Apóstol Pabloeʼ tu yaʼaleʼ Jéeobaeʼ * letiʼe «Dios mantatsʼ ku líiʼsaj óoloʼ» yéetel «ku líiʼsik k-óol tiʼ tuláakal le baʼaxoʼob k-muʼyajtikoʼ» (2 Corintoiloʼob 1:3, 4). Le Bibliaoʼ ku yaʼalikeʼ Dioseʼ ku yáantik tuláakal máak, yéetel kex jeʼel bukaʼaj yajil baʼax k-aktáantikeʼ jeʼel u líiʼsik k-óoleʼ.

Chéen baʼaleʼ yaan baʼax kʼaʼabéet k-beetik wa k-kʼáat ka u líiʼs k-óol Dios. Tukult lelaʼ: wa maʼ ta bin yiknal doctoreʼ, ¿jeʼel wa u tsʼakikecheʼ? Le oʼolal le Bibliaoʼ ku yaʼalik baʼax unaj k-beetik: «Natsʼabaʼex tiʼ Dios, letiʼ túuneʼ bíin u natsʼuba tiʼ teʼex» (Santiago 4:8).

Pero ¿bix k-ojéeltik wa jeʼel u natsʼkuba Dios tiʼ toʼoneʼ? Yáaxeʼ yaʼab u téenel ku yaʼalik u kʼáat u yáantoʼon ( ilawil u cuadroil le xookaʼ). U kaʼapʼéeleʼ k-ojel yaan máaxoʼob tsʼoʼok u yáantaʼaloʼob tumen Dios úuchjeakil yéetel bejlaʼeʼ.

Jeʼex u yúuchul tiʼ yaʼab máakoʼob kaxtik u yáantaj Dios bejlaʼoʼ, rey Davideʼ yaʼab xan úuchik u muʼyaj. Juntéenjeakeʼ tu kʼáat óoltaj tiʼ Jéeoba: «Uʼuy in awatoʼob[,] táan in kʼáatiktech áantajil». ¿Uʼuyaʼab wa tumen Dios? Davideʼ ku yaʼalik: «Letiʼ túuneʼ ka tu yáantajen. In puksiʼikʼaleʼ kiʼimak[chaj] u yóol» (Salmo 28:2, 7).

Dioseʼ tu kʼubéentaj tiʼ Jesús ka u líiʼs k-óol. Ichil le baʼax kʼubéentaʼan tiʼ Jesús ka u beetoʼ táakaʼan u «tsʼáa[ik] u yóol máaxoʼob yaj u yóoloʼob» yéetel u «kiʼimakkúun[tik] u yóol tuláakal máaxoʼob okʼom óoloʼob» (Isaías 61:1, 2). Jeʼex aʼalaʼabikoʼ Jesuseʼ tu tsʼáaj u yóol u yáant le ‹máaxoʼob yaʼab u meyajoʼob yéetel aal u kuuchoʼoboʼ› (Mateo 11:28-30).

Tu líiʼsaj u yóol máak yoʼolal baʼax tu kaʼansaj bey xan yoʼolal bix tu tratartil. Juntéenjeakeʼ juntúul máak yaan lepra tiʼeʼ tu yaʼalaj tiʼ Jesús: «Wa teech a kʼáateʼ jeʼel u páajtal a tsʼakikeneʼ». Jesuseʼ tu chʼaʼaj óotsilil tiʼeʼ ka tu yaʼalaj: «In kʼáat. Utschajkech» (Marcos 1:40, 41). Bey úuchik u tsʼakik le kʼojaʼanoʼ.

Bejlaʼeʼ Jesuseʼ maʼ tu yéemel way Luʼum utiaʼal u líiʼsik k-óoleʼ, baʼaleʼ Jéeoba, «le Dios mantatsʼ  ku líiʼsaj óoloʼ», láayliʼ táan u yáantik le máaxoʼob kʼaʼabéet áantaj tiʼoboʼ (2 Corintoiloʼob 1:3). Koʼox ilik kanpʼéel baʼaxoʼob ku meyaj tiʼ Dios utiaʼal u líiʼsik k-óol.

• Le Bibliaoʼ. «Tuláakal le baʼaxoʼob tsʼíibtaʼaboʼob úuchjeakiloʼ tsʼíibtaʼaboʼob utiaʼal k-kaanbal, utiaʼal beyoʼ ikil u chúukpajal k-óol yéetel ikil u líiʼsaʼal k-óol tumen le Kiliʼich Tsʼíiboʼoboʼ, ka yanaktoʼon esperanza.» (Romailoʼob 15:4.)

• U kiliʼich muukʼ Dios. Le maʼ úuch kíimik Jesusoʼ anchaj jeetsʼelil ichil le cristianoʼoboʼ. ¿Baʼaxten? «Tumen u chʼaʼamoʼob saajkilil tiʼ Jéeoba yéetel tumen ku chaʼik u muʼukʼaʼankúuntaʼal u yóoloʼob tumen le kiliʼich muukʼoʼ.» (Baʼaxoʼob [Hechos] 9:31.) Jach nojoch u páajtalil u kiliʼich muukʼ Dios, wa espíritu santo. Lelaʼ jeʼel u meyajtiʼ utiaʼal u líiʼsik u yóol máak kex jeʼel baʼaxak ku aktáantikeʼ.

• Oración. Le Bibliaoʼ ku yaʼalik: «Maʼ a sen chiʼichnaktaleʼex tu yoʼolal mix baʼal [...], aʼaleʼex tiʼ Dios baʼax a kʼáateʼex; bey túunoʼ u jeetsʼelil Dios ku táatsʼmáansik tuláakal tuukuloʼobeʼ yaan u kanáantik a puksiʼikʼaleʼex yéetel a tuukuleʼex» (Filiposiloʼob 4:6, 7).

• Máaxoʼob meyajtik Dios t-éeteleʼ jeʼel u líiʼskoʼob xan k-óoleʼ. Apóstol Pabloeʼ tu yaʼalaj bix líiʼsaʼabik u yóol tumen u amigoʼob le táan u sen muʼyajoʼ: «Jach tsʼoʼok u líiʼskoʼob in wóol» (Colosasiloʼob 4:11; 1 Tesalonicailoʼob 3:7).

¿A kʼáat wa a wojéelt bix jeʼel u yáantkech le baʼaxoʼob tsʼoʼok k-ilkaʼ? Koʼox ilik baʼax áant le máaxoʼob t-aʼalaj teʼ yáax xookoʼ. Jeʼex letiʼobeʼ, yaan a tsʼáaik cuentaeʼ Dioseʼ láayliʼ táan u béeykuntik le baʼax u yaʼalmaʼ: «Jeʼel bix u kiʼimakkúuntaʼal u yóol juntúul paal tumen u maamaeʼ, bey bíin in kiʼimakkúunt a wóoleʼexoʼ» (Isaías 66:13).