Di apɔsul Pɔl bin tɔk bɔt aw Jiova * “de kɔrej wi ɔltɛm we wi de pan trɔbul.” (Sɛkɛn Lɛta Fɔ Kɔrint 1:​3, 4) Di Baybul tɛl wi se nɔbɔdi nɔ de we Gɔd nɔ ebul ɛp ɛn no prɔblɛm nɔ de we big pas wi Papa we de na ɛvin, we go mek i nɔ ebul fɔ kɔrej wi.

Bɔt wi fɔ du sɔntin if wi want Gɔd fɔ kɔrej wi. Aw dɔktɔ go ɛp wi if wi nɔ go na ɔspitul fɔ go si am? Na dat mek di Baybul ɛnkɔrej wi se: “Una kam klos Gɔd ɛn i go kam klos una.”—Jems 4:​8.

Wetin mek wi shɔ se Gɔd go kam nia wi? Fɔs, na bikɔs i tɛl wi bɔku tɛm se i want fɔ ɛp wi. (Luk di  bɔks we de na di nɛks pej.) Sɛkɔn, na bikɔs wi gɛt pipul dɛn we Gɔd bin dɔn kɔrej we dɛn gɛt prɔblɛm dɛn. Dɛn pipul dɛn ya na rial pipul dɛn; sɔm de na wi yon tɛm ɛn sɔm dɔn day.

Jɔs lɛk bɔku pipul dɛn tide we de aks Gɔd fɔ ɛp dɛn we dɛn gɛt prɔblɛm, Kiŋ Devid insɛf bin gɛt bɔku prɔblɛm dɛn. Wan tɛm, i bin beg Jiova se: “Yɛri mi we a de pre, we a de kray fɔ mek yu ɛp  mi.” Yu tink se Gɔd bin ɛp am? Yɛs, i bin ɛp am. Devid tɔk bak se: “I de ɛp mi ɛn mi at gladi.”—Sam 28:​2, 7.

Gɔd bin want lɛ Jizɔs de bifo fɔ kɔrej pipul dɛn. Wan pan di wok dɛn we Gɔd bin gi Jizɔs, na “fɔ mɛn dɛn wan we gɛt brok at” ɛn “fɔ koks ɔl udat at de blid.” (Ayzaya 61:​1, 2) Jɔs lɛk aw dɛn bin dɔn tɔk, Jizɔs bin de rili ɛp pipul dɛn “we dɔn taya fɔ tot ebi lod.”—Matyu 11:​28-30.

Jizɔs bin de kɔrej pipul dɛn bay we i bin de gi dɛn fayn advays, trit dɛn fayn, ɛn sɔntɛnde i bin ivin de mɛn di wan dɛn we sik. Wan de, wan man we gɛt lɛprɔsi bin beg Jizɔs se: “If yu gri fɔ mɛn mi, yu ebul mɛn mi ɛn mek a klin.” Jizɔs sɔri fɔ di man ɛn tɛl am se: “A want mɛn yu, wɛl naw!” (Mak 1:​40, 41) Di man we gɛt di lɛprɔsi bin wɛl.

Pan ɔl we Gɔd in Pikin nɔ de igen na dis wɔl fɔ kɔrej wi, in Papa, Jiova, we “de kɔrej wi ɔltɛm,” de kɔntinyu fɔ ɛp di wan dɛn we nid pɔsin fɔ ɛp dɛn. (Sɛkɛn Lɛta Fɔ Kɔrint 1:​3) Lɛ wi tɔk bɔt 4 men tin dɛn we Gɔd de yuz fɔ kɔrej pipul dɛn.

• Di Baybul. “Ɔltin we rayt na Gɔd in Buk na fɔ lan wi sɔntin, so dat, we di tin we rayt de, de mek wi ebul bia ɛn mek wi gɛt kɔrej, wi go no se Gɔd nɔ go lɛf wi.”—Lɛta Fɔ Rom 15:​4.

• Oli Spirit. Afta we Jizɔs day, di Kristian kɔngrigeshɔn bin rili nid kɔrej. Di Baybul sho se Gɔd bin yuz in oli spirit fɔ kɔrej dɛn. (Di Apɔsul Dɛn Wok [Akt] 9:​31) Gɔd in oli spirit rili pawaful. Gɔd de yuz am fɔ kɔrej ɛnibɔdi ilɛk uskayn prɔblɛm i gɛt.

• Prea. Di Baybul advays wi se: “Una nɔ mek ɛnitin wɔri una.” Bɔt i se: “Una fɔ aks Gɔd fɔ ɛnitin we una want . . . Gɔd go gi una kol at, we mɔtalman nɔ ebul ɔndastand, we nɔ go mek ɛnitin wɔri una.”—Lɛta Fɔ Filipay 4:​6, 7.

• Wi Kɔmpin Kristian Dɛn kin bi wi tru tru padi dɛn we wi go abop pan fɔ kɔrej wi we wi gɛt prɔblɛm. Di apɔsul Pɔl bin tɔk se in kɔmpin dɛn dɔn ‘kɔrej am plɛnti’ tɛm we i gɛt “trɔbul” ɛn we i “de sɔfa.”—Lɛta Fɔ Kɔlɔse 4:​11; Fɔs Lɛta Fɔ Tɛsalonayka 3:​7.

Bɔt yu go de wɔnda aw ɔl dɛn tin ya kin rili bi. Lɛ wi tɔk mɔ bɔt di prɔblɛm dɛn we bin mit di pipul dɛn we wi bin tɔk bɔt na di fɔs atikul. Jɔs lɛk dɛn, yusɛf go kam fɔ no se Gɔd de du wetin i bin dɔn prɔmis, we i se: “Lɛk pikin we in mami de bayo bayo, na so a go bayo bayo una.”—Ayzaya 66:​13.