Anje heedhe ubbe gaˈnootto yanna qulli yitannohe? Hatte yannara anga mudhoottoha woy gaˈnite gulucho luqqaoottoha ikkara dandaanno. Hatte yannara amakki dogisiissinohe gara qaagatto? Ise mundee fiite kaˈe mada hoccunni usurtinoheha ikkara dandaanno. Hakka wote ati wiˈloottoha ikkirono, ise xoˈnite iseneetiwa qolte rimmi assite amadduheta hakka wontenni woyyimma afiˈritto. Anje heeˈnoonni wote shiimuri sheshifachishanno.

Ikkollana, lophinanni haˈnanni wote heeshsho qarru batiˈrinota ikkitanni hadhanno. Qoleno, qarru batiˈranni haˈranno wote, anje wari gede shiimurinni sheshifata gooddo ikkitanno. Hige jajjabbu mannira iillanno qarri, hoccunni usurreenna woy ama rimmi assite amaddeenna gatannoha diˈˈikkino. Hanni mite lawishshuwa laˈno.

• Loosu bayichinni fushshine hunneennahe kadde amadattori bae egenninohe? Huliyaani loosu bayichinni fushshine hunnisi yannara lowo geeshsha masinota coyiˈrino. Isi togo yee hedino: ‘Maateˈyara hasiisannore mamiinni abbeemmo? Kageeshshi diro, wolqaˈya badhera qoˈlummokkinni loosanni heeˈreennanni, tini dirijjite ane kaaˈlinori nookkihu gede assite laˈinoehu mayiraati?’

• Miteekke adhamakki diiganteenna ragu baalu tunsinoheha ikkara dandaanno. Rakeeli togo yitino: “Minaanniˈya mittu dirrinna lewu agani albaanni hedeweelcho mininni fule haˈri yannara, lowo geeshsha dadilloomma. Hatte yannara wodaniˈya lamewa talka yiinohu gedeeti. Tini mannimmaˈyano hedoˈyano gawajjitino. Qoleno ragu baalu tunsinoe.”

• Miteekke hurannokki xibbi amadinoheha ikkara dandaanno. Hatto ikkiro ammanamino manchi Iyyoobi hedino gede assite hedatto woti heeˈrara dandaanno; isi togo yiino: “Heeshshoˈya mishoommo; heeˈrammora horontanni dihasiˈreemmo.” (Iyyoobi 7:16) Qoleno, Luwesi yinannihu 80 diri balla ikkannosi manchi coyiˈrinori ledo sumuu yaattoha ikkara dandaanno; isi giddosita maaxikkinni, “Mito wote reyo agadhe noommoha lawannoe” yiino.

• Shesho hasiˈratto gede assinohe coyi shiiˈro ikkitara dandiitanno. Rooberti togo yiino: “Qaaqqiˈya horophillu danonni reyi yannara, umi qara tenne ammane adha qarrissinoe. Hakkuyi gedensaanni bise xorrite saˈeenna xissannohu gede xissiisiˈroommo.”—Luqaasi 2:35.

Rooberti, Luwesi, Rakeelinna Huliyaani buutote qarri iillinsa yannara nafa shesho afidhino. Insa sheshifachishate taalle noosikkihu Duuchanka Dandaanno Magani sheshifachishinonsa. Isi insa sheshifachishinohu hiittoonniiti? Insante gede aterano shesho hasiissannohe yannara sheshifachishahe ikka?