Ntumwa Polo ke tuba nde Yehowa * kele “Nzambi yina ke lembikaka bantu yonso; yandi ke lembikaka beto na bampasi na beto yonso.” (2 Bakorinto 1:3, 4) Biblia ke pesa kivuvu nde kele ve ata ti muntu yina Nzambi ta kuka ve kupesa lusadisu mpi nde ata mpasi mosi ve kele nene mpi lenda kanga Tata na beto ya zulu nzila ya kusadisa beto.

Ya kieleka, beto fwete sala kima mosi kana beto ke zola nde Nzambi kusadisa beto. Inki mutindu munganga lenda sadisa beto kana beto me kwenda ve kusosa yandi na lupitalu? Biblia ke songa beto nde: “Beno kwenda pene-pene na Nzambi, ebuna yandi ta kwisa pene-pene na beno.”—Yakobo 4:8.

Inki mutindu beto lenda ndima nde Nzambi ta kwisa pene-pene na beto? Ntete-ntete, yandi ke songaka beto mbala na mbala nde yandi ke zola kusadisa beto. (Tala  lupangu yina kele na disolo yai.) Ya zole, beto kele ti banzikisa ya kieleka yina ke monisa nde Nzambi me pesaka bantu lusadisu, na bilumbu na beto mpi na ntangu ya ntama.

Bonso bantu mingi yina ke sosa lusadisu ya Nzambi bubu yai, ntotila Davidi vandaka mpi kukutana ti bampasi. Kilumbu mosi, yandi sambaka Yehowa nde: “Wa mambu ya mono ke lomba ntangu mono ke didila nge sambu nge sadisa mono.” Keti Nzambi pesaka yandi mvutu? Ee. Davidi tubaka nde: “Yandi me sadisa mono, mpi ntima na mono ke wa kiese.”—Nkunga 28:2, 7.

Nzambi bakaka bangidika sambu Yezu kuvanda ti mukumba ya nene ya kusadisa bantu. Na kati ya bisalu yina Nzambi pesaka yandi, Yezu vandaka “kukanga bande na bantu yina kele na ntima ya kele na mawa” mpi “kulembika bantu yonso yina kele na mawa.” (Yezaya 61:1, 2) Mutindu Biblia tubaka yo na ntwala, Yezu vandaka kuzola mingi bantu yina vandaka ‘kumona mpasi mpi kunata kilo ya mingi.’—Matayo 11:28-30.

Yezu vandaka kusadisa bantu na nzila ya bandongisila na yandi ya mayele, mutindu yandi vandaka kusadila bo mambu na mawete yonso, nkutu na mabaku ya nkaka, yandi vandaka kubelula bambefo. Kilumbu mosi, muntu mosi ya maladi ya lepre bondilaka  Yezu nde: “Kana nge me zola, nge lenda kumisa mono bunkete.” Yezu waka mawa mpi songaka yandi nde: “Mono me zola! Kuma bunkete.” (Marko 1:40, 41) Ebuna muntu yina belukaka.

Bubu yai, Mwana ya Nzambi kele ve awa na ntoto sambu na kusadisa muntu mosi-mosi. Kansi Yehowa, Tata na yandi, “Nzambi yina ke lembikaka bantu yonso,” ke landa kusadisa bantu yina ke mona mpasi. (2 Bakorinto 1:3) Beto tadila banzila iya ya ntete-ntete yina Nzambi ke sadilaka sambu na kusadisa bantu.

• Biblia. “Mambu yonso ya bo sonikaka ntama, bo sonikaka yo sambu na kulonga beto, sambu na nzila ya kukanga-ntima mpi ya kulembika yina ke katukaka na Masonuku beto vanda ti kivuvu.”—Baroma 15:4.

• Mpeve Santu ya Nzambi. Ntangu fioti na nima ya lufwa ya Yezu, dibundu ya mvimba ya Bukristu kumaka na ngemba. Sambu na nki? “Yo vandaka kutambula na boma ya Yehowa mpi na kikesa ya mpeve santu.” (Bisalu 9:31) Mpeve santu, disongidila ngolo ya kisalu ya Nzambi, kele ngolo mingi kibeni. Nzambi lenda sadila yo sambu na kusadisa konso muntu yo vanda na nki dibaku.

• Kisambu. Biblia ke longisila beto nde: “Beno kudiyangisa ve sambu na konso kima yina.” Kansi yo ke tuba nde: “Beno zabisa Nzambi mambu ya beno ke lomba; ebuna ngemba ya Nzambi yina me luta mayele yonso ya kubakisa mambu ta tanina bantima na beno mpi mabanza na beno.”—Bafilipi 4:6, 7.

• Bampangi-Bakristu lenda vanda banduku ya kieleka yina beto lenda tudila ntima ntangu beto ke kutana ti diambu mosi ya mpasi. Ntumwa Polo tubaka nde banduku na yandi vandaka ‘kulembika yandi mingi’ na ntangu ya ‘mawa mpi ya bampasi.’—Bakolosai 4:11; 1 Batesalonika 3:7.

Ziku nge ke kudiyula nki mutindu yo lenda salama kibeni. Beto tadila mbote-mbote bambandu ya bantu yina kutanaka ti bampasi yina beto tubilaka na disolo ya me luta. Bonso bo, nge lenda bakisa nde Nzambi ke lungisaka ntangu yonso lusilu yai ya kiese: “Mutindu mama ke lembikaka mwana na yandi, mutindu yo yina mpi mono ta landa kulembika beno.”—Yezaya 66:13.