Si Seth * mandok, ”Ahu dohot tungganeborungku, si Priscilla, rap dipakaluar sian parkarejoan. Saleleng dua taon, diurupi keluarga do hami ala ndang sai adong karejonami. Ujungna, marsak situtu ma si Priscilla jala hira na so mararga be huhilala ngolungku.”

”Songon dia do hami mangadopi on? Diingot si Priscilla do hata ni Jesus di Mateus 6:34 na mandok, unang paholsohu hita taringot tu ari sogot, alana asing do hasusaan na taadopi ganup ari. Ala martangiang, gabe marhiras ni roha do ibana. Psalmen 55:23 ma na mangapuli rohangku. Songon panurat buku psalmen, hupasahat do sude holso ni rohangku tu Jahowa, jala dipargogoi do ahu. Nang pe naung adong karejongku, dihasabamhon hami do na adong di hami, songon poda ni Jesus di Mateus 6:20-22. Na rumingkot, ingkon tapajonok do tu Debata dohot tu dongan saripe.”

Si Jonathan mandok, ”Tingki bangkrut usahanami, ndang huboto songon dia mangalehon keluargangku mangan. Ala krisis ekonomi, suda ma na husari saleleng 20 taon. Marbadai ma hami alani hepeng. Ndang dipangke hami be kartu kredit, ala mabiar ndang boi be dipangke kartu kredit i.”

”Alai, poda ni Bibel dohot tondi parbadia mangurupi hami mamillit na dumenggan. Ndang mamilliti karejo ahu, jala ndang olo hami manuhor angka na so porlu. Sitindangi Ni Jahowa do hami, jala diurupi dongan sahaporseaon do  hami. Dipatogu jala diurupi nasida do hami tingki susa.”

Si Raquel mandok, ”Tingki ditadingkon tungganedolingku ahu, hansit hian do huhilala jala muruk do ahu. Mansai lungun do rohangku, alai hupajonok diringku tu Debata, jala diapuli do rohangku. Dung martangiang, dame ma huhilala. Songon na diubati Debata ma hansit ni rohangki.”

”Mandok mauliate do ahu tu Debata ala dilehon Bibel. Ndang sai jut be rohangku manang muruk. Sai huingot do hata ni si Paulus di Rom 12:21, ’Unang ma talu ho dibahen hajahaton; alai taluhon ma hajahaton i marhitehite na denggan.’ ”

”Sahalak dongan na burju mangurupi ahu asa unang sai lungun rohangku. Dipatudu ma Parjamita 3:6, jala didok ingkon rade do hita di ’tingki adong na mangago’. Sipasingot na posi do on nian, alai i do na huhaporluhon. Saonari, huboto ma aha na ingkon huulahon.”

Si Elizabeth mandok, ”Tingki marsirang, porlu do adong na mangurupi. Adong do donganku na sai mangurupi ahu ganup ari. Rap tangis do hami, diapuli jala dipapos do rohangku. Huhilala na dipangke Jahowa do ibana mangapuli ahu.”

Posi do sahit ni si Luis na dipaboa di artikel na parjolo, dua hali ma ibana naeng mate. Saonari, ingkon dioksigen do ibana saleleng 16 jom ganup ari. Didok ibana ma, ”Sai martangiang do ahu tu Jahowa. Dung i, huhilala do tondiNa mampargogoi ahu. Tangiang mambahen ahu tongtong marhiras ni roha. Porsea do ahu tu Jahowa jala diparrohahon do ahu.”

Si Petra na marumur 80 taon mandok, ”Godang do na laho huulahon, alai ndang boi. Lungun do rohangku alani i. Loja do huhilala ala ingkon sai mangallang ubat. Jotjot do hurimangi tangiang ni Jesus na mangido, molo boi asa  disalpuhon sitaononna. Alai, gogo do na dilehon Jahowa tu Jesus, suang songon i ma na huhilala. Songon ubat do tangiang di ahu. Lumbang ma pangkilalaanku dung martangiang.”​—Mateus 26:39.

Si Julian na marsahit multiple sclerosis saleleng 30 taon mandok, ”Nunga marganti be kursingku, sian kursi ni direktur gabe kursi roda. Alai, martua do ngolungku ala mangurupi na asing. Tingki taurupi na asing, ndang sitaononta i be na tapaingotingot. Diurupi Jahowa do hita tingki masa sitaonon. Songon na nidok ni apostel Paulus, ’Saluhutna do tarpatupa ahu marhitehite Ibana, na margogoihon ahu!’”​—Pilippi 4:13.

Si Antonio mandok, ”Tingki mate bapakku alani kecelakaan, songon na so porsea do ahu. Alana, mardalan pat do ibana tingki i. Alai, ndang adong na boi huulahon. Lima ari ma ibana ndang sadar jala laos marujung ngolu. Ndang olo ahu tangis di jolo ni omak, alai sai tangis do ahu tingki sahalakku. Sungkunsungkun do rohangku, ’Boasa ma masa on?’”

”Di tingki i, sai hupangido do pangurupion sian Jahowa asa boi huorom diringku jala asa dame pangkilalaanku. Lam leleng, lam dame ma huhilala. Huingot ma na didok Bibel, boi do masa tu hita ’tingki dohot parsorion’ na so panagaman. Ala ndang boi margabus Debata, pos do rohangku na boi pajumpang muse dohot bapakku di ari haheheon.”​—Parjamita 9:11; Johannes 11:25; Titus 1:2.

Si Robert na dipaboa di artikel na parjolo mandok, ”Ala martangiang hami tu Jahowa, dihilala hami do hadameon songon na didok di Pilippi 4:6, 7. Tingki disungkun reporter, boi ma denggan dipaboa hami na mangkirim do hami tu ari haheheon. Nang pe nunga marujung ngolu anaknami, alai godang do angka na denggan na diingot hami tingki rap dohot ibana. I do na sai diingot hami.”

”Didok dongan sahaporseaonnami, denggan do hami tingki patorangkon haporseaonnami di TV. Tutu ma, alani tangiang ni nasida do boi hami songon i. Porsea do ahu, Jahowa mangapuli rohanami marhite dongan sahaporseaon.”

Songon pengalaman naung taulas, boi do Debata mangapuli jolma nang pe marasingasing sitaononna. Songon dia molo hamu? Ndang soal songon dia sitaononmuna, adong do pangapulion na boi mangurupi hamu tingki susa. * Alani i, pangido ma pangurupion sian Jahowa, ala Ibana do ”Sipangapul na sumurung”!​—2 Korint 1:3.