “Amagara gangye ngatamirwe, tinkyenda kugumaho.” (Yob. 7:16) Shana obundi nooyehurira nk’oku Luis omushaija oine emyaka nka 80 yaayehuriire, owaagizire ati: “Obumwe ninyehurira ngu ntegyereize kufa.”

• Nari obundi okufeerwa omukundwa nikyo kirikukureetera kwenda kuhuumurizibwa. Robert naashoboorora ati: “Mutabani wangye ku yaafeereire omuri butandu y’enyonyi, tindabandize kukiikiriza.” Bwanyima “nkatunga obusaasi, obusaasi obu Baibuli erikugyeragyeranisa n’okucumita omuntu rurara ekamurabamu.”​—Luk. 2:35.

Robert, Luis, Raquel, na Julian bakatunga okuhuumurizibwa, n’obu baraabe baabaire baine amaganya maingi. Tihaine ondiijo owaabaasize kubahuumuriza kureka Ruhanga ow’Obushoboorozi Bwona. Naahuumuriza ata abantu? Naiwe naija kukuha okuhuumurizibwa oku orikwenda?