Ntumwa Paulu wayikila Yave * vo “Nzambi a fiauzi wawonso, ona okutufiaulwisanga muna mpasi zeto zawonso.” (2 Korinto 1:3, 4) Nkand’a Nzambi ukutusikidisanga vo, yeto awonso lusadisu lwa Nzambi tuvuidi o mfunu ye ke vena sumbula ko kilenda kutubwila o Se dieto kuna zulu kalembi kutufiaulwisa.

Avo tuzolele vo Nzambi katufiaulwisa, diambu tufwete vanga. Aweyi o dotolo kalenda kuwukila avo kuele ku lupitalu ko? Amose wa ngunza wayuvula vo: ‘Nga wantu wole balenda kwau kangala kumosi lembi teka wizana?’ (Amose 3:3) Nkand’a Nzambi ukutuwondelelanga vo: “Nufinama Nzambi, oyandi mpe okunufinama.”—Yakobo 4:8.

Aweyi tulenda kadila ye ziku vo Nzambi okutufinama? Diantete, o Nzambi nkumbu miayingi kekutuvovesanga vo yeto kazolele sadisa. (Tanga e  babu kina va ndambu.) Dianzole, tuna ye kimbangi kia wantu bafiaulwiswa kwa Nzambi, tuka kuna nz’ankulu ye mu lumbu yeto.

O unu, wantu ayingi belombanga lusadisu kwa Nzambi. Ntinu Davidi mpe i diau kavanganga muna mpasi zandi. Lumbu kimosi wadodokela Yave muna mvovo emi: “Wá nding’a ndodokela zame, ovo itâtìdi.” Nga o Nzambi wamvana e mvutu e? Davidi wavova diaka vo: ‘Nsadisu kwa Yave, o ntim’ame uyangalele.’—Nkunga 28:2, 7.

Yave wa Nzambi wasola Yesu kimana kafiaulwisanga wantu. Muna salu yawonso Yesu kavewa kwa Nzambi, wasolwa mpe mu ‘wuka awana babudikw’e ntima’ yo “fiaulwisa awonso bedilanga.” (Yesaya 61:1, 2) Wauna diasakulwa, Yesu watokanena o wantu ana ‘bafuntukanga yo bimuka yo mazitu.’—Matai 11:28-30.

Yesu wafiaulwisa wantu muna malongi mandi ma ngangu, muna mpil’ambote kakadilanga yau ye muna wuka yimbevo yau. Lumbu kimosi nkwa wazi wadodokela Yesu mu mvovo emi: “Avo ozolele wo, umpelelesa.” O Yesu wau kamwene nkenda,  umvovese vo: “Nzolele wo! Velela kwaku.” (Maku 1:40, 41) Nkwa wazi owukilu.

O unu kiaki, o Mwan’a Nzambi ke kalanga diaka ova nza ko muna fiaulwisa konso muntu mu yeto. Kansi o Yave wa Se diandi, “Nzambi a fiauzi wawonso,” osadisanga mimbona mpasi. (2 Korinto 1:3) Yambula twavovela mpila yá kesadilanga o Nzambi muna kutufiaulwisa.

• Nkand’a Nzambi. “Kadi mawonso mateka sonekwa, masonekwa muna kutulonga, kimana muna luzindalalu lweto ye muna lufiaulwisu lwa Sono, twakala ye vuvu.”—Roma 15:4.

• Mwand’avelela wa Nzambi. Vava Yesu kafwa, ke vavioka mvu miayingi ko, nkutakani yawonso ya Akristu yavuvama. Ekuma? E kuma kadi ‘yakangadilanga muna vumi wa Yave ye muna lufiaulwisu lwa mwand’avelela.’ (Mavangu 9:31) O mwand’avelela, i sia vo, ngolo za Nzambi, i nkuma ulembi sukanga. Nzambi olenda wo sadila muna fiaulwisa o wantu vava bebwilwanga e mpasi za mpila mu mpila.

• Sambu. Nkand’a Nzambi ukutuwondelelanga vo, “yambula ndomba zeno zazayiswa kwa Nzambi; o luvuvamu lwa Nzambi luna luviokele umbakuzi wawonso luyingila ntima mieno ye makani meno.”—Filipi 4:6, 7.

• Akweto Akristu balenda kala se akundi akieleka ana bekutufiaulwisa muna ntangw’a mpasi. Paulu wayikila akwandi vo, “nto a lufiaulwisu” muna tangwa “kondwa ye mpasi.”—Kolosai 4:11; 1 Tesalonika 3:7.

Kansi olenda kiyuvula vo, aweyi ediadi divangamenanga? Yambula twafimpa e nona ya wantu bayikilu muna longi diviokele ana bawanana ye mpasi. Obakula vo Nzambi olungisanga o nsilu andi: ‘Nze mwana ofiaulwiswa kwa ngudi andi, i mfiaulwisa ikunufiaulwisa.’—Yesaya 66:13.