O Poxolo Phaulu ua zuela kuila Jihova * “Nzambi ió athu oso kuene mú tambula o dikuatekesu muène mukua ku tu kuatekesa mu hadi ietu ioso.” (2 Kolindo 1:3, 4) Mukonda dia kiki o Bibidia i tu kuatekesa kuila, se-ku muthu kabhindamena o ki kuatekesu kia Nzambi, se-ku kibhidi kia bhonzo ki lembuesa Nzambi ku tu konda o malamba.

Mu kidi, tua tokala kubhanga kima se tua mesena kuila Nzambi u tu kuatekesa. Kiebhi o dotolo kia tena ku tu kuatekesa, se ki tu mu tangela o ndolo i tuala na-iu? O polofeta Amoji uebhuidisa: ‘Mala kiiadi a tena kuendela kumoxi, se ka mu divua?’ (Amoji 3:3) Kienhiki, o Mikanda Ikola i tu tendelesa: “Zukamenu kua Nzambi, muène u mi zukama enu.” ​—Tiiaku 4:8.

Kiebhi ki tu tena kuijiia kuila, Nzambi ua-nda tu zukama? Kia dianga, mukonda muéne ithangana ioso u tu ambela kuila, ua mesena ku tu kuatekesa. ( Tanga o kaxa ia kaiela.) Kaiiadi, mukonda tuejiia ni kidi kioso kuila, saí kiá athu a a kuatekesa kua Nzambi ki kale mu ukulu ni mu izuua ietu.

Kála o athu avulu ene mu sota o kikuatekesu kia Nzambi lelu, o Sobha Davidi ua dibhanene ué ni ibhidi iavulu. Mu ithangana ioso, muéne ua bhingile kua Jihova: “Ivua dízui diami dia kudionda.” O kuila Nzambi ua mu tambuijila? Kiene ua mu tambuijila. Davidi uambe dingi: “Kia bhangesa o muxima uami kukala ni ngalasa iavulu.”​—Jisálamu 28:2, 7.

Nzambi ua bhana o kikalakalu kua Jezú kia kukonda o malamba a athu. Mu ikalakalu ioso ia bhanene Nzambi kua Jezú ia mukua ia lungile ni “kusaka oso ala ni kikote mu muxima” ni “kukonda o malamba kua enhoso a tate.” (Izaía 61:1, 2) Kala kia ki kanene kiá, Jezú ua kexile ni henda iavulu ia athu akexile ‘mu bhuila, a tatele ni imbamba ia a nemene.’​— Matesu 11:28-30.

Jezú ua kuatekesa o athu mu ku a bhana milongi iambote ni ku a talatala ni henda ioso, kate muene ua a sakele o mauhaxi mâ. Saì kizuua o mukuâ dibhute ua diondela Jezú: ‘Se eie Ngana, ua mesena ku ki bhanga, ua ki soko, ngi bhane kudisanza.’ Mukonda dia henda Jezú uambe: “Nga mesena! Ngi ki bhanga muene; disanze!” (Marku 1:40, 41) O mukuâ dibhute anga u disanza.

 Lelu o Mon’â Nzambi kala dingi mu ixi phala ku tukonda o malamba. Maji o Tat’ê Jihova, “Nzambi ió athu oso kuene mú tambula o dikuatekesu,” uene hanji mu kuatekesa oso a bhindama. (2 Kolindo 1:3) Tala maukexilu a uana ene mu kuatekesa-nau Nzambi o athu.

• O Bibidia.‘Ima ioso iosoneke m’ukulu mu Mikanda Ikôla, a i sonekena phala etu ku dilonga, phala mu kinhenge, ni mu kutula o muxima mu kutanga o Mikanda, tu kale ni kudielela.’​—Loma 15:4.

• Nzumbi Ikôla ia Nzambi. Ki kua bhitile luua thembu kioso Jezú kia fuile, o kilunga kioso kia jikidistá kia kexile mu kutululuka. Mukonda diahi? Mukonda o kilunga kia kexile mu kuenda ‘mu uôma ua Jihova, ni mu kutululuka kua Nzumbi Ikôla.’ (Ikalakalu 9:31) O Nzumbi ikôla, o nguzu i lenda ioso ia Nzambi iala ni kutena kuavulu. Nzambi bhu kaxi ka nzumbi ikôla u tena kukuatekesa muthu uoso-uoso mu ibhidi ioso.

• Musambu. O Bibidia i tu tendelesa: “Ki mu kale ni hele ia kima.” Mu veji dia kiki iene iamba, ‘muenda ni kubhinga kua Nzambi ioso i mua mesena. Bhenhobho o kutululuka kua Nzambi kua somboka o kitongoluelu kioso kia muthu, kua-nda ku mi bateka mixima ni ilunji.’​—Filipe 4:6, 7.

• O Jiphange mu Nzumbi a tena ku kala makamba a kidi u tu tena ku dielela kioso ki tu bhindamena kikuatekesu mu ithangana ia ibhidi. Mu ku zuela ia lungu ni jiphange jê poxolo Phaulu uambe: Ene ‘athu a mu ngi konda o malamba’ mu ithangana ia bhonzo ‘mu kutâta ni mu jihadi.’​—Kolose 4:11; 1 Tesalonika 3:7.

Maji nange ua mu di bhuidisa kiebhi ima ìii i tena ku ku kuatekesa. Tua-nda suka ni kutanga o misoso ia athu a bhiti ni ibhidi a a tange kiá, ku dimatekenu dia milongi íii. Kala kia bhiti ni ene eie u tena kuijiia kuila Nzambi ua-nda kumbidila o kikanenu kiki: ‘Kala o mona kia mu bhombesa kuala mam’â kiene ué ki nga ká mi bhomba enu.’​—Izaia 66:13.