Iei alon Seth, * “Ám me pwúlúwei we aua chék katowupék seni ám angang. Ren úkúkún ruu ier aua chék manaw seni met aramasem ra liffang ngenikem me ám féri ekkóch sókkun angangen moni mi tekison. Pwúlúwei we Priscilla, a letipechou, me ua meefi pwe ngang emén mi lamotongaw.

“Ifa usun aua likiitú? Priscilla a kan soun ákkáchema ngeni alon Jesus we lón Mateus 6:34. A erá pwe sisap aúreki usun lesor, pokiten eú me eú rán epwe pwisin aúreki masouan. Me an kewe iótek seni alóllóólun letipan ra fang ngeni péchékkúl pwe epwe tongeni sópweló an achocho. Nge ren ngang, minne a mak lón Kölfel 55:22 a oururuei. Ua áppirú ewe soumakken kélfel, ua isetá ngeni Jiowa ai weires me ua meefi pwe i a álisiei ai upwe likiitú. Inaamwo ika iei a wor ai angang, nge aua achocho le ámecheresi nónnómun manawem pwe epwe tipeeú ngeni án Jesus we éúréúr lón Mateus 6:20-22. Nge lap seni meinisin, a lapóló ám pacheéch ngeni Kot me pacheéchfengen lefilem.”

Iei alon Jonathan. “Lupwen a peeló ám we kúkkúnún business, ua fókkun aúreki manawem lón mwachkkan. Pokiten ngangngawolóón fetálin moni, iwe ám angang weires lón úkúkún 20 ier a lamotongawóló. Ngang me pwúlúwei we aua poputá le áninifengen wóón moni. Ause pwal mwo nge tongeni kamé wóón credit card, pún aua lólilen ika esap ketiw.

“Nge án Kot we Kapas me an we manaman mi fel ra álisikem ám aupwe féri kefil mi múrinné. Ua ekkesiwili ai ekiek pwe menni chék angangen moni a suuk ngeniei upwe etiwa, me aua ekisikisaaló ám moni towu wóón meinisin ekkewe mettóch ese kon lien lamot ngenikem. Chiechiem kewe Chón Pwáraatá Jiowa ra pwal álisikem. Ra ámmeef ngenikem pwe mi wor lamotem, me lón fansoun mi fókkun áweires ngenikem, ra awora ngenikem álillis lón pekin aion.”

Iei alon emén fefin itan Raquel: “Lupwen a weiweitá án pwúlúwei we likitieiló, a kinás letipei me ua mángaw. Me ai letipengaw a wesewesen chounieitiw. Nge ua achocho le akkarap ngeni Jiowa, me i a oururuei. Lupwen ua iótek ngeni Kot iteiten rán, an we kinamwe a túmúnú letipei. Usun itá nge a férsefáli letipei we mi tatakkis.

“Ua pwal kilisou ren an we Kapas, ewe Paipel, a álisiei ai upwe pworacho ngeni ai meefi mángaw me song. Ua lefareni met aposel Paulus a apasa lón Rom 12:21: ‘Kosap mwüt ngeni ngau epwe akufuk, nge kopwe akufu met mi ngau ren om föföröch.’

“Emén chiechiei a álisiei ai upwe kúna met mi lamot upwe féri pwe usap chék mwéchútiw lón ai weires. A áiti ngeniei Än Salomon Afalafal 3:6, me fán kirekiréch a ereniei pwe a wor fansoun mi éch sipwe fangetá wóón met mi ‘pöütüla.’ Ina eú éúréúr mi áweires, nge ina met a lamot ngeniei. Iei a wor och mettóch ua isetiw mwei ai upwe achocho ngeni lón manawei.”

Iei alon Elizabeth, “Lupwen a ta ewe riri lón óm pwúpwúlú, a lamot ngonuk álillis. A wor emén chiechiei mi tongeei a kan soun ngeniei ena esin álillis iteiten rán. A fitiei le kechiw, oururuei, me pokiten an álillis ua meefi án aramas tong ngeniei nge esap koput. Ua lúkúlúk pwe Jiowa a néúnéú i le echikara kinásen letipei.”

Luis, ewe sia fen pwóróus usun lón ewe lesen akkomw, a wor osukosuken ngasangasan, me chippú epwe máló fán ruu. Iei, lón eú me eú rán a lamot epwe kan ngasangaseri oxygen úkúkún 16 awa. A erá: “Ua iótek ngeni Jiowa iteitan.” A pwal erá: “Nge mwirin ai iótek ngeni Kot, ua meefi an manaman mi apéchékkúlaei. Iótek a ngeniei ewe pwora le likiitú pokiten a wor ai lúkúlúk wóón Kot me ua silei pwe i a chúngúei.”

 Emén fefin itan Petra, 80 som ierin, a erá: “A chómmóng mettóch ua mochen féri nge use tongeni. Ua fókkun weires ai ua meefi kisikisilóón péchékkúlei. Ua pekkusuló me ua chék lúkúlúkú sáfei. Ua kan ekkekieki usun án Jesus we ereni Seman we pwe ika mi tufich epwe angei seni an we riáfféú. Nge Jiowa a apéchékkúla Jesus, me a pwal apéchékkúlaei. Iótek, ina ai we sáfei iteiten rán. Ua fókkun meefi péchékkúl mwirin ai fós ngeni Kot.”​—Mateus 26:39.

A pwal ina usun met Julian a meefi. I a fiffiu ngeni eú semmwen mi chou itan multiple sclerosis ren arapakkan 30 ier. Iei alon: “Me mwan, ua kan mwoot wóón eú sea mi múrinné lón wisei wis tekia lón eú kompeni, nge iei ua chék mwoot wóón efóch wheelchair.” A pwal erá: “Nge manawei ese lamotmwáál pún ua angang fán iten ekkewe ekkóch. Ach fangóló a tongeni ekisikisaaló ach riáfféú, me Jiowa a akkapwénúetá an we pwon pwe epwe apéchékkúlakich lón fansoun mi lamot ngenikich. Usun chék ewe aposel Paulus, ua tongeni apasa: ‘Ngang mi tufich ren mettoch meinisin lon ewe emon mi apochokkulaei.’”​—Filipi 4:13, Testament Mi Fö.

Antonio a erá: “Atun semei we a máló ren án efóch tarakú purei, me akkomwan use fókkun lúkú pwe a má.” A pwal erá: “Ese fókkun pwúng, sanne efisian, i a chék fetál. Nge ese wor met ua tongeni féri. Úkúkún nimu rán ese meefi, mwirin a máló. Ua chék pwouni ai kechiw mwen mesen inei we, nge lupwen ua chék áláemén ua fókkun kechiw. Ua kan pwisin eisiniei, ‘Pwata? Pwata?’

“Lón ekkena rán mi áweires, ua kan tingorei Jiowa an epwe álisiei pwe upwe nemeni ai memmeef me epwe fangoto an kinamwe. Iwe ekis me ekis a kikkinamweeló riáfféún letipei. Ua chemeni án Paipel apasa pwe a tongeni fis ngeni emén me emén leich och mettóch mi weiweitá. Pokiten Kot ese tongeni kapas chofona, ua lúkúlúk pwe upwe kúnasefáli semei we atun ewe manawsefál.”​—Än Salomon Afalafal 9:11, NW; Johannes 11:25; Titus 1:2.

A pwal ina esin meefien Robert, ewe sia fen pwóróus usun lón ewe lesen akkomw. A erá: “Ngang me pwúlúwei we aua meefi ewe esin kinamween ekiek mi mak lón Filipi 4:6, 7. A feito seni ám ikkiótek ngeni Jiowa. Ei esin kinamwe a atufichikem ám aupwe tongeni fós ngeni ekkewe chón fér news usun ám ápilúkúlúkú ewe manawsefál. Inaamwo ika néúm we át a máló atun a ákseten ewe sepelin, nge a chúen chómmóng fansoun mi apwapwa aua chechchemeni. Aua achocho le nefotofot woor.

“Lupwen pwiim kewe Chón Pwáraatá ra erenikem ar kúnakem wóón TV atun aua áweweei ám lúkú fán kinamwe, aua ereniir pwe ese mwáál a fis ena pokiten chómmóngun ekkewe iótek aramas ra eáni fán item. Ua enletin lúkú pwe Jiowa a ákkálisikem me ren ar kewe kapasen ourur mi fókkun chómmóng.”

Usun met a fen pwá seni pwóróusen ekkeei aramas, Kot a tongeni awora ourur ngeni chókkewe mi kúkkúna sókkopaten weires me osukosuk. Nge ifa usun en? Ese lifilifil met sókkun osukosuk kopwe kúna lón manawom, a kawor ourur epwe álisuk lón ekkewe fansoun mi áweires. * Iwe, pwata kese kuliiti Jiowa me tingor an álillis? I ewe “Kot mi echipakich lon mettoch meinisin.”​—2 Korint 1:3.