Ya mo mo natingida nga pa gu regbo mo anaatiwa kusande mbu ro ni gude? Kura regbo, mo aaniogo bero, watadu ka mbura rukusiro ti sende. Ya mo ka mo tingidi wai namo anaafu wasa foro? Si rengbe ka du nga ri anigirisi gamo bangiri aro na ki voho na ũvoda aro. Mo anaakpara akpara, ono ga ri wene afugo watadu wai ri anaadunga ro anaafu ngbarago foro gbe. Ti gu regbo re, wasa adu mbembedi na mo.

Raka nagberã kina kumbatayo wa ani asona kini gbinza. Kpakaraapai nakio kina kumbatayo, na pa gbia wasa ti gi regbo re taata te. Gu kpakaraapai nga ga kuru aboro taata tipa ka nyasa riipaha wa gu nagude naavoda ga wirini aro kini dungo ru te. Ani makia nga gi bete akpiapai re.

• Ya mo mo agbianga tiro na gu kpakarapai nga ga mbu boro ti sunge? Julian aya, ho i a mbure ni ti sunge, si aima zigbá re si kidu wa berã re ima mbu mangasunge. Ko aabaka bangiriko nga ‘Wai gu mi ni kaa ngerafuo gimi aboro kporo?’ Mi ima manga sunge tipa dungu agarã, tipagine du i abire ti ni wa gu boro adunga sunge tini ya?’

• Kura regbo, rago rengbe ka gberã ti ro mbiko gupai nga pa gamo rogatise ima gberã. “Raquel aya, Ti gu regbo kumbami ambure adiwi kusayo bawe na ue, gberãrago azi re ni bakerehe gbe, si kidu wa kai ya ngbadure yo aima kuadi ku rogo ho ue. Akpoto re naabaha gbiati ngbadureyo adu rogo kere igirã. Si aima fuda re ni kerehe gbe.”

• Si rengbe ka du nga, mo na gu kere kaza nga gu mo abihe nga si arengbanga ka hu te. Kura aregbo kinaho rengbe mo ka bi tiro wa gu Eyobo abi tiko nake gupai nga: “Mi mbu pa ungare, mi akpi nga nyemu ka du ni ungare kindi te.” (Eyo 7:16) Kura regbo, apai tipa ro wakina ga Luis, nga gu kumba garãko adu nga 80, ko aya “Kura aregbo kinaho mi anaabi tire nga mi ima mbeda ka kpi.”

• Si rengbe ka du nga kpio gu boro mo akpinyemu ni du mo aida wasa tipaha. Robert aya, “Ti gu regbo wire akpi be gu béno nangia ga tiyara, mi agbiatire na gu kere igirã nga gu Ziazia Kekeapai aringbisaha kuti rũ boro na basape.”​—Ruka 2:35.

Robert, Luis, Raquel, na Julian agbia wasa zavura rogo gu kpakaraapai re vurũ. I agbia gu bawene boro narengbe ka fu wasa fuyo nga kina gu Mbori Du na Tanduapai Dũ. Wai du ko afu wasa fuyo? Ya mo ko afu kina gu bangisa wasa re foro?