Apostoli Paulu yange kaa ér Yehova * ka ‘Aôndo u A lu a ishimasurun cii yô, surun se asema sha atsan a ase cii.’ (2 Mbakorinte 1:3, 4) Sha nahan yô, Bibilo pase se wang ér or môm kpa zayol u nan gande u Aôndo una wase nan ga, shi kwagh u vihin môm u una er se ve a hemba Ter wase u sha la u surun se asema je kpa ngu ga.

Nahan kpa, aluer se soo ser Aôndo a sur se ishima yô, a gba u se er kwagh. U tesen ikyav yô, aluer se za ser ortwer nana nenge se angev ga nahan, a er nan ve nana sôr se mbu? Profeti Amoshi yange pine ér: ‘Iorov uhar vea gba zenden imôngo tsô, aluer ve vande zuan ga kpaa?’ (Amoshi 3:3) Sha nahan yô, Ruamabera kaa a vese ér: “Kporom nen hen Aôndo, Un kpaa, Una kporom her a ven.”—Yakobu 4:8.

A er nan man se fa ser mimi je Aôndo una kporom her a vese? Hiihii yô, ka sha ci u a kaa a vese kwa kimbir kimbir ér un soo u wasen se. (Nenge  ngeren u kiriki u a baa sha ngun la.) U sha uhar yô, ka sha ci u ior mbagenev ôr se akaa a wasen se u fan ser mimi je Aôndo yange sur ve asema yô. Ka ior mba sha ayange ase ne man mba sha ayange a tsuaa la.

Ior kpishi mba keren iwasen hen Aôndo nyian er Tor Davidi u ngise tagher a akaa a vihin tsung ken uma na la nahan. Kwagen la zamber a Yehova ér: “Ungwa imo i uzamber av, zum u me yila U yô.” Nahan Aôndo ungwa un kpa? Een. Davidi shi kaa ér: “M [zua] a iwasen, nahan yô, ishima yam ngi ember tsung.”—Pasalmi 28:2, 7.

Aôndo yange wa ishima ér Yesu a lu ityough sha tom u surun ior asema la. Tom ugen u Aôndo na Yesu yô, lu u a “sur mba asema a vihi ve la asema,” shi “mba ve zungu cii, [A̱] sur ve asema.” (Yesaia 61:1, 2) Ior mba yange ‘vôr ve iyol shi ikyav yuhwa ve la cii’ yange kwagh ve gba Yesu ishima tsung, er i tsengaôron nahan.—Mateu 11:28-30.

Yesu yange a sur ior asema sha u wan ve kwagh u injaa, man sha u eren a ve kundu kundu kua sha u been ve iangev je kpaa. Iyange igen la orimande ugen zamber a Yesu ér: “Aluer wea lumun yô, U fatyô u wanger mo.” Tsô er mhôônom kôr Yesu yô, A kaa a na ér: “M lumun, i̱ wanger we.” (Marku 1:40, 41) Imande i or shon maa bee.

 Nyian ne, wan u Aôndo ngu shin tar ne u una sur se asema ga. Kpa Ter na, Yehova, “Aôndo u A lu a ishimasurun cii” la, ngu wasen mba ve lu keren ishimasurun la her. (2 Mbakorinte 1:3) Nenge igbenda i vesen i inyiin i Aôndo a surun ior asema yô.

• Bibilo. “Akaa a i vande ngeren la cii ka sha ci u ityesen yase lu i nger a ye, lu sha u se̱ lu a ishimaverenkeghen sha ishimawan man ishimasurun i ken icighanruamabera la.”—Mbaromanu 15:4.

• Icighan Jijingi u Aôndo. Shighe u Yesu kpe ica lu a gba ga la, bem gba sha nongo u Kristu jimin cii. Sha ci u nyi? Sha ci u “[Mbakristu] lu zenden ken mciem ma Ter man ken msurshima u Icighan Jijingi.” (Aerenakaa 9:31) Icighan jijingi u a lu tahav mbu Aôndo a eren tom a mi la, ngu a wase se kpishi. Aôndo una fatyô u eren tom a na sha u surun anti or cii ishima ken nyityô zayol u nan lu ker cii.

• Msen. Bibilo wa se kwagh ér: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun, man bem u Aôndo u a gande hanma mfe wase cii una kura asema a en man mbamhen enev . . . ye.”—Mbafilipi 4:6, 7.

• Angbianev mba ken Kristu kpa vea fatyô u lun azende ase a surun se asema shighe u se tagher a mbamtaver yô. Apostoli Paulu yange ôr kwagh u mbaeren tom a na imôngo er yange ‘ve sur un ishima kpishi’ ken ‘hanma zayol na man mtev u sha ican’ cii yô.—Mbakolose 4:11; 1 Mbatesalonika 3:7.

Kpa alaghga a taver we u nengen er or a fatyô u zuan a ishimasurun sha igbenda i se ter ne nahan yô. De se seer nengen kwagh u ior mba yange ve lu a mbamzeyol mba se vande teren ken ngeren u hiihii la yô. We kpa u fatyô u nengen er ityendezwa i kôron ken ishima i Aôndo a er ne ia kure sha a we, er ve nahan yô. I kaa ér: “Er or u ngô u nan ka a sur nan ishima nahan, kape Mo kpaa Me sur ne asema la.”—Yesaia 66:13.