Apostol Pablom Jehova * Diosmanta rimaspan nirqa: “Paymi tukuy sasachakuyninchikpi sunqunchikta tiyaykachin”, nispa (2 Corintios 1:3, 4). Bibliapa kayna nisqanmi qawachiwanchik ima sasachakuypiña kaptinchikpas Diosqa llapallanchikta yanapaykuwananchikmanta.

Ichaqa, ¿imatataq ruwananchik Dios yanapawananchikta munaspaqa? Piensariy kaypi, ¿imaynatataq doctorqa yanapawachwan paywan rimananchikpaq mana mañakuptinchikqa? Diosmanta willakuq Amospas kaynatam nirqa: “Iskay runakunaqa manam purinmanchu manaraq tanteanakuchkaspaqa”, nispa (Amos 3:3). Chayraykum bibliaqa niwanchik: “Diosman asuykuptikichikqa paypas asuykusunkichikmi”, nispa (Santiago 4:8).

¿Imaynanpitaq mana iskayrayachwanchu Diosqa asuykamuwaspanchik yanapawananchikmanta? Kikin Diospunim bibliapi niwanchik yanapawayninchikta munasqanmanta (qaway “ Diosqa consuelaykuytam munawanchik” niqta, pag. 5). Chaymantapas bibliapim nin ñawpa tiempopi serviqninkunata Diosqa yanapaykusqanmanta, kay tiempopipas achkaqmi willakunku Dios yanapaykusqanmanta.

Kamachiq Davidpas kay tiemponchikpi runakuna hinam hatun sasachakuykunapi tarikuspa Diospa yanapakuyninta maskarqa. Kaynatam Diosta mañakurqa: “Qamtaq uyariykullaway qaparispa ruegakullasqayta”, nispa. ¿Uyariykurqachu Jehova Diosqa? Arí, uyariykurqam, chaymi David nirqa: ‘Payqa ñuqallaytam yanapaykuwarqa. Chaymi kusikuywan llimparichkan sunqullaypas’, nispa (Salmo 28:2, 7).

Diosqa Jesustam churarun yanapaqninchik kananpaq, paytam kamachirqa ‘llapallan llakisqakunata consuelananpaq’ (Isaias 61:1, 2). Bibliapa willakusqanman hinam Jesusqa ‘llapallan hukmanyasqakunata hinaspa llasaq qipiyuq’ hina kaqkunata sumaqta yanapaykurqa (Mateo 11:28-30).

Jesusqa runakunatam yanaparqa sumaqllata imamantapas rimapayaykuspa hinaspa paykunawan kuyakuq kaspan. Huk kutipim leprawan unquq runa ruegakurqa: “Munaspaykiqa sanoyaykachillawayá”, nispa. Chaymi Jesusñataq llakipayariykuspan nirqa: “Munanim sanoyanaykita, allinyayñayá”,  nispa (Marcos 1:40, 41). Hinaptinmi sanoyarurqa.

Jesus kay allpa pachapi manaña kaptinpas “tukuy imapi sunqu tiyaykachiq Diosmi” ñakariqkunataqa hinalla yanapachkan (2 Corintios 1:3). Qawasun imakunawan yanapawasqanchikmanta.

• Bibliawan. “Ñawpaq tiempopi tukuy ima qillqasqa kaqkunaqa yachachiwananchikpaqmi qillqasqa kachkan. Chaynapi tukuy imata aguantaspanchik hinaspa Diospa qillqanwan sunqunchikta tiyaykachispanchik Diospa quwananchikta suyananchikpaq” (Romanos 15:4).

• Chuya espiritunwan utaq atiyninwan. ¿Imanasqataq Jesuspa qatiqninkunaqa hawkalla karqaku Jesus wañukuptinpas? Bibliam nin ‘chuya espiritupa consuelasqanrayku’ hawka kawsakusqankuta (Hechos 9:31). Diosqa chuya espiritunwanmi sasachakuypi tarikuq runakunata yanapan.

• Mañakusqanchikta uyarispa. “Amayá imamantapas afanakuychikchu, aswanqa Diosmanyá lliwta willakuychik tukuy tiempo mañakuspaykichik, [...] hinaptinqa Diospa hawkayayninmi sunquykichiktawan yuyaynikichikta Cristo Jesusnintakama waqaychanqa”, nispa (Filipenses 4:6, 7).

• Diosta serviqkunawan. Diosta serviqkunapas sasachakuypi kaptinchikqa yanapawanchikmanmi. Apostol Pablom nirqa “tukuy llakipi hinaspa ñakariykunapi” tarikuptinpas iñiqmasinkuna ‘anchata kallpanchaykusqanmanta’ (1 Tesalonicenses 3:7; Colosenses 4:11).

Qamqa ninkipaschá: “¿Chiqaptachu chaykunaqa yanapawanman?”, nispa. Qawasunchikyá qallariyllanpi rimamusqanchik runakunata imayna yanapasqanta. Paykuna hinam qampas qawanki Diosqa palabranpi niwasqanchikman hina consuelawasqanchikta, paymi nin: ‘Imaynam maman consuelan wawanta chaynatam consuelasqaykichik qamkunatapas’, nispa (Isaias 66:13).