Seth * i dir: “Mwan ek mon madanm ti perdi nou travay an menm tan. Pour de-z-an, nou ti viv lo sa ki nou fanmir ti donn nou ek bann pti zournen ki nou ti fer. Mon madanm Priscilla, ti tonm dan en depresyon akoz sa problenm e mwan, mon ti santi ki mon en bon nanryen.

“Ki mannyer nou ti fer fas avek sa sityasyon? Priscilla ti toultan mazin sa verse dan Matye 6:34. Dan sa verse Zezi ti dir ki nou pa devret trakas pour demen, parski sak zour i annan son prop traka. Bann lapriyer senser ki Priscilla ti fer, ti donn li lafors pour kontinyen al annavan. Pour mwan, sa ki ti rekonfort mwan ti sa verse dan Psonm 55:22. Parey sa psalmis, mon ti desarz tou mon fardo lo Zeova e mon ti santi ki i ti soutenir mwan. Menm si mon pe travay aprezan, nou kontinyen viv en lavi senp parey Zezi ti demann nou pour fer dan Matye 6:20-22. Sa ki pli enportan ankor, se ki nou’n vin pli pros avek Bondye e avek kanmarad.”

Jonathan i dir: “Ler nou pti biznes fanmir ti faid, mon ti per ki ti pou arive a lavenir. Akoz kriz ekonomik, 20 an travay ti tonm dan delo. Mwan ek mon madanm, nou ti konmans dispit akoz larzan. Nou ti nepli kapab servi nou kart kredi akoz nou ti per pangar i pa ganny aksepte.

“Me Parol Bondye ek son lespri sen ti ed nou pour fer bann bon desizyon. Mon ti bezwen aksepte nenport louvraz e nou ti koup tou depans ki pa ti vreman neseser. Konman Temwen Zeova, nou ti osi ganny sipor avek lezot frer ek ser. Zot ti ankouraz nou e ed nou ler keksoz ti vin pli difisil.”

Raquel i dir: “Ler mon msye ti kit mwan en sel  kou, sa ti tap mwan en kantite e mon ti ankoler. Mon ti tonm dan en depresyon me mon ti vin pli pros avek Bondye e i ti rekonfort mwan. Mon ti priy Bondye toulezour, mon ti santi mwan anpe e sa ti protez mon leker. I ti konmsi Bondye ti’n repar mon leker kase.

“Gras a Parol Bondye, Labib, mon ti reisi kontrol mon lakoler e mon ti nepli annan rankin. Mon ti pran aker sa parol zapot Pol dan Romen 12:21: ‘Pa les lemal domin ou. O kontrer, domin lemal par lebyen.’

“En dimoun ti donn mwan en bon konsey, i ti ed mwan konpran ki mon ti bezwen kontinyen viv mon lavi. I ti montre mwan sa verse dan Eklezyast 3:6 e i ti dir mwan byen zantiman ki i annan en letan pour aksepte ki ou’n perdi. Sa konsey ti difisil pour aksepte me i ti sanmenm ki mon ti bezwen dan sa moman. Aprezan, mon nepli konsantre lo mon problenm me mon annan bann nouvo plan dan mon lavi.”

Elizabeth i dir: “Ler ou maryaz i kase, ou bezwen sipor. Mon ti annan en zanmi ki ti donn mwan sipor toulezour. Ler mon ti plere li osi i ti plere, i ti rekonfort mwan e fer mwan santi ki dimoun i ankor kontan mwan e ki mon pa’n ganny konpletman abandonnen. Mon asire ki Zeova in servi li pour ed mwan geri emosyonnelman.”

Luis, ki ganny mansyonnen lo paz 3 i malad leker e de fwa i ti pros pour mor. Konmela, i bezwen pran loksizenn 16 erdtan par zour. Luis i dir: “Mon priy Zeova toultan e apre ki mon’n fini priy Bondye, mon santi ki son lespri sen i redonn mwan lafors. Lapriyer i ed mwan pour pa konpletman dekouraze akoz mon annan lafwa dan Zeova e mon konnen ki i pran swen avek mwan.”

Petra ki dan son 80 an i dir: “Mon anvi fer bokou keksoz me mon zis pa kapab. I difisil pour mwan vwar ki ptitapti mon pe perdi mon lafors. Mon santi mwan epwize e mon bezwen pran latizann toulezour. Souvan mon mazin ler Zezi ti demann son Papa pour tir sa leprev ki i ti pe pas atraver me Zeova ti donn li lafors e sanmenm ki i fer avek mwan. Lapriyer i parey en latizann ki mon pran toulezour. Mon santi mwan  bokou pli byen apre ki mon’n fini koz avek Bondye.”​—Matye 26:39.

Pour apepre 30 an, Julian pe lalit avek multiple sclerosis e i santi parey Petra. I dir: “Mon ti abitye asiz dan mon gro sez dan mon lofis manedyer me konmela mon asiz dan en wiltyer. Me kantmenm sa, mon lavi i annan en sans akoz mon pe servi mon lavi pour ed lezot. Letan ou ed lezot, ou ganny soulaze avek ou prop soufrans e Zeova i touzour gard son promes ki i pou donn nou lafors ler nou bezwen. Parey zapot Pol, mon kapab vreman dir: ‘Mon kapab fer fas avek tou difikilte gras a [sa enn] ki donn mwan lafors.’”​—Filipyen 4:13.

Antonio i rapel, “Ler mon papa ti mor dan en aksidan loto, premye kou mon pa ti oule krwar. Pour mwan, i ti paret enzis akoz i pa ti’n fer nanryen mal, i ti pe zis marse lo trotwar. Me i ti napa nanryen ki mon ti kapab fer. I ti dan koma pour senk zour e apre i ti mor. Mon ti esey pa plere devan mon manman me ler mon ti tousel, mon pa ti kapab kontrol mon larm. Mon ti demann mon lekor, ‘Akoz? Akoz sa in arive?’

“I ti vreman difisil, me mon ti kontinyen demann Zeova pour ed mwan kontrol mon santiman negatif e pour mwan kapab anpe. Dousman, dousman, mon ti santi mwan pli kalm. Mon ti mazinen ki Labib i dir ki maler i kapab ariv nenport ki. Me mon annan sa lasirans ki mon pou vwar mon papa en zour ler i pou ganny resisite akoz Bondye pa zanmen koz manti.”​—Eklezyast 9:11; Zan 11:25; Tit 1:2.

Robert ki ganny mansyonnen dan sa lartik avan i annan menm santiman. I dir: “Gras a nou lapriyer ki nou ti fer avek Zeova, mwan ek mon madanm Maribel, nou ti eksperyans sa lape lespri ki Filipyen 4:6, 7 i koz lo la. Sa lape lespri ti permet nou pour koz avek bann zournalis lo sa lespwar ki nou annan ki en zour nou garson pou resisite. Menm si nou garson ti mor ler sa avyon ti kraze, nou ankor annan bann bon souvenir ki nou ti pas ansanm e nou esey konsantre lo la.

“Letan lezot Temwen Zeova ti rakont nou ki mannyer nou ti sitan kalm ler nou ti pe eksplik nou lafwa lo televizyon, nou ti dir zot ki si nou ti kalm, sa ti gras a zot bann lapriyer ki zot ti’n fer pour nou. Mon senserman krwar ki Zeova ti pe siport nou gras a tou sa bann mesaz rekonfortan ki zot ti anvoy nou.”

Parey sa bann legzanp in montre, Bondye i kapab donn rekonfor bann dimoun ki pe fer fas avek diferan problenm ek difikilte. Me ou? Nenport ki problenm ki ou pe fer fas avek dan lavi, ou kapab ganny sa rekonfor ki ou bezwen dan sa bann moman difisil. * Alor, akoz ou pa les Zeova ed ou? I sa “Bondye . . . ki donn rekonfor dan tou sityasyon.”​—2 Korentyen 1:3, NW.