တၢ်မၢဖိပီလူးစံးဝဲလၢ ယဟိဝၤယွၤမ့ၢ် * “တၢ်သးကညီၤအပၢ်, ဒီးတၢ်မၤမုာ်ခဲလၢာ်အကစၢ် . . . အဝဲဒၣ်မၤမုာ်ထီၣ်ပှၤ လၢပတၢ်နးတၢ်ဖှီၣ်ခဲလၢာ်အပူၤ” လီၤ. (၂ ကရံၣ်သူး ၁:၃, ၄) လံာ်စီဆှံ ပာ်ဖျါထီၣ်ဝဲလၢ ပှၤလၢအမၤစၢၤပှၤသ့ဒိၣ်န့ၢ်ဒံး ကစၢ်ယွၤန့ၣ်တအိၣ်နီတဂၤဘၣ်, ဒီးတၢ်သူၣ်အုးသးအုးလၢ အဒိၣ်တုၤဒၣ်လဲာ် ကစၢ်ယွၤ မၤမုာ်ထီၣ်က့ၤပှၤတသ့ဘၣ်န့ၣ် တအိၣ်ဘၣ်.

ဘၣ်ဆၣ် ပမ့ၢ်အဲၣ်ဒိးလၢယဟိဝၤယွၤ ကမၤမုာ်ထီၣ်က့ၤပှၤန့ၣ် ပကဘၣ်မၤတၢ်တမံၤမံၤလီၤ. အဒိ ပမ့ၢ်တလဲၤထံၣ်လိာ်ပသးဒီး ကသံၣ်သရၣ်ဘၣ်န့ၣ် ပဒိးန့ၢ်ဘၣ်အတၢ်မၤစၢၤကသ့ဒ်လဲၣ်. လၢတၢ်န့ၣ်အဃိ လံာ်စီဆှံ ဆီၣ်ထွဲပှၤလၢ– “သုးဘူးသုသးဆူ ယွၤအအိၣ်တက့ၢ်, ဒီးကသူးဘူးအသးဆူ သုအိၣ်လီၤ.”—ယၤကိာ် ၄:၈.

ကစၢ်ယွၤကသုးဘူးအသးဆူ ပအိၣ်န့ၣ် ပနာ်အီၤကသ့ဒ်လဲၣ်. တၢတမံၤန့ၣ် မ့ၢ်လၢကစၢ်ယွၤ စံးဘၣ်ပှၤတလီၢ်လီၢ်လၢ အဝဲအဲၣ်ဒိးမၤစၢၤပှၤန့ၣ်လီၤ. (ကွၢ်လၢ  တၢ်လွံၢ်နၢၣ်အပူၤတက့ၢ်.) ခံမံၤတမံၤန့ၣ် မ့ၢ်လၢပထံၣ်ဘၣ် တၢ်အုၣ်အသးလၢ ကစၢ်ယွၤ မၤမုာ်ထီၣ်က့ၤအခ့အပှၤ လၢစိၤခဲအံၤမ့ၢ်ဂ့ၤဒီး လၢညါမ့ၢ်ဂ့ၤအဃိလီၤ.

မုၢ်မဆါတနံၤအံၤ ဖဲပှၤအါဂၤ ဘၣ်ကွၢ်ဆၢၣ်မဲာ်ဒီး တၢ်ကီတၢ်ခဲအခါ အဝဲသ့ၣ်ဃုဝဲ ကစၢ်ယွၤအတၢ်မၤစၢၤဒ် စီၤပၤဒၤဝံးအသိးလီၤ. ဘၣ်တဘျီ စီၤဒၤဝံးဃ့ကညးဝဲ ယဟိဝၤယွၤလၢ “ကနၣ်ယဃ့ကညးတၢ်အကလုၢ်တက့ၢ်.” မ့ၢ်ကစၢ်ယွၤစံးဆၢက့ၤ အတၢ်ထုကဖၣ်ဧါ. စံးဆၢက့ၤဝဲလီၤ. စီၤဒၤဝံးစံးကဒီးဝဲလၢ– “ယဒိးတၢ်မၤစၢၤယၤ, မၤသးဒ်န့ၣ်ဒီး, ယသူၣ်ဖှံသးညီဒိၣ်မး” လီၤ.—စံးထီၣ်ပတြၢၤ ၂၈:၂, ၇.

ကစၢ်ယွၤအဲၣ်ဒိးဝဲလၢ ယ့ၣ်ၡူးကမၤမုာ်ထီၣ်က့ၤပှၤန့ၣ်လီၤ. ကစၢ်ယွၤဟ့ၣ်လီၤအီၤ မူဒါအကျါတမံၤန့ၣ်မ့ၢ်ဝဲ “ကမၤဘျါက့ၤ ပှၤအသူၣ်ကၢ်အသးလီၤ” ဒီး “ကမၤမုာ်ထီၣ်က့ၤ ကယဲၢ်ပှၤလၢ အသူၣ်အုးအသးအုးခဲလၢာ်” လီၤ. (ယၡါယၤ ၆၁:၁, ၂) ဒ်ဝံအတၢ်စံးပာ် အိၣ်ဝဲအသိး ယ့ၣ်ၡူးအသးအိၣ်ဝဲပှၤဂၤ လီၤဆီဒၣ်တၢ် “ပှၤလၢတၢ်ဘှံးအသး, ဒီးဝံတၢ်ယိးတၢ်ဃၢခဲလၢာ်” တဖၣ်န့ၣ်လီၤ.—မးသဲ ၁၁:၂၈-၃၀.

ယ့ၣ်ၡူးမၤမုာ်ထီၣ်က့ၤပှၤဂၤ ခီဖျိ ဟ့ၣ်ကူၣ်အဝဲသ့ၣ်, ရ့ဝဲလၢ တၢ်သးကညီၤအပူၤ တကးဒံးဘၣ် မၤဘျါက့ၤ အတၢ်ဆူးတၢ်ဆါဒၣ်လဲာ်န့ၣ်လီၤ. ဘၣ်တနံၤပှၤဘၣ်တၢ်ဆါအၢတဂၤ ဃ့ကညးယ့ၣ်ၡူးလၢ– “နသးမ့ၢ်အိၣ်လၢ နကမၤကဆှီထီၣ်က့ၤယၤဒီး, နမၤသ့လီၤ.” လၢတၢ်သးကညီၤအပူၤ, ယ့ၣ်ၡူးစံးဆၢက့ၤအီၤလၢ– “ယသးအိၣ်, မ်နကဆှီထီၣ်က့ၤတက့ၢ်.” (မၢ်ကူး ၁:၄၀, ၄၁) ဒီးပှၤဘၣ်တၢ်ဆါအၢတဂၤန့ၣ် ဘျါက့ၤဝဲဒၣ်လီၤ.

မုၢ်မဆါတနံၤအံၤ ယွၤအဖိခွါ တအိၣ်ဒီးပှၤလၢဟီၣ်ခိၣ်ချၢ ဒ်သိးကမၤမုာ်ထီၣ်က့ၤ ပဝဲ တဂၤစုာ်စုာ်အသးဘၣ်. ဘၣ်ဆၣ် အပၢ်ယဟိဝၤယွၤလၢအမ့ၢ် “တၢ်မၤမုာ်ခဲလၢာ်အကစၢ်” န့ၣ်မၤစၢၤဒံးဝဲ ပှၤလၢအလိၣ်ဘၣ် တၢ်မၤစၢၤတဖၣ်လီၤ. (၂ ကရံၣ်သူး ၁:၃) ဆိကမိၣ်ကွၢ် တၢ်လွံၢ်မံၤလၢ ကစၢ်ယွၤသူဝဲ ဒ်သိးကမၤမုာ်ထီၣ်က့ၤပှၤအဂီၢ်န့ၣ်တက့ၢ်.

• လံာ်စီဆှံ. “အဂ့ၢ်ဒ်အံၤ, ဖဲဒၣ်တၢ်ကွဲးအသးတဘီလၢ်လၢ်န့ၣ်, ဘၣ်ကွဲးအသးလၢ ပဘၣ်တၢ်သိၣ်တၢ်သီအဂီၢ်, ဒ်သိးတၢ်ဝံသးစူၤ, ဒီးတၢ်မၤမုာ်ဘၣ်ဃးဒီး တၢ်ကွဲးအသးတဖၣ်သတးဒီး ပကအိၣ်ဒီးတၢ်မုၢ်လၢ်လီၤ.”—ရိမ့ၤ ၁၅:၄.

• ကစၢ်ယွၤ အသးစီဆှံ. ယ့ၣ်ၡူးသံဝံၤတယံာ်ဘၣ် အလီၢ်ခံ ခရံာ်ဖိတၢ်အိၣ်ဖှိၣ်ဖိဒီတဖု အိၣ်ဒီးတၢ်ဃူတၢ်ဖိးလီၤ. ဘၣ်မနုၤအဃိလဲၣ်. မ့ၢ်လၢအဝဲသ့ၣ် “လဲၤတၢ်လၢ တၢ်ပျံၤယွၤအပူၤ, ဒီးသးစီဆှံ” မၤမုာ်ထီၣ်က့ၤအဝဲသ့ၣ်အဃိလီၤ. (မၤတၢ် ၉:၃၁) သးစီဆှံလၢအမ့ၢ် ယွၤအစိကမီၤလၢ ကစၢ်သူဝဲဒ်သိး ကမၤလၢပှဲၤ အတၢ်ဘၣ်သးအဂီၢ်န့ၣ်လီၤ. ကစၢ်ယွၤ သူဝဲအစိကမီၤအံၤလၢ ကမၤမုာ်ထီၣ် ပှၤတဂၤဂ့ၤ တဂၤဂ့ၤ လၢအကွၢ်ဆၢၣ်မဲာ်ဘၣ် တၢ်ကီတၢ်ခဲသ့ဝဲလီၤ.

• တၢ်ထုကဖၣ်. လံာ်စီဆှံ ဟ့ၣ်ကူၣ်ပှၤလၢ “သုတဘၣ်ယိၣ်တၢ်နီတမံၤတဂ့ၤ.” ဒီးစံးဝဲလၢ, “ဘိးဘၣ်သ့ၣ်ညါယွၤ လၢသုတၢ်အဲၣ်ဒိးတဖၣ်န့ၣ်တက့ၢ်.‏ ဒီးယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်န့ၣ် ကပၢၤသုသူၣ်သုသးဒီး သုဆိကမိၣ်တၢ်လၢ ယ့ၣ်ၡူးခရံာ်အပူၤလီၤ.”—ဖံလံးပံၤ ၄:၆, ၇.

• ခရံာ်ဖိ ကဒဲကဒဲတဖၣ် ကဲထီၣ်ဝဲ ပတံၤသကိးနီၢ်နီၢ်တဖၣ်လၢ ပနာ်အီၤသ့ဒီး မၤမုာ်ထီၣ်ပသး ဖဲဆၢကတီၢ်ကီခဲအခါန့ၣ်လီၤ. တၢ်မၢဖိပီလူး ပာ်ဖျါထီၣ်ဝဲလၢ အတံၤသကိးတဖၣ်န့ၣ် ‘မ့ၢ်ပှၤလၢအမၤမုာ်အသး’ ဖဲ ‘တၢ်နးတၢ်ဖှီၣ်, ဒီးတၢ်ကိၢ်တၢ်ဂီၤ’ အကတီၢ်န့ၣ်လီၤ.—ကလီးစဲ ၄:၁၁; ၁ သ့းစၤလနံ ၃:၇.

ဘၣ်ဆၣ် နကဆိကမိၣ်ဘၣ်လၢ တၢ်သ့ၣ်တဖၣ်အံၤ မ့ၢ်အကဲဘျုးနီၢ်ကီၢ်ဧါန့ၣ်လီၤ. ပကကွၢ်သကိး ပှၤလၢအကွၢ်ဆၢၣ်မဲာ်ဘၣ် တၢ်ကီတၢ်ခဲတဖၣ် အတၢ်လဲၤခီဖျိအဂ့ၢ်န့ၣ်လီၤ. ဒ်အဝဲသ့ၣ်အသိး နကထံၣ်ဘၣ်လၢ ကစၢ်ယွၤမၤလၢပှဲၤဒံး အတၢ်အၢၣ်လီၤလၢအမ့ၢ်– “ဒ်ပှၤလၢအမိၢ်မၤမုာ်ထီၣ်က့ၤအီၤအသိးန့ၣ်, ယဲဒၣ်အံၤယကမၤမုာ်ထီၣ်က့ၤသု” န့ၣ်လီၤ.—ယၡါယၤ ၆၆:၁၃.