¿Kʼajaʼan wa tech juntéen ka lúubech ta paalil? Maʼ xaaneʼ xóot a kʼab wa joʼochpaj a píix. ¿Baʼax tu beetaj a maama utiaʼal u líiʼsik a wóol? Maʼ xaaneʼ tu choʼaj le tuʼux úuchtech looboʼ ka tu kʼaxaj. Techeʼ táan a wokʼol kaʼachi pero le ka tu méekʼech yéetel le ka ta wuʼuyaj le jatsʼuts tʼaanoʼob tu yaʼaloʼ káaj a wuʼuyikaba maʼalobil. Tu paalil máakeʼ séeb u líiʼsaʼal u yóol.

Chéen baʼaleʼ jeʼex u bin u nojochtal máakeʼ ku yantal problemaʼob maas nuuktak yéetel maʼ tu páajtal u líiʼsaʼal k-óol chéen yéetel junpʼéel méekʼ. Koʼox ilik jujunpʼéel ejemploʼob.

• ¿Yaan wa kʼiin jach yaachaj a wóol tumen luʼsaʼabtech meyaj? Julianeʼ ku yaʼalikeʼ le ka luʼsaʼab meyaj tiʼeʼ jach lúub u yóol. Tu tuklaj: «¿Bix ken in tséentil in familia? Wa úuch joʼopʼok in kíimskinba meyajeʼ, ¿baʼaxten ku yaʼalaʼalten mix baʼal in biilal teʼ empresaaʼ?».

• ¿Lubaʼan wa a wóol tumen tu pʼatech a núup? «Le ka tu pʼaten in wíicham walajki 18 meseseʼ táaj yaachaj in wóol. Tin wuʼuyaj bey táan u yeʼetsʼel in puksiʼikʼaleʼ —ku yaʼalik Raquel—. Jach yaj tin wuʼuyil yéetel lúub in wóol. Jach sajakchajen.»

• ¿Yaan wa tech junpʼéel kʼojaʼanil ka tuklik minaʼan tsʼaakil tiʼ? Maʼ xaaneʼ ka wuʼuyikaba jeʼex Job, le máax tu yaʼalaj: «Tsʼoʼok in kaʼanal[,] maʼ in kʼáat le kuxtalaʼ» (Job 7:16). Jeʼel a wuʼuyikaba xan jeʼex don Luiseʼ, juntúul nojoch máak yaan maanal 80 años tiʼ. Tu yaʼalaj: «Yaan kʼiineʼ kin tuklik chéen tin páaʼtik in kíimil».

• ¿Yaan wa máax kíimtech, le oʼolal táan a kaxtik tuʼux jeʼel u líiʼsaʼal a wóoleʼ? «Le ka aʼalaʼabten kíim in hijo úuchik u lúubul le avión tuʼux ku binoʼ maʼ tin jáan creertiʼ —ku tsikbaltik Robert—. Ka tsʼoʼokeʼ tin wuʼuyaj u yajil, bey jeʼex ka táatsʼmáansaʼak in puksiʼikʼal tumen junpʼéel chowak espadaeʼ.» (Lucas 2:35.)

Robert, Luis, Raquel yéetel Julianeʼ líiʼsaʼab u yóoloʼob kex yaj baʼax úuchtiʼob. Tu natsʼubaʼob yiknal le Máax maas u yojel líiʼsaj óoloʼ: Jajal Dios. Baʼaleʼ ¿bix u líiʼsik u yóol máak? ¿Yaan wa xan u líiʼsik a wóol ken kʼaʼabéetchajak?