TUMU PARAU MATAMUA | NA VAI E TAMAHANAHANA ˈTU?
E imi tatou paatoa i te tamahanahanaraa
Te haamanaˈo ra anei oe i te taime a topa ˈi oe i te tamariiraa? Peneiaˈe, ua mutu to oe rima aore ra ua pahure te avae. Te haamanaˈo ra anei oe mea nafea to oe mama ia tamahanahana ia oe? Ua tamâ i te vahi pepe e ua rapaau i te reira. Ua taˈi oe, ua nâ râ na roto i ta ˈna mau parau mǎrû e tauahiraa mahanahana mau. I tera taime, mea ohie no oe ia ite i te tamahanahanaraa!
A paari ai râ, e ere roa ˈtu te oraraa i te mea ohie. E fifi rahi aˈe te tupu e mea varavara ia ite i te tamahanahanaraa. Mea peapea ia parau, eita râ te rapaauraa e te tauahi a te hoê metua vahine e navai no te faaafaro i te fifi o te feia paari. E hiˈo anaˈe i te tahi mau hiˈoraa.
-
Eaha to oe huru ia ere oe i ta oe ohipa? Te parau ra Julian, ua hepohepo roa o ˈna i to ˈna tihatiraahia. Ua uiui oia, ‘E nafea vau ia faatamaa i to ˈu utuafare? E rave rahi matahiti to ˈu ohiparaa ma te itoito, no te aha te taiete i haafaufaa ore ai ia ˈu?’
-
Peneiaˈe, ua faaruehia oe e to hoa faaipoipo. Te faataa ra Raquel i to ˈna huru: “Ua mauiui roa vau a faarue taue mai ai ta ˈu tane ia ˈu a 18 avaˈe i teie nei. E au ua patiahia to ˈu mafatu na ropu, ua paruparu to ˈu tino e to ˈu feruriraa atoa. Ua haapeapea roa vau no to ˈu ananahi.”
-
E maˈi rahi paha to oe e e au ra aita oe e maitai maira. Mai te patereareha Ioba paha to oe huru i te tahi taime o tei auê e ua na ô: “Te riaria nei au; eiaha vau ia ora roa ˈtu.” (Ioba 7:16) Peneiaˈe, hoê â manaˈo to oe e to Luis, e 80 matahiti, o tei parau: “I te tahi taime, e au te tiai noa ra vau i te taime o te poheraa.”
-
Aore ra, te imi ra oe i te tamahanahanaraa no te mea ua pohe tei herehia e oe. Te faataa ra Robert: “I te poheraa ta ˈu tamaiti i roto i te hoê ati manureva, oioi roa vau i te manaˈo aita e Atua. I muri iho, ua oto mai ta te Bibilia e parau ra, mai te huru ua patia-pǔpû-roa-hia vau i te puta hoto.”—Luka 2:35.
Ua tamahanahanahia Robert, Luis, Raquel e Julian noa ˈtu te fifi ta ratou i faaruru. Ua ite ratou i tei horoa i te tamahanahanaraa maori râ, te Atua Mana hope. E nafea o ˈna ia tamahanahana? E na reira atoa anei o ˈna no oe?
