អត្ថបទអំពីក្របទស្សនាវដ្ដី | តើលោកអ្នកអាចរកឃើញការសម្រាលទុក្ខនៅឯណា?
តើព្រះផ្ដល់ការសម្រាលទុក្ខយ៉ាងដូចម្ដេច?
សាវ័កប៉ូលរៀបរាប់ថាព្រះយេហូវ៉ា *ជា«ព្រះនៃការសម្រាលទុក្ខគ្រប់យ៉ាង លោកសម្រាលទុក្ខយើងពីសេចក្ដីវេទនាសព្វបែបយ៉ាង»។ (កូរិនថូសទី២ ១:៣, ៤) ដូច្នេះ គម្ពីរបរិសុទ្ធធានាចំពោះយើងថាព្រះអាចជួយមនុស្សណាក៏បាន ហើយថាលោកអាចសម្រាលទុក្ខយើងពីរឿងខ្លោចផ្សាណាក៏បានដែរ។
ប៉ុន្ដែ បើយើងចង់ទទួលការសម្រាលទុក្ខពីព្រះ យើងត្រូវធ្វើអ្វីមួយសិន។ ឧទាហរណ៍ បើយើងចង់ឲ្យគ្រូពេទ្យព្យាបាលយើង យើងត្រូវទៅជួបគាត់ជាមុនសិន មែនទេ? នៅសម័យបុរាណ អ្នកប្រកាសទំនាយម្នាក់ឈ្មោះអេម៉ុសបានសួរថា៖ «បើមនុស្ស២នាក់មិនព្រមចិត្ដគ្នា[ឬជួបគ្នា] នោះតើនឹងដើរជា១គ្នាបានឬ?»។ (អេម៉ុស ៣:៣) ម៉្លោះហើយ គម្ពីរលើកទឹកចិត្ដយើងថា៖ «ចូរចូលទៅជិតព្រះ ហើយលោកនឹងចូលមកជិតអ្នករាល់គ្នាដែរ»។—យ៉ាកុប ៤:៨
ហេតុអ្វីយើងអាចប្រាកដថាព្រះនឹងចូលមកជិតយើង? ទី១ គម្ពីរប្រាប់យើងម្ដងហើយម្ដងទៀតថាព្រះចង់ជួយយើង (សូមមើល ប្រអប់ក្នុងអត្ថបទនេះ)។ ទី២ យើងអាចជឿបានដោយមានទីសំអាងពីមនុស្សដែលព្រះបានសម្រាលទុក្ខ ទាំងពួកអ្នកដែលរស់នៅសម័យបុរាណ ទាំងពួកអ្នកដែលកំពុងរស់នៅសម័យបច្ចុប្បន្ន។
នៅសម័យបុរាណស្ដេចដាវីឌក៏ធ្លាប់ជួបនឹងទុក្ខវេទនា ហើយស្វែងរកជំនួយពីព្រះ ដូចមនុស្សជាច្រើននៅសព្វថ្ងៃនេះដែរ។ មានពេលមួយដាវីឌបានអង្វរព្រះយេហូវ៉ាថា៖ «សូមស្តាប់សំឡេងដែលទូលបង្គំទូលអង្វរ»ផង។ តើព្រះបានឆ្លើយតបនឹងគាត់ទេ? លោកបានឆ្លើយតបមែន។ ម៉្លោះហើយ ដាវីឌពោលបន្ដទៀតថា៖ ‹ខ្ញុំបានសេចក្ដីជំនួយ ហេតុនោះចិត្ដខ្ញុំមានសេចក្ដីរីករាយជាខ្លាំង›។—ទំនុកតម្កើង ២៨:២, ៧
តួនាទីរបស់លោកយេស៊ូក្នុងការ សម្រាលទុក្ខអស់អ្នកដែលកើតទុក្ខ
ព្រះបានឲ្យលោកយេស៊ូមានតួនាទីសំខាន់ក្នុងការសម្រាលទុក្ខមនុស្ស។ នេះជាតួនាទីមួយដែលព្រះបានផ្ដល់ឲ្យលោកយេស៊ូ«ដើម្បីនឹងប្រោសមនុស្សដែលមានចិត្ដសង្រេង» និង«កំសាន្ដចិត្ដ[ឬសម្រាលទុក្ខ]នៃអស់អ្នកដែលសោយសោក»។ (អេសាយ ៦១:១, ២) ដូចទំនាយបានប្រាប់ទុកជាមុន លោកយេស៊ូយកចិត្ដទុកដាក់ជាពិសេសចំពោះមនុស្សដែល«ធ្វើការនឿយហត់ហើយមានបន្ទុកធ្ងន់»។—ម៉ាថាយ ១១:២៨-៣០
លោកយេស៊ូបានសម្រាលទុក្ខមនុស្សដោយផ្ដល់ឱវាទដែលប្រកបដោយប្រាជ្ញា និងប្រព្រឹត្ដចំពោះពួកគេដោយសប្បុរស ហើយពេលខ្លះលោកថែមទាំងបានធ្វើឲ្យពួកគេជាសះស្បើយពីជំងឺទៀតផង។ នៅថ្ងៃមួយ អ្នកកើតជំងឺឃ្លង់ម្នាក់បានអង្វរលោកយេស៊ូថា៖ «បើលោកចង់ធ្វើឲ្យខ្ញុំជាស្អាត លោកអាចធ្វើបាន»។ ឃើញដូច្នេះ លោកមានចិត្ដក្ដួលអាណិត ហើយពោលតបថា៖ «ខ្ញុំចង់ធ្វើឲ្យអ្នកជាស្អាតមែន។ សូមឲ្យជាស្អាតចុះ»។ (ម៉ាកុស ១:៤០, ៤១) ពេលនោះអ្នកកើតឃ្លង់នោះក៏បានជាស្អាតមែន!
នៅសព្វថ្ងៃនេះ លោកយេស៊ូមិននៅផែនដីដើម្បីសម្រាលទុក្ខយើងម្នាក់ៗទេ។ ប៉ុន្ដែ ព្រះយេហូវ៉ាដែលជាបិតាលោកយេស៊ូ និង«ជាព្រះនៃការសម្រាលទុក្ខគ្រប់យ៉ាង»កំពុងបន្ដជួយអស់អ្នកដែលត្រូវការជំនួយ។ (កូរិនថូសទី២ ១:៣) សូមពិចារណាវិធីបួនយ៉ាងដែលព្រះប្រើដើម្បីសម្រាលទុក្ខមនុស្សយើង។
-
គម្ពីរបរិសុទ្ធ។ «អ្វីៗទាំងអស់ដែលបានត្រូវសរសេរទុកជាមុន បានត្រូវសរសេរទុកដើម្បីណែនាំយើង ដើម្បីឲ្យយើងមានសេចក្ដីសង្ឃឹម តាមរយៈការស៊ូទ្រាំរបស់យើង និងការសម្រាលទុក្ខពីបទគម្ពីរ»។—រ៉ូម ១៥:៤
-
សកម្មពលបរិសុទ្ធរបស់ព្រះ។ មិនយូរក្រោយពីលោកយេស៊ូស្លាប់ ក្រុមជំនុំគ្រិស្ដសាសនិកបន្ដមានសេចក្ដីសុខសាន្ដមួយគ្រា។ ហេតុអ្វី? ដោយសារពួកគេ«រស់នៅដោយកោតខ្លាចព្រះយេហូវ៉ា និងសមស្របតាមការសម្រាលទុក្ខពីសកម្មពលបរិសុទ្ធ»។ (សកម្មភាព ៩:៣១) សកម្មពលបរិសុទ្ធគឺជាកម្លាំងដ៏ខ្លាំងក្លាបំផុតរបស់ព្រះ។ ដូច្នេះ ព្រះអាចប្រើសកម្មពលបរិសុទ្ធដើម្បីសម្រាលទុក្ខអ្នកណាក៏បាន ទោះជាក្នុងស្ថានភាពណាក៏ដោយ។
-
សេចក្ដីអធិដ្ឋាន។ គម្ពីរដាស់តឿនយើងថា៖ «កុំខ្វល់ចិត្ដអំពីអ្វីឡើយ» តែ«ចូរជម្រាបព្រះអំពីសំណូមពររបស់អ្នករាល់គ្នា ក្នុងគ្រប់ការទាំងអស់ ហើយសេចក្ដីសុខសាន្ដរបស់ព្រះដែលហួសពីការនឹកស្មាន នឹងការពារចិត្ដនិងសមត្ថភាពរិះគិតរបស់អ្នករាល់គ្នា»។—ភីលីព ៤:៦, ៧
-
គ្រិស្ដសាសនិករួមជំនឿ។ ពួកគេអាចដូចជាមិត្ដសម្លាញ់ពិតដែលផ្ដល់ការសម្រាលទុក្ខដល់យើងក្នុងអំឡុងពេលដែលយើងជួបការពិបាក។ សាវ័កប៉ូលបានហៅអ្នករួមជំនឿថាជា‹អ្នកជំនួយនិងអ្នកពង្រឹងកម្លាំង› ក្នុងពេលដែលគាត់«ខ្វះខាតហើយមានសេចក្ដីវេទនា»។—កូឡុស ៤:១១; ថែស្សាឡូនិចទី១ ៣:៧
ទោះជាយ៉ាងណាក៏ដោយ លោកអ្នកប្រហែលជាឆ្ងល់ថា តើវិធីបួនយ៉ាងនេះអាចជួយសម្រាលទុក្ខលោកអ្នកយ៉ាងដូចម្ដេច? សូមយើងពិចារណាឲ្យបានដិតដល់ជាងអំពីបទពិសោធន៍របស់ពួកអ្នកដែលបានជួបទុក្ខលំបាកដូចបានរៀបរាប់នៅអត្ថបទមុន។ ដូចពួកគាត់ដែរ លោកអ្នកក៏អាចឃើញថាព្រះនៅតែបន្ដធ្វើតាមសេចក្ដីសន្យាដ៏កក់ក្ដៅរបស់លោកដែលថា៖ ‹ខ្ញុំនឹងកំសាន្ដចិត្ដអ្នក ដូចជាម្ដាយដែលលួងលោមកូន នោះអ្នករាល់គ្នានឹងមានសេចក្ដីកំសាន្ដចិត្ដ›។—អេសាយ ៦៦:១៣
^ វគ្គ 3 យេហូវ៉ាគឺជានាមរបស់ព្រះដែលមានក្នុងគម្ពីរបរិសុទ្ធ។
លោកអ្នកក៏ប្រហែលជាចូលចិត្តដែរ
សំណួរនិងចម្លើយពីគម្ពីរ
តើខ្ញុំអាចរកពាក្យដែលសម្រាលទុក្ខខ្ញុំក្នុងគម្ពីរបានទេ?
គម្ពីរអាចសម្រាលទុក្ខមនុស្សជាច្រើនដែលកំពុងជួបនឹងវិបត្តិផ្លូវចិត្តនិងស្ថានភាពពិបាក។
