Apóstol Pabloca nircami, Jehová * Diosmi “tucuipi cushichij Taita Dios. Ñucanchita jatun llaquicuna japijpipash, Diosmi cushichin” nishpa (2 Corintios 1:3, 4). Bibliapi nishca shinaca, Taita Diosca tucuicunatami ayudaita ushan. Ima llaquicunapi cajpipash jahua pachapi Taita Diosmi ñucanchita cushichita ushan.

Taita Dios cushichichunga ¿imatata rurana canchi? Pensaripai. Na doctorpaman rijpica ¿imashinata doctorca jambinga? Bibliapica ninmi: “Taita Diospajman quimirichi. Shina quimirijpica, paipash cangunapajman quimiringami” nishpa (Santiago 4:8).

Shinapash ¿ciertopachachu Taita Diosca ñucanchiman quimiringa? Ishcai yuyaicunata ricupashun. 1) Bibliapica cutin cutinmi Taita Diosca nishca, cangunata ayudashami nishpa (cati paginapi  recuadrota ricupangui). 2) Ñaupa punllacunapi gentecunapash, cunanbi gentecunapashmi nishca, Taita Diosca ciertopacha ayudanmi nishpa.

 Rey Davidca cunanbi gentecunashnallata ashtaca llaquicunahuan cashpami Taita Diostaca cashna nishpa mañarca: “Caparishpa, canda ñuca mañajujtaca uyahuayari” nishpa. Rey David mañajpica ¿Taita Diosca uyarcachu? Ari uyarcami. Chaimandami rey Davidca nirca: “Ñuca shungupica, paitalla yariajpimi ayudahuarca. Chaimandami, ñuca shungupica cushijurcani” nishpa (Salmo 28:2, 7).

Taita Diosca gentecunata Jesús cushichichunmi munarca. Chaimandami Jesustaca ‘shungu faquirinshna llaquirijcunata ayudachun, llaquilla causajcunata cushichichun cachamurca’ (Isaías 61:1, 2). Jesusca Jehová Dios munashca shinami ‘shaijushcashna, aparishcashna causajcunata’ cushichishpa ayudarca (Mateo 11:28-30).

Jesusca ali consejocunata cushpa, ali tratashpa, huaquinbicarin ungushcacunata jambishpami gentecunata cushichirca. Shuj punllaca lepra ungüita charij runagumi Jesustaca ‘¿nacha [jambihuanguiman]? nishpa mañarca’. Chai runaguta uyashpaca Jesusca ninanda llaquirishpami nirca: “Ari [jambishallami]. Cunanga, ñami ali cangui nirca” (Marcos 1:40, 41).

Taita Diosca ‘tucuipi cushichij Taita Diosmi’ can. Chaimandami paipa Churi Jesús ñana cai Alpapi cajpipash sufrijuj gentecunataca ayudashpa catin (2 Corintios 1:3). Shinaca ¿imashinata Taita Diosca ayudan? Chuscu yuyaicunata ricupashun.

• Bibliatami cushca. ‘Ñucanchi yachajuchunmi Taita Diosca ñaupallata escribichishca. Chai Shimicunami cushijushpa causanata ñucanchiman yachachijun. Shinamandami japigrinata yariajlla shuyanajunchi’ (Romanos 15:4, Mushuj Testamento Quichua Imbabura).

• Espíritu santotami cushca. Bibliapica ninmi, Jesusta catijcunaca ‘Taita Diosta manllaimanda’, shinallata ‘Diospa jucha illaj espíritu ushaita’ carajpimi Jesús huañujpipash tranquilo carca nishpa (Hechos 9:31). Shinaca Taita Diospa espíritu santoca ashtaca ushaitami charin. Taita Diosca paipa espíritu santota cushpami gentecunataca ima llaquipi cajpipash cushichishpa ayudangapaj munan.

• Oraciondami cushca. Bibliapica ninmi: ‘Ima illajpipash na chaitalla yariashpa llaquilla causanachu canguichi. Ashtahuangarin Taita Diosmanmi imatapash villashpa ninanda mañana canguichi. Casilla ali causaitaca Taita Diosmi caramunga. Cangunapa shungutapash, yuyaicunatapashmi huacaichijunga’ nishpa (Filipenses 4:6, 7).

• Huauquipanicunatami cushca. Cushichichun munashpaca huauquipanicunapa ayudatami mascana canchi. Apóstol Pabloca nircami, ñucanchicuna ‘imagupash illaj cajpi, llaquipi’ cajpica huauquipanicunami ñucanchitaca ‘ninandapacha cushichirca’ nishpa (Colosenses 4:11; 1 Tesalonicenses 3:7).

Cai chuscu ayudacunata liishpaca ¿nachu pensaripashcangui llaquilla cajpica ciertopachachu Taita Diosca ayudahuanga nishpa? Cai chuscu ayudacuna ali cajta yachangapaca callari temapi parlashca huaquin gentecuna imata nijta ricupashun. Shinami quiquinbash llaquicunapi cajpica: ‘Shuj mama paipa huahuata cushichijpishna’ Taita Dios quiquinda cushichijta cuenta japingui (Isaías 66:13).