Apostolu Paulu wapopia okuti Jeova * “o Huku weungumaneso aliho, utuungumanesa mononkhumbi mbetu ambuho.” (2 Coríntios 1:3, 4) Ombimbiliya itupopila okuti petupu omunthu wehesukisile ekuateso lia Huku iya kutupu otyiponga otyinene tyityilika Tate yetu keulu opo etupameke.

Inkha ongotyo, pena etyi tuna okulinga opo Huku etupameke. Oñgeni ondotolo ipondola okutukuatesako inkha onthue katuapopile nae otyitateka tyetu? Omuuli Amosi wapula okuti: “Ovanthu vevali vapondola okuenda kumwe inkha kavelilaele?” (Amós 3:3, okatoi) Ovihonekwa vitupopila okuti: “Fuenei ku Huku, nae opo afuene kuonwe.”​—Tiago 4:8.

Oñgeni onthue tupondola okukala nonthumbi yokuti Huku mafuene kuonthue? Tete, omokonda apeho utupopila okuti uhanda okutukuatesako. (Tala  okakasa monthele ei.) Vali, omokonda onthue twii ovanthu vakuatesilueko na Huku​—ovanthu vokohale, no vomo nonthiki mbetu.

Ngetyi ovanthu hono ovanyingi vekahi nokuovola ekuateso lia Huku, Ohamba David nae ankho wakalele novitateka vielifwa novio. Weliyava ku Jeova okuti: “Nthehelele tyina ndyikuita opo unkhuateseko.” Oñgeni Huku emukumbulula? David wapopia okuti: “Ame ndyihole okukuatesiwako noove iya omutima wange uhambukwa.”​—Salmo 28:2, 7.

Huku wapopia okuti Jesus una otyilinga tyokupameka. Povilinga vimwe Huku emuavela, ankho “oviokupameka vana vena omitima vieihamenwa iya nokupameka vana veliyava.” (Isaías 61:1, 2) Ngetyi tyapopiwa, Jesus ankho usuka vali haunene novanthu ankho “valemenwa iya vaponwa.”​—Mateus 11:28-30.

Jesus wapamekele ovanthu pokuveavela omalondolo nounongo, tupu ankho uvekuatesako nokankhenda iya ovikando vimwe wahakulile ovavei. Onthiki imwe omunthu umwe ankho una otyilundu wapopilile Jesus okuti: “Inkha ove uhanda, upondola okumbelula.” Mokonda ankho una okankhenda akumbulula okuti: “Ame nahanda! ­Veluka.” (Marcos 1:40, 41) Iya omunthu oo aveluka.

 Hono, Omona wa Huku kekahi vali pano pohi opo etupameka ngetyi alingile kohale. Mahi, Tate yae Jeova “Huku weungumaneso aliho,” utualako okukuatesako vana vena ovitateka. (2 Coríntios 1:3) Tala ononkhalelo ononkhuana mbakolela vali Huku aundapesa opo akuateseko ovanthu.

• Ombimbiliya. “Ovipuka aviho viahonekwa kohale, viahonekwa pala okutulonga, opo tukale nekevelelo, mokonda yekoleleyo lietu neungumaneso lio Vihonekwa.”​—Romanos 15:4.

• Ospilitu sandu ya Huku. Tala okuti konyima yononkhia mba Jesus, ewaneno Liovakristau liakalele momuvo wombembwa. Omokonda yatyi? Omokonda “ankho vaendela monthilo ya Jeova no meungumaneso liospilitu sandu.” (Atos 9:31) Ospilitu sandu, ononkhono mba Huku, mbuna epondolo enene. Huku upondola okuyuundapesa opo apameke kese umwe ponthue.

• Elikuambelo. Ombimbiliya itulondola okuti: “Muhakalei notyiho notyipuka natyike.” Mahi itupolila okuti: “Itei unene ku Huku momalikuambelo kumwe nolupandu iya ombembwa ya Huku, ipona onondunge nomalusoke aeho, maiyungu omitima vienyi nomalusoke.”​—Filipenses 4:6, 7.

• Ovakuatate Ovakristau omapanga otyotyili apondola okutuavela ‘ekuateso’ liapama. Apostolu Paulu wapopia okuti ovakuatate vetu “ondyivi-ndyivi yeungumaneso enene” momuvo “wononkhumbi.”​—Colossenses 4:11; 1 Tessalonicenses 3:7.

Mahi ove upondola okuhuva nonkhalelo vetyilinga. Tutalei liwa-liwa onongeleka mbovanthu vamwe vakalele novitateka vapopiwa konthyimbi. Ngo vanthu ovo, noove upondola okukala nonthumbi yokuti Huku makafuisapo omulao wae pano pohi wati: “Ngetyi ina akengelela omona wae, naame mandyitualako okumukengelela.”​—Isaías 66:13.