ʻOkú ke manatuʻi haʻo tō ʻi hoʻo kei siʻí? Mahalo naʻe lavea ho nimá pe mamulu ho tuí. ʻOkú ke manatuʻi hono fakafiemālieʻi koe ʻe hoʻo faʻeé? Mahalo pē naʻá ne fufulu pea haʻihaʻi ho laveá. Naʻá ke tangi ka ko ʻene ngaahi lea fakafiemālié mo ʻene fua koé naʻá ke ongoʻi fiemālie leva. ʻI he taimi ko iá ʻi hoʻo moʻuí, naʻe ʻi ai maʻu pē ʻa e fakafiemālié.

Ka ʻi heʻetau motuʻa angé ko e moʻuí ʻoku fakaʻaʻau ke puputuʻu ange. Kuo fakautuutu ange ʻa e palopalemá pea faingataʻa ange ke maʻu ha fakafiemālie. Ko e ngaahi palopalema ʻa e kakai lalahí ʻoku faingataʻa ke leaʻaki pea tātaitaha ke fakaleleiʻi ia ʻaki ha meʻa haʻi lavea mo e fāʻofua ʻa e faʻeé. Fakakaukau ki ha ngaahi fakatātā ʻe niʻihi.

• Kuó ke fehangahangai mo e faingataʻa ʻo e mole hoʻo ngāué? ʻOku pehē ʻe Julian ʻi he taimi naʻe tuli ai ia mei he ngāué naʻá ne ʻohovale mo ongoʻi puputuʻu. Naʻá ne fifili, ‘ʻE anga-fēfē ʻeku tauhi hoku fāmilí? Hili ʻeku ngāue mālohi ʻi he taʻu lahi ʻi he ngāué, ko e hā kuó u taʻeʻaonga ai ki he kautahá?’

• Mahalo nai kuo lōmekina koe ʻe he movete ʻa e nofo malí. “ʻI he taimi naʻe liʻaki au ʻe hoku husepānití ʻi he māhina ʻe 18 kuohilí, naʻá ku loto-mamahi lahi. Hangē ka mafahí hoku mafú, ko e fakamatala ia ʻa Raquel. “Naʻá ku mamahi fakaesino mo fakaeongo. Naʻá ku manavahē ai.”

• Mahalo pē ʻoku ʻi ai hao mahaki tauhi ʻoku ʻikai ke sai. ʻE ʻi ai ha taimi te ke ongoʻi tatau ai mo e pēteliake ko Siopé, naʻá ne tangilāulau: “ʻOku ou fakaliliʻa ki ai; ʻoku ʻikai te u fie moʻui maʻu ai pe.” (Siope 7:16) Mahalo ʻokú ke ongoʻi tatau mo e ongoʻi ʻa Luis ko ha tangata ʻi hono taʻu 80 tupú, naʻá ne leaʻaki, “Taimi ʻe niʻihi ʻoku ou ongoʻi kuo talitali pē ke u mate.”

• Pe mahalo nai ko ha mate ʻa ha taha ʻofeina ʻokú ne ʻai ai koe ke ke holi ki ha fakafiemālie. “ʻI he taimi naʻe mate ai hoku fohá ʻi ha fakatuʻutāmaki ʻi ha vakapuna, ko ʻeku ʻuluaki ongoʻí naʻe ʻikai ke u tui ki ai,” ko e fakamatala ia ʻa Robert. “Ka naʻe hoko mai ʻa e mamahí ʻo hangē ko ia ʻoku fakahoa ki ai ʻi he Tohi Tapú ki ha hū atu ha fuʻu heletā lōloa ʻi ho loto ʻoʻoú.”—Luke 2:35.

Ko Robert, Luis, Raquel, mo Julian naʻa nau maʻu ha fakafiemālie, naʻa mo e ngaahi taimi fakalotomamahí. Naʻa nau maʻu ʻa e Tokotaha lelei taha ke ʻomi iá—ʻoku ʻikai ha toe taha ka ko e ʻOtua Māfimafi-Aoniú. ʻI he founga fē ʻokú ne tokonaki mai ai ʻa e fakafiemālié? Te ne fai ʻa e meʻa meimei tatau ke tokonaki ʻa e fakafiemālie ʻokú ke fiemaʻú?