Mutumibwa Polo utela Yehova * bu “Leza wa kusenga konso, wituseñanga mu byamalwa byetu byonso.” (2 Kodinda 1:3, 4) Pano Bible witukulupija’mba i kutupu muntu Leza wakomenwa kukwasha, kadi i kutupu kyamalwa kikolela Tata wetu wa mūlu pa kwitusenga.

Na bubine, tufwaninwe kulonga’po kintu shi tusaka Leza etusenge. Le dokitele ubwanya kwitukwasha namani shi ketukwetepo mulangwe wa kukemona nandi? Mupolofeto Amose wāipangwile’mba: “Lelo bantu babidi bakōkeja kunanga pamo bampikwa kupwana’ni, a?” (Amose 3:3) Bisonekwa bitusoñanya amba: “Fwenai kudi Leza, nandi ukemufwena.”​—Yakoba 4:8.

Le tukakulupila namani amba Leza uketufwena? Kibajinji bidi, i mwanda witulombolanga misunsa mivule amba usakanga kwitukwasha. (Tala   kapango.) Kya bubidi, i mwanda tukulupile bukamoni bwa bantu basengelwe na Leza​—bantu baikele’ko bine, ba pa kala ne ba dyalelo.

Pamo bwa bantu bavule dyalelo bakimbanga bukwashi kudi Leza, Mulopwe Davida nandi wātenwe na byamalwa bivule. Wāzenzele Yehova amba, “Ivwana diwi dya kwisasa kwami, po nakwela lubila.” Lelo Leza wāmulondolwele? En-en. Davida wābwejeje’ko amba: “Nami nakwashibwa: E po nsepelela ku mutyima wami pakatampe pene.”​—Ñimbo ya Mitōto 28:2, 7.

Leza wāsakile Yesu ekale na mwingilo mukatampe wa kuseñañana. Kutentekela pa mingilo mikwabo yāmupele Leza, Yesu wadi kadi wa “kūndapa ba mityima mityumuke” ne “kusenga bonsololo badila.” (Isaya 61:1, 2) Enka na mokyālailwe, Yesu wādi utele mutyima mu muswelo wa pa bula bantu “baputuma na mingilo ne balēmenenwe.”​—Mateo 11:28-30.

Yesu wāsengele bantu na kwibapa madingi a tunangu, kwibalongela bintu na kanye, ne kyaba kimo wādi wibondapa. Difuku dimo wa makopo wāzenzele Yesu amba: “Shi usakile, nankyo ntōkeje.” Yesu pa kumukwatyilwa lusa, wāmunena amba: “Nsakile. Tōka tō.” (Mako 1:40, 41) Wa makopo’wa wākoma.

Dyalelo, Mwanā Leza kakidipo pano panshi pa kusenga muntu ne muntu buntuntala. Inoko Shandi, Yehova, “Leza wa kusenga konso,” wendelelanga kukwasha boba basakilwa busengi. (2 Kodinda 1:3) Tutalei miswelo iná mikatampe ingidijanga Leza pa kusenga bantu.

• Bible. “Byonso byālembelwe pa kala byālembelwe mwanda wa kwitufundija, amba pa kūminina kwetu ne pa kusengwa na Bisonekwa twikale na lukulupilo.”​—Loma 15:4.

• Mushipiditu Ujila wa Leza. Kinondanonda’tu na lufu lwa Yesu, kipwilo kyonso kya bene Kidishitu kyāikele mu kitatyi kya ndoe. Mwanda waka? Mwanda kyādi “kinangila mu kwakamwa Yehova ne mu kusengibwa na mushipiditu ujila.” (Bilongwa 9:31) Mushipiditu ujila, bukomo bwa Leza bwingila, i mukomo. Leza ubwanya kwiwingidija pa kusenga muntu ne muntu mu ngikadilo yo-yonso.

• Milombelo. Bible witudingila’mba, “Kemwakikambakanyai mityima pa kintu nansha kimo.” Kadi amba, “yukijai Leza byomulomba mu milombelo ne kwabija pamo ne kufwija’ko; kadi ndoe ya Leza itabukile milangwe yonso ikalama mityima yenu ne ñeni yenu.”​—Fidipai 4:6, 7.

• Bengidi Netu Bene Kidishitu babwanya kukusenga ‘pampikwa kyaka’ bu balunda bayampe. Mutumibwa Polo wātelele banabetu bu “nsulo ya kusengibwa kukatampe” mu “tusua ne mu byamalwa.”​—Kolose 4:11; 1 Tesalonika 3:7.

Inoko padi wiipangulanga mwine mulongekelanga ino mingilo. Leka bidi tutale mwasengēlwe bantu batelelwe ku ngalwilo batenwe na makambakano. Pamo bwa abo, nobe ubwanya kumona’mba Leza ukyendelela kufikidija mulao wandi ukunka mutyima wa amba: “Monka musengela inamuntu mwana, e monka nami mo nemusengela.”​—Isaya 66:13.