Apostel Pablo a describi Jehova * como e “Dios di tur consuelo, kende ta consola nos den tur nos tribulacionnan.” (2 Corintionan 1:3, 4) Pues, Bijbel ta sigura nos cu Dios por yuda tur hende y cu no tin niun tragedia cu por stroba nos Tata celestial di consola nos.

Claro cu nos mester haci algo si nos kier consuelo for di Dios. Pensa riba esaki: Con un dokter por yuda nos si nunca nos no a traha un cita pa bay cerca dje? Profeta Amos a puntra: “Dos hende ta cana hunto, sin cu nan a bay di acuerdo cu otro?” (Amos 3:3) Pesey e Scritura ta urgi nos: “Hala cerca Dios, y lo e hala cerca boso.”—Santiago 4:8.

Con nos por ta sigur cu Dios lo hala cerca nos? Prome, e mes ta sigura nos bes tras bes cu e kier yuda nos. (Wak e  cuadro na pagina 5.) Di dos, nos tin pruebanan confiabel di hende cu Dios a consola tanto den pasado como den nos tempo.

Mescos cu hopi hende awe cu ta busca yudansa di Dios, Rey David tambe a pasa den hopi tragedia. Un biaha el a roga Jehova: “Tende na e bos di mi suplicanan ora mi sclama na bo pa yudansa.” Dios a contest’e? Si. David a agrega: “Mi ta wordo yuda; pesey mi curason ta regociha.”—Salmo 28:2, 7.

Dios su proposito tabata pa Hesus hunga un papel importante den duna hende consuelo. Un di e tareanan cu Dios a duna Hesus tabata pa “cura hende di curason kibra” y pa “consola tur esnan cu ta yora.” (Isaias 61:1, 2) Manera Bijbel a profetisa, Hesus a mustra un interes special den hende cu tabata “traha duro y cu [tabata] carga.”—Mateo 11:28-30.

Hesus a consola hende pa medio di su consehonan sabi, su manera bondadoso di trata cu nan y, den algun caso, ora el a cura nan maleza. Un dia un leproso a roga Hesus: “Si bo kier, bo por cura mi.” Compasion a conmove Hesus, y el a contest’e: “Mi kier. Sea cura.” (Marco 1:40, 41) Anto el a cura e leproso.

 Awe, e Yiu di Dios no ta riba Tera pa duna nos consuelo. Pero su Tata, Jehova, e “Dios di tur consuelo”, ta sigui yuda hende cu tin mester di yudansa. (2 Corintionan 1:3) Laga nos analisa cuater manera cu Dios ta consola hende.

• Bijbel. “Tur loke a ser skirbi anteriormente a ser skirbi pa nos instruccion, pa asina mediante nos perseverancia y e consuelo for di e Scritura nos por tin speransa.”—Romanonan 15:4.

• Dios Su Spirito Santo. Poco tempo despues di Hesus su morto, henter e congregacion cristian tabatin un periodo di paz. Dicon? Pasobra “henter e congregacion tabata cana den temor di Jehova y biba na harmonia cu e consuelo cu nan a ricibi di spirito santo.” (Echonan 9:31) Spirito santo, esta, Dios su forsa activo, ta hopi poderoso. Dios por uz’e pa consola cualkier hende den cualkier circunstancia.

• Oracion. Bijbel ta conseha nos: “No sea ansha tocante nada.” Mas bien, e ta bisa: “Laga Dios sa kico ta boso peticionnan; y e paz di Dios cu ta surpasa tur comprondemento lo proteha boso curason y boso mente.”—Filipensenan 4:6, 7.

• Rumannan Cristian por ta berdadero amigonan cu nos por confia ora nos ta pasa den situacion dificil. Apostel Pablo a describi su rumannan como “un fuente di gran consuelo” den tempo di “angustia y tribulacion.”—Colosensenan 4:11; 1 Tesalonicensenan 3:7.

Pero kisas bo ta puntra bo mes con tur esaki por ta posibel. Laga nos wak algun experencia di hende cu a enfrenta e problemanan menciona den e articulo anterior. Mescos cu nan, bo tambe por mira cu te ainda Dios ta cumpli cu e promesa aki: “Manera un mama ta konsolá su yu, asina Ami tambe lo duna boso konsuelo.”—Isaias 66:13, BPK.