Mũtũmwa Vaulo aeleisye kana Yeova * nĩwe ‘Ngai wa ũkiakisyo w’onthe; ũla ũtũkiakiasya mathĩnanĩ maitũ onthe.’ (2 Akolintho 1:3, 4) Kwoou Mbivilia nĩtũĩkĩĩthĩtye kana vai mũndũ wĩsa kwasya kana ndekwenda ũtethyo wa Ngai. O na nĩtũĩkĩĩthĩtye kana vai thĩna ũtonya kũtũkwata na Ngai akaemwa nĩ kũtũkiakisya.

Ũw’o nĩ kana no nginya twĩke maũndũ mana nĩ kenda tũkiakiw’e nĩ Ngai. Ekai tũsũanĩe ngelekany’o ĩĩ, twasye wĩ mũwau na nũkwenda kũiitwa, ndakĩtalĩ no akũiite na ndwaathi kũmwona? Mwathani Amosi akũlilye atĩĩ: “Elĩ makaendan’ya vamwe, matew’anĩte?” (Amosi 3:3) Kwoou Maandĩko matwĩĩte atĩĩ: “Mũthengeei Ngai, nake akamũthengeea inyw’ĩ.”—Yakovo 4:8.

Nĩkĩ twaĩle kũĩkĩĩa kana Ngai akatũthengeea? Kĩtumi kya mbee nĩ kana Ngai nũtũtavĩtye mavinda maingĩ kana nĩwendaa kũtũtethya. (Sisya  ĩsandũkũ yĩla yĩ ĩthangũnĩ ya 5.) Kĩtumi kya kelĩ nĩ kana ve andũ maeleetye ũndũ Ngai wamakiakiisye, amwe me thayũ na angĩ nĩmakwie.

O tondũ andũ aingĩ ũmũnthĩ mamanthaa ũtethyo kuma kwa Ngai, now’o Mũsumbĩ Ndaviti wendaa ũtethyo nũndũ wa mathĩna ala mamũkwatĩte. Amwĩsũvie Yeova kwa kũmwĩa atĩĩ: “Ĩw’aa wasya wa mawĩsũvano makwa, yĩla ngũkwĩkaĩla.” We Ngai nĩwasũngĩie mboya sya Ndaviti? Ĩĩ nĩwamũsũngĩie, na nĩkyo kĩtumi Ndaviti waisye kana nĩwatethiw’e nĩ Ngai, na ‘kwondũ wa ũu ngoo yake yatana mũno.’—Savuli 28:2, 7.

Ngai nĩwendaa Yesũ eĩthĩwa na kĩanda kya kũkiakisya andũ. Amwe katĩ wa mawĩa maingĩ ala Ngai wendaa Yesũ eanĩsye nĩ ‘kwova ala me na ngoo ndũlĩku’ na ‘kũkiakisya onthe ala mametaa.’ (Isaia 61:1, 2) O tondũ kwathanĩtwe, Yesũ nĩwendeeaw’a mũno nĩ kũtetheesya andũ ala ‘mathĩnĩaa wĩa na maĩ na mĩio mĩito.’—Mathayo 11:28-30.

Yesũ nĩwakiakiasya andũ kwa nzĩa syĩ kĩvathũkany’o. Kwa ngelekany’o, nĩwamataa, akameka nesa, na ve mavinda angĩ wavoasya ala awau. Mũthenya ũmwe mũndũ wawaĩte mangũ amwĩsũvie Yesũ na amwĩa atĩĩ: “Ethĩwa nũkwenda, nũtonya kũnthesya.” Yesũ nĩweew’ĩie mũndũ ũsu tei na amwĩa atĩĩ:  “Nĩngwenda; ĩthĩwa mũtheu.” (Maliko 1:40, 41) Na mũndũ ũsu avoa mangũ vau kwa vau.

Ũmũnthĩ, Mwana wa Ngai nde kũũ nthĩ ũndũ ũtonya kũtũkiakisya. Ĩndĩ Ĩthe wake, Yeova, “Ngai wa ũkiakisyo w’onthe,” nũendeee kũtetheesya ala mekwenda kũkiakiw’a. (2 Akolintho 1:3) Ekai twone nzĩa inyia nene ila Ngai ũtũmĩaa kũkiakisya andũ.

• Mbivilia. “Maũndũ o na meva ala mambie kũandĩkwa, nĩmaandĩkiwe nũndũ wa kũtũmanyĩasya, nĩ kana ũndũ wa wũmĩĩsyo na ũkiakisyo wa maandĩko twĩthĩwe na wĩkwatyo.”—Alomi 15:4.

• Veva Mũtheu wa Ngai. Ĩvinda ĩkuvĩ Yesũ amina kũawa, kĩkundi kyonthe kya Kĩklĩsto nĩkyeethĩiwe na ĩvinda ya mũuo. Nĩkĩ? Nũndũ wa ‘kũendeea kũmũkĩa Mwĩaĩi, na kũkiakiw’a nĩ veva mũtheu.’ (Meko ma Atũmwa 9:31) Veva mũtheu, ũla nĩw’o vinya wa Ngai ũla ũtũmĩaa kwĩka maũndũ, wĩ ũtonyi mwingĩ mũno. Ngai no atũmĩe veva mũtheu kũkiakisya mũndũ, o na ethĩwa e na thĩna wĩana ata.

• Mboya. Mbivilia yaĩtye atĩĩ: “Mũikemakĩe kwa ũndũ o na wĩva.” Na kwoou vandũ va kwĩmakĩa, yonanĩtye kana twaĩle ‘kwĩsũvana vamwe na kũtũnga mũvea. Na mũuo wa Ngai, ũla ũvĩtũkĩte ũmanyi w’onthe, ũkasũvĩaa ngoo sitũ na mosũanĩo maitũ nthĩnĩ wa Klĩsto Yesũ.’—Avilivi 4:6, 7.

• Aklĩsto Ala Angĩ methĩawa me anyanya ma w’o tũtonya kũmekwatya matũkiakisye ĩla twĩ na mathĩna. Mũtũmwa Vaulo aeleisye kana Aklĩsto ala angĩ maĩ anyanyae na ‘nĩmamũkiakiisye’ mavindanĩ ma ‘thĩna na ũnyamao.’—Akolosai 4:11; 1 Athesalonika 3:7.

Ĩndĩ nĩvatonyeka ũkethĩwa ũisaanĩw’a ũndũ maũndũ asu mawetwa matonya kũtethya mũndũ. Ekai twone ũndũ andũ amwe meekie ĩtina wa kũkwatwa nĩ mathĩna ala mawetiwe kĩlungunĩ kĩla kĩvĩtu. O tondũ tũkwona ngelekany’onĩ isu, o naku no wĩyonee ũndũ Yeova wĩanĩasya watho ũũ: “Ta ũla ũkiakiaw’a nĩ nyinyia, now’o ngamũkiakisya.”—Isaia 66:13.