کیا آپ کو بچپن کا کوئی ایسا واقعہ یاد ہے جب آپ کھیلتے کھیلتے  گِر  گئے  تھے؟‏  شاید آپ کے ہاتھ یا گھٹنے پر چوٹ لگ گئی تھی اور آپ رو رہے تھے۔‏ اُس وقت آپ کی امی نے کیا کِیا تھا؟‏ یقیناً اُنہوں نے آپ کو پیار کِیا ہوگا اور گلے لگایا ہوگا۔‏ پھر اُنہوں نے آپ کا زخم صاف کِیا ہوگا اور اِس پر پٹی باندھی ہوگی۔‏ اُن کے پیار بھرے لفظوں سے آپ کو  بہت  تسلی ملی ہوگی۔‏ بےشک زندگی کے اُس دَور میں تسلی بڑی آسانی سے مل جاتی ہے۔‏

لیکن جیسے جیسے ہم بڑے ہوتے جاتے ہیں،‏ زندگی مشکل ہوتی جاتی ہے۔‏ ہمیں بڑے بڑے مسئلوں کا سامنا ہوتا ہے اور تسلی ملنا مشکل ہو جاتا ہے۔‏ اُس وقت ہمارے مسئلے پٹی باندھنے یا ماں کے گلے لگانے سے حل نہیں ہوتے۔‏ آئیں،‏ زندگی میں آنے والی کچھ مشکلوں پر بات کریں۔‏

• شاید آپ کی نوکری چلی گئی ہے جس کی وجہ سے آپ کو سخت  پریشانی  کا  سامنا کرنا پڑ رہا ہے۔‏ خولیان کو ایسی ہی صورتحال سے گزرنا پڑا۔‏ جب اُن کی نوکری چلی گئی تو وہ بےحد پریشان ہو گئے اور سوچنے لگے کہ ”‏مَیں اپنے گھر والوں کی ضرورتیں کیسے پوری کروں گا؟‏ مَیں نے اُس کمپنی میں اِتنے سال محنت کی اور اب اُنہیں لگتا ہے کہ مَیں کسی کام کا نہیں ہوں۔‏“‏

• شاید آپ کی شادی ٹوٹ گئی ہے جس کی وجہ سے آپ بہت دُکھی ہیں۔‏ راکیل کے ساتھ بھی ایسا ہی ہوا۔‏ وہ کہتی ہیں:‏ ”‏18 مہینے پہلے میرے شوہر اچانک مجھے چھوڑ کر چلے گئے۔‏ میری زندگی غم کے اندھیرے میں ڈوب گئی اور مجھے لگا کہ میرا دل ٹکڑے ٹکڑے ہو گیا ہے۔‏ مَیں جذباتی طور پر بالکل ٹوٹ چُکی تھی۔‏ مجھے سمجھ نہیں آ رہا تھا کہ مَیں کیا کروں۔‏“‏

• شاید آپ کو کوئی ایسی بیماری ہے جو ٹھیک نہیں ہو سکتی۔‏ ہو سکتا ہے کہ آپ بھی کبھی کبھار خدا کے بندے ایوب کی طرح محسوس کرتے ہوں جنہوں نے کہا کہ ”‏مجھے اپنی جان سے نفرت ہے۔‏ مَیں .‏ .‏ .‏ زندہ رہنا نہیں چاہتا۔‏“‏ (‏ایوب 7:‏16‏)‏ لوئس جن کی عمر 80 سال سے اُوپر ہے،‏ کہتے ہیں:‏ ”‏کبھی کبھی مجھے لگتا ہے کہ مَیں بس موت کا اِنتظار کر رہا ہوں۔‏“‏

• شاید آپ کا کوئی عزیز موت کی وجہ سے آپ سے بچھڑ گیا ہے اور آپ  کو  تسلی کی ضرورت ہے۔‏ رابرٹ کہتے ہیں:‏ ”‏جب مجھے پتہ چلا کہ ہوائی جہاز کے حادثے میں میرے بیٹے کی موت ہو گئی ہے تو شروع میں تو مجھے یقین ہی نہیں آیا۔‏ لیکن پھر مجھ پر غم کا پہاڑ ٹوٹ پڑا۔‏ مجھے ایسا لگا جیسے کسی نے میرے دل میں ایک لمبی تلوار گھونپ دی ہے۔‏“‏—‏لُوقا 2:‏35‏۔‏

رابرٹ،‏ لوئس،‏ راکیل اور خولیان کو اِن کٹھن حالات میں بھی تسلی ملی۔‏ لیکن اُنہیں یہ تسلی کس کی طرف سے ملی؟‏ خدا کی طرف سے جو لامحدود قدرت کا مالک ہے۔‏ خدا تسلی کیسے دیتا ہے؟‏ کیا وہ آپ کو بھی ضرورت کے وقت تسلی دے گا؟‏