Set * i talem se: “Mi mo waef blong mi, mitufala tugeta i lusum wok blong mitufala.” Blong tu yia, mitufala i mekem ol smosmol wok, mo sam famle oli givim smol mane. Tingting blong waef blong mi i foldaon bigwan, mo mi mi harem se mi gud blong nating nomo.

“?Mitufala i mekem wanem? Oltaem Prisila i tingbaot tok blong Jisas long Matiu 6:34, se yumi no mas wari long ol samting blong tumora, from we trabol blong wan dei i naf blong dei ya. Mo tu, hem i prea wetem fulhat blong hem, blong kasem paoa blong gohed. Long saed blong mi, Ol Sam 55:22 i mekem mi mi harem gud. Mi mekem olsem man we i raetem Sam ya, mi putum ol trabol blong mi long Jehova. Mo mi luk we Jehova i givhan long mi. Naoia mi faenem wok finis. Be mitufala i traem blong mekem se laef blong mitufala i no fasfas, olsem Jisas i talem long Matiu 6:20-22. Samting we i moagud, se mitufala i kam klosap moa long God, mo mitufala i lavlavem mitufala moa.”

Jonatan i talem se: “Smol bisnes blong mifala i brokdaon, mo mi no moa save wanem bambae i hapen long famle. Trabol long saed blong mane i mekem se, had wok blong mifala blong 20 yia i blong nating nomo. Mi mo waef blong mi i raorao from mane. Mifala i no moa save yusum kredit kad blong pem samting, from we mifala i no moa gat mane.

“Be Baebol mo tabu spirit i givhan long mifala blong mekem ol waes desisen. Mi lanem blong glad long enikaen wok, mo mifala i no moa pem samting we mifala i no nidim. From we mifala i Witnes blong Jehova, ol narafala Witnes oli givhan long mifala. Oli leftemap tingting blong mifala mo oli givim sam samting long mifala taem mifala i trabol gud.”

Raquel i talem se: “Taem hasban blong mi i lego mi, mi harem nogud mo mi kros. Mi no moa glad, i olsem we tudak i kavremap mi. Be mi kam klosap long God, mo hem i mekem mi mi harem gud bakegen. Evri dei, mi prea long God, mo hem i givim pis we i lukaot gud long hat blong mi. I olsem se hem i somap hat blong mi we i brok.

“Mi glad tumas long Tok blong hem Baebol, from we i givhan long mi blong mi no moa kros. Mi mi folem ol tok blong aposol Pol long Rom 12:21 we i se: ‘Bambae yufala i no letem ol rabis fasin i winim yufala. Yufala i mas holemstrong ol stret fasin blong yufala, blong winim ol rabis fasin.’”

“Wan gudfala fren i givhan long mi blong mi luksave se mi mas fogetem samting we i hapen mo gohed. Hem i soem Prija 3:6, mo long kaen fasin hem i talem se i gat wan taem blong ‘man i lusum samting.’ Advaes ya i strong, be mi nidim. Naoia mi traem blong mekem sam niufala samting long laef blong mi.”

Elisabet i talem se: “Taem mared blong yu i brok, yu nidim narafala blong givhan long yu. Mi gat wan gudfala fren we i givhan long mi evridei. Hem i krae wetem mi, i leftemap tingting blong mi, mo i soemaot se hem i lavem mi. Hem i no sakemaot mi. Mi mi sua se Jehova i yusum hem blong mekem mi mi harem gud bakegen.”

Luis, we yumi tokbaot finis, i kasem wan strong sik blong hat, mo klosap hem i ded tu taem. Naoia hem i mas pulum win long wan masin blong 16 aoa evri dei. Hem i talem se: “Oltaem mi mi prea long Jehova. Afta we mi prea, mi harem se tabu spirit i givim paoa long mi. Prea i givhan long mi blong gat strong tingting blong gohed, from we mi trastem hem mo mi save se hem i kea.”

Petra, wan woman we i gat bitim 80 yia, i talem se: “Mi wantem mekem plante samting, be mi no naf. Mi harem nogud taem mi luk se mi no gat paoa blong mekem ol samting ya. Bodi blong mi i slak mo mi mas dring meresin oltaem. Plante taem mi tingbaot tok we Jisas i talem, blong askem long Papa blong hem sipos i save tekemaot trabol blong hem. Jehova i mekem Jisas i strong, mo i stap mekem mi tu mi strong. Mi mi prea evri dei, mo hemia meresin we i beswan. Afta we mi toktok long God, mi harem gud.”​—Matiu 26:39.

 Julian, we i sik bigwan (multiple sclerosis) blong klosap 30 yia, i gat sem tingting, i se: “Mi aot long gudfala jea blong mi olsem bos blong wan kampani, mo mi go long wiljea. Be mi glad long laef blong mi yet, from we mi save givhan long ol narafala, mo samting ya i tekemaot soa we mi mi harem. Jehova i stap holem promes blong hem blong mekem yumi strong. Mi mi harem olsem aposol Pol, we i talem se: ‘Mi mi naf blong mekem evri samting from we hem i stap givim paoa long mi.’”​—Filipae 4:13, NW.

Antonio i talem se: “Taem mi harem nius se papa blong mi i ded long wan aksiden, mi no save bilivim. I no stret nating. Hem i no mekem wan samting we i rong. Hem i stap wokbaot long rod nomo, nao wan trak i sperem hem. Be mi no save mekem wan samting. Hem i slip blong faef dei long hospital, afta hem i ded. Mi wantem krae taem mi stap wetem mama blong mi, be mi holemtaet mi nomo. Be taem mi stap mi wan, mi krae we mi krae. Mi stap askem se: ‘?From wanem? ?From wanem?’

“Long had taem ya, mi askem long Jehova oltaem blong i givhan long mi blong mi no harem nogud tumas, mo blong i putum pis long tingting blong mi. Sloslo tingting blong mi i kwaet. Mi tingbaot ol tok blong Baebol se trabol i save kamaot enitaem nomo, we yumi no tingbaot nating. God i no save giaman, taswe mi bilif strong se bambae mi luk papa blong mi bakegen, taem God i mekem hem i laef bakegen.”​—Prija 9:11; Jon 11:25; Taetas 1:2.

Robert, we yumi tokbaot finis, i gat sem tingting, i se: “Taem mi mo waef blong mi Maribel i prea long Jehova, mitufala i gat pis long tingting, olsem Filipae 4:6, 7 i talem. Hemia i mekem se mitufala i naf blong tokbaot laef bakegen long ol man blong nius long TV, we oli askem kwestin long mitufala. Boe blong mitufala i ded long wan aksiden long plen, be mitufala i stap tingbaot yet ol gudfala taem we mifala i gat. Mitufala i traem tingbaot samting ya nomo.

“Ol narafala Witnes oli talem se oli luk mitufala long TV, taem mitufala i tokbaot bilif blong laef bakegen. Mitufala i talem long olgeta, se mitufala i naf blong mekem olsem from ol prea we oli mekem blong mitufala. Ol tok we ol narafala oli talem blong leftemap tingting blong mitufala, i mekem mi mi luksave se Jehova i stap lukaot gud long mitufala.”

Ol stori ya oli soemaot se, nomata wanem trabol we yumi kasem, be God i save mekem yumi harem gud bakegen. Hem i save mekem olsem long yu tu. Nomata wanem trabol we yu kasem, hem i save leftemap tingting blong yu. * Taswe i gud yu askem long Jehova blong i givhan long yu. Hem i “God we i stamba blong fasin blong givhan.”​—2 Korin 1:3.